Kichay leenaykipaq

Haykuy iskaykaq menú nisqaman

Jehová Diospa testigonkuna

quechua (Cusco)

¿Kanqachu kawsarimpuy wañupuqkunapaq?

¿Kanqachu kawsarimpuy wañupuqkunapaq?

¿Ima ninkin?

  • “Arí” ninkichu

  • “Manan” ninkichu

  • “Yaqapaschá” ninkichu

 BIBLIA NIN:

‘Wañusqakunatan Dios kawsarichimpunqa’, nispa (Hechos 24:15, Diospa Simin Qelqa).

¿IMAYNAPIN YANAPAWANCHIS CHAY TEXTOQ NISQAN?

Munakusqanchis runa wañupuqtinmi sonqochayta tarisun (2 Corintios 1:3, 4)

Manañan wañuyta manchakusunchu (Hebreos 2:15)

Manan iskayasunchu munakusqanchis wañupuq runakunawan hukmanta tupananchispi (Juan 5:28, 29)

 ¿CREENANCHISPUNICHU BIBLIAQ NISQANPI?

Arí, ¿imarayku?

  • Kawsayta Dios paqarichisqanrayku. Bibliapin Jehová Diosmanta nin: ‘Kawsayta paqarichiq’, nispa (Salmo 36:9; Hechos 17:24, 25). Paymi kawsayta qon llapa kawsaqkunaman, wañupuqkunatapas atinmi hukmanta kawsarichimpuyta.

  • Ñawpa tiempopi runakunata Dios kawsarichisqanrayku. Bibliapin willakun pusaq runakunata kawsarichisqanmanta. Paykunamantan karqan waynakuna, kurakkuna, qharikuna, warmikunapas. Hukkunaqa pisi tiempollaraqmi wañupusqaku, hukninmi ichaqa tawa p’unchayña wañusqa kasqa (Juan 11:39-44).

  • Wañupuq runakunata Dios kawsarichiyta munasqanrayku. Jehová Diosqa enemigonta hinan wañuyta qhawarin (1 Corintios 15:26). Chayraykun chay enemigota kawsarichiywan tukuchinqa. Payqa munashanpunin yuyayninpi kaqkunata kawsarichimpuyta kay pachapi kawsanankupaq (Job 14:14, 15).

 TAPUKUY

¿Imaraykun machuyanchis wañunchispas?

Chay tapuypa kutichiynintan tarinki: GÉNESIS 3:17-19; ROMANOS 5:12 textokunapi.