¿Facilchu tayta-mamaykita kasukuy?... Mayninpiqa sasan. Jesusqa kasukurqanpunin Jehová Diostapas tayta-mamantapas. ¿Munawaqchu Jesusmanta yachayta?... Chay ruwasqanmi yanapasunki sasaña kaqtinpas tayta-mamaykita kasukunaykipaq.

Manaraq hallp’api kashaspan Jesusqa Jehová taytanwan hanaq pachapi tiyarqan. Ichaqa kay hallp’apiqa Jesuspa tayta-mamanqa Josewan Mariawanmi karqanku. ¿Imatan Dios ruwarqan Jesús nacenanpaq? ¿Munawaqchu chaymanta yachayta?...

Jesús nacenanpaqqa Jehová Diosmi huk milagrota ruwarqan. Chaymi Jesuspas huk wawakuna hina Mariaq wiksanpi wiñarqan, isqon killamantataq nacerqan. Chhaynapin Mariawan Josewan kay pachapi Jesuspa tayta-maman kapurqanku.

12 watanpi kashaspan Jesusqa rikuchirqan taytan Jehová Diosta anchata munakusqanta. Chayqa sucederqan Jesuspas familiankunapas Jerusalenman risqankupin. Chaymanqa rirqanku Jehová Diosta yupaychanankupaqmi. Chaymanta kutimpushaspan Josepas Mariapas mana maypipas Jesusta tarirqankuchu. ¿Imatan ruwarqanku Jesusta tarinankupaq?...

¿Imaraykun Jesús templopi kasharqan?

Josewan Mariawanmi usqhaylla Jerusalenman kutispanku Jesusta maskharqanku. Paykunaqa sinchi llakisqan kasharqanku. Ichaqa kinsa p’unchay qhepamanmi Jesusta tarirqanku. ¿Maypin Jesús kasharqan? ¿Yachankichu?... Payqa templopin kasharqan. Chaypiqa Jehová Diosmantan yachayta atirqan. Payqa munakurqanmi Jehová Diosta, kusichiytapas munarqanmi. Runakunaña mana allinta tratarqanku chaypas Jesusqa kasukullarqanpunin Diosta. ¿Kasukullarqantaqchu Josetapas Mariatapas?... Arí, kasukurqanmi, chaytan Biblia nin.

¿Kasukuqchu karqan Jesús?... Arí, kasukuqmi karqan. Mayninpi sasaña kanman chaypas, kasukunaykipunin tayta-mamaykitaqa. ¿Chaytachu ruwanki?...