Samuelqa huch’uychanmantapachan Dios yupaychana karpapi tiyarqan, chaymanmi runakunaqa riqku Diosta yupaychanankupaq. ¿Imaraykun Samuel tiyarqan Dios yupaychana karpapi? Ñawpaqtaqa yachasun Samuelpa mamanmanta, sutinmi karqan Ana.

Anaqa wawayoq kaytapunin munarqan, ichaqa manan atirqanchu. Chayraykun Jehová Diosta rogakurqan, prometerqantaqmi: “Wawayoq kaspaqa Diosta yupaychana karpamanmi chay wawata entregapusaq chaypi kawsananpaq llank’ananpaq ima”, nispa. Jehová Diosqa kutichirqanmi mañakusqanman, hinan Anaqa wawayoq karqan. Paymanmi Samuel sutita churarqan. Kinsa otaq tawa watanpi Samuel kashaqtinmi, Anaqa promesa ruwasqanman hina Dios yupaychana karpaman Samuelta apapurqan.

Eliqa Diosta yupaychana karpapin uma sacerdote karqan. Paymi runakunarayku Dioswan rimaq. Iskay churinkunapas chaypin llank’arqanku. Yachasqanchis hina, chay karpaqa Diosta yupaychanapaqmi karqan, chaymi chaypi kaq runakunaqa allinta kawsananku karqan. Ichaqa Eliq churinkunaqa sinchi mana allinkunatan ruwasharqanku, Samuelqa chay ruwasqankutan rikurqan. ¿Elipa churinkuna hinachu Samuelpas mana allinkunata ruwarqan? ¿Ima ninkin?... Manan, Samuelqa allin kaqtan ruwashallarqan, tayta-mamanpa yachachisqanman hina.

¿Imatan Elí ruwanan karqan mana kasukuq churinkunawan?... Payqa Diosta yupaychana karpapin manaña llank’achinanchu karqan. Ichaqa Eliqa manan chaytachu ruwarqan, hinan Jehová Diosqa phiñakurqan paypaq iskaynin churinkunapaqpas. Chayraykun Jehová Diosqa paykunata wanachirqan.

Samuelqa Jehová Diospa nisqantan Eliman willarqan

Huk tutan Samuel puñusharqan, chayllamanmi uyarirqan “Samuel” nispa huk kunka waqyamusqanta. Payqa Elimanmi rirqan, Elitaq nirqan: “Manan ñoqaqa  waqyamurqaykichu”, nispa. Iskay kutipin kaqllata sucederqan. Ichaqa kinsa kutipi sucedesqan qhepamanmi, Eliqa Samuelta nirqan hukmanta uyarispaqa kayta ninanpaq: “Jehová Dios niway, uyarishaykin”, nispa. Chaytan Samuelqa ruwarqan, Jehová Diostaqmi kayta kamachirqan: “Eliqpa familian mana allinkunata ruwasqanraykun paykunata wañuchisaq, chayta Eliman willamuy”, nispa. ¿Facilchu kanman karqan Samuelpaq chayta Eliman willay? ¿Ima ninkin?... Manan facilchu karqan. Ichaqa manchasqaña kasharqan chaypas, payqa Jehová Diospa kamachisqantan ruwarqan. Diospa nisqanqa hunt’akurqanmi. Elipas iskaynin churinkunapas wañupurqankun.

Ñoqanchisqa Samuel hinan kananchis. Hukkunaña mana allinkunata ruwasharqanku chaypas payqa allin kaqtan ruwashallarqan. ¿Chaytachu qanpas ruwashanki? ¿Samuel hinachu Jehová Diosta kasukushallanki? Chayta ruwaspaqa tayta-mamaykitapas Jehová Diostapas kusichinkin.

BIBLIAYKIPI LEEY

  • 1 Samuel 2:22-26; 3:1-21