Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 14 CAPÍTULO

¿Imaraykun jujkunata perdonananchis?

¿Imaraykun jujkunata perdonananchis?

¿YAQACHU jayk’aqllapas jujkuna k’irirasunkiku otaq mana allinkunata nirasunkiku?... ¿Kaqllawantaqchu paykunaman kutichinayki?...

Wakin runakunaqa kaqllawantaqmi kutichikuyta yachanku. Jesusmi ichaqa yachachiran jujkuna perdonayta (Mateo 6:12). Ichaqa, ¿imatan ruwasunman pipas sapa kutilla mana allinta tratawaqtinchis? ¿Jayk’a kutitan paykunata perdonananchis?...

Chaytan Pedropas yachayta munaran. Chaymi Jesusta tapuran: ‘¿Jayk’a kutikaman jujkunata perdonasaq? ¿Qanchis kutikamachu?’, nispa. Qanchis kutikamalla perdonayqa pisillan, chaymi Jesús niran: “Qanchis chunka qanchisniyoq kutikaman”, nispa.

¿Imatan Jesusta Pedro tapukuran?

Chayqa askhan ¿riki? Pipas chhayna askha kutita ofendewasunman chayqa, manan yuyasunmanchu sapa kutilla imayna ofendewasqanchista. Chaytan Jesusqa yachachisharan. Jujkuna ofendewanchis chayqa, manan yupashanachu. Chaymi pipas perdonta mañakuqtinqa kaq rato perdonananchis.

 Jujkunata perdonayqa ancha importanten. Chaymi Jesusqa juj sumaq willakuyta willaran qatikuqninkuna perdonayta yachanankupaq. ¿Willasaykichu?...

Juj reymi karan ancha sumaq runallaña. Payqa esclavonkunata yanapayta munaspan juj kutin qolqeta manusqa. Ichaqa cobranan p’unchay chayamuqtinmi reyqa esclavonkunata wajachimuran. Jujninmi deberan  60 millón moneda qolqeta. ¡Chayqa ancha askha qolqen karan!

¿Ima niranmi rey, ‘suyaykuway, pagapullasaykin’ nispa esclavon valekuqtin?

Chay esclavoqa llapantan qolqeta gastarusqa. Manan imanpas karanchu pagapunanpaq. Chaymi reyqa qolqenta recuperananpaq runankunata kamachiran, chay runata, esposanta, wawankunata, tukuy kaqninkunatawan vendemunankupaq. ¿Imaynan sientekuran chay esclavo?...

Payqa reypa ladonpi qonqorikuspan valekuran: ‘Suyariykuway, pagapullasaykin manuytaqa’, nispa. ¿Imatan ruwawaq karan chay rey kaspa? ¿Perdonawaqchu karan?... Chay reyqa esclavonta anchata khuyapayaspan llapa manunta perdonaran. Niranmi: ‘Amaña imatapas pagapuwaychu’, nispa. ¡Anchatachá chay esclavoqa kusikuran!

Chaymanta ripushaspan chay esclavoqa payman debeqnin compañeronwan ñanpi tuparusqa. Payqa 100 moneda qolqellatan debesqa. Jinan esclavo runaqa compañeronta kunkanmanta jap’iruspa niran: ‘Pagapuway llapa debewasqaykita’, nispa. ¿Allinchu kasharan chay ruwasqan?...

¿Imatan esclavo runa ruwaran compañeron mana pagayta atiqtin?

Chay 100 moneda qolqeta debeq runaqa wajchan karan. Manan chay rato qolqen karanchu pagapunanpaq. Chaymi esclavo runaq ladonpi qonqorikuspa valekuran: ‘Suyariykuway, pagapullasaykin manuytaqa’, nispa. ¿Suyarinanchu karan chay esclavo?... Pay kaspa, ¿imatan ruwawaq karan?...

Chay esclavo runaqa manan rey jinachu khuyapayakuq karan. Pisillata payman deberanku chaypas, payqa kaq rato pagapunantan munaran. Chaymi compañeronta carcelpi wisq’achimuran mana pagapuyta atiqtin. Juj esclavo runakunan chayta rikusharanku. Chaymi carcelpi kaq compañeronkuta khuyapayaspa reyman willamuranku.

 Reyqa anchatan phiñakuran esclavon runa compañeronta mana perdonasqanmanta. Chaymi wajachimuspa niran: ‘Millay kamachi, noqaqa llapa manuykitan perdonapurayki. ¿Manachu qanpas chay kamachimasiykita khuyapayaspa perdonawaq karan?’, nispa.

¿Imatan rey ruwaran mana perdonaq esclavonta?

Chay esclavoqa manan rey jinachu compañeronta perdonaran. Chaymi reyqa carcelpi wisq’achimuran 60 millón moneda qolqe debesqanta paganankama. Carcelpiqa manan maymantapas qolqeta orqonmanchu reyman pagapunanpaq. Chaymi payqa wañunankama carcelpi wisq’asqa kapunan karan.

Chayta willayta tukuspan Jesusqa qatikuqninkunata niran: ‘Kaqllatataqmi janaq pacha Yayaypas ruwasunkichis manachus jujkunata tukuy sonqowan perdonankichis chayqa’, nispa (Mateo 18:21-35).

 Llapanchispas askhatapunin Diosman debenchis. Paymi kausaytapas qowanchis. Runakuna mana allinkuna ruwawasqanchismanta debewasqanchismi ichaqa sinchi pisilla. Chayqa esclavo runaman 100 moneda qolqe debesqan jinallan. Mana allinkuna ruwasqanchismanta Diosman debesqanchismi ichaqa, reyman debesqan 60 millón moneda qolqe jina.

Diosqa sumaq sonqon. Chaymi payqa mana allinkuna ruwasqanchismanta perdonawanchis. Payqa manan wañuywanchu castigawanchis juchanchismanta pagananchispaq. Ichaqa kayta ama qonqasunchu: Jujkunata perdonasun chayllan Diospas perdonawasun. Chhaynaqa, ¿imatan ruwananchis?...

Sichus pipas mana allinta ruwasunki chayri, ¿perdonankichu?

Sichus pipas ofendesunkiman, jinaspa chay qhepaman nisunkiman: “Perdonaykuway”, nispa chayri, ¿perdonankichu?... ¿Sapa kutilla ofendesunki chayri? ¿Sapa kutillachu perdonanki?...

Sichus noqanchis jujkunata ofendesunman chayqa, munasunmanmi perdonawananchista ¿riki?... Chaymi noqanchispas jujkunata perdonananchis. Ichaqa sonqomantan perdonananchis, manan simillanchiswanchu. Chayta ruwasun chayqa, Jesús jinan kasun.

Jujkunata perdonay ancha importante kasqanta yachanapaq leesun Proverbios 19:11; Mateo 6:14, 15; Lucas 17:3, 4.