Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 39 CAPÍTULO

Diosqa manan wawanta qonqaranchu

Diosqa manan wawanta qonqaranchu

JESUSMI amigon Lázaro wañupuqtin llakikuran. Jehová Diosri, ¿llakikuranchu wawanta ñak’arichishaqtinku wañuchishaqtinkupas?... Bibliaq willasqan jina, Jehová Diosqa llakikunmi imapas pasaqtinqa (Salmo 78:40, 41; Juan 11:35).

Imaynataraqchá Jehová Diosqa llakikuran wawanta wañuchishaqtinku ¿riki?... Jesusqa yacharanmi papan manapuni qonqananta. Chaymi wañupunanña kashaqtin niran: ‘Yayáy, makiykimanmi vidayta jap’ichiyki”, nispa (Lucas 23:46).

Jesusqa yacharanmi papan kausarichimpunanta. Jesuspa kausarimpusqan qhepamanmi Pedro ñaupa qelqapi nisqanta willaran: ‘Manan sepulturapi saqerparisqachu karan, aychanpas mana ismunanchu karan’, nispa (Hechos 2:31; Salmo 16:10). Arí, Jesusqa manan unaychu sepulturapi karan, chaymi cuerponqa mana ismuranchu nitaq asnaranchu.

 Jesusmi manaraq wañupushaspa apostolninkunaman willaran wañuchisqa kananta, kinsa p’unchayllamanta kausarimpunantapas (Lucas 9:22). Paykunaqa mana iskayaspan Jesuspa kausarimpunanta suyananku karan. Ichaqa, ¿chaytachu ruwaranku?... Chaymanta kunan yachasun.

Jesusqa viernes tardenta las tresta jinan wañupuran. Jinan José sutiyoq qhapaq runa Pilatoman riran Jesuspa cuerponta mañamunanpaq. Chay qhepamanmi Jesuspa cuerponta k’aspimanta uraykachispa sepulturaman churaran. Chay sepulturaqa huerta ukhupin tarikuran.

Chay qhepamanmi chay t’oqota jatunkaray rumiwan wisq’aranku. Kinsa p’unchay qhepamanmi domingo p’unchay karan. Manaraqmi p’unchayamuranchu, sacerdotekunaq churasqanku soldadokunataq sepulturata qhawasharanku. ¿Imaraykun qhawasharanku?...

Sacerdotekunan uyarisqaku: ‘Kausarimpusaqmi’, nispa Jesuspa nisqanta. Chaymi paykunaqa niranku: ‘Qatikuqninkunan cuerponta suwaruspa ninqaku: “Jesusmi kausarimun”’, nispa. Chaymi guardiakunata churaranku. Ichaqa qonqayllan juj jatun terremoto karan, jinan juj k’anchay rijuriran. ¡Jehová Diospa angelninmi karan! Chaymi soldadokunaqa mancharikuymanta mana kuyuriytapas atirankuchu. Jinan angelqa t’oqopi rumita suchuchiran. ¡Sepulturaqa ch’usaqmi kasharan!

¿Imaraykun sepultura ch’usaq kashan? ¿Iman pasaran?

Qhepamanmi Pedro niran: “Jesustan Diosqa kausarichimuran”, nispa (Hechos 2:32). Arí, Diosqa Jesusta kausarichispan juj cuerpota qoran. Angelkunaman jinan espiritual cuerpota qoran (1 Pedro 3:18). Ichaqa qatikuqninkuna rikunanpaqmi aycha cuerpopi paykunaman rijuriran. ¿Cheqaqtapunichu paykunaman rijuriran?... Chayta kunan yachasun.

 Inti lloqsimunanpaqqa manañan soldadokuna chaypichu kasharanku. María Magdalena juj warmikuna iman sepulturata qhawaq risharanku. Paykunaqa ninakusharankun: ‘¿Pitaq kunanri sepulturaq punkunmanta rumita suchurichipuwasunchis? Chay rumiqa sinchitan llasan’, nispa. Ichaqa sepulturaman chayaqtinkun rumiqa suchuchisqaña kasharan, manataqmi Jesuspa cuerpon karanchu. Jinan María Magdalenaqa phawaylla kutiran apostolkunaman willamunanpaq (Marcos 16:3).

Wakin warmikunan ichaqa sepulturapi qhepakuranku: ‘¿Maytaq Jesuspa cuerponri?’, nispanku. Chayllamanmi iskay runakuna k’anchashaq p’achawan rijuriranku. ¡Paykunaqa angelkunan karanku! Paykunan warmikunata niranku: ‘Imaraykun kaypi maskhashankichis. Payqa kausarimpunñan. Usqhaylla rispa qatikuqninkunaman willamuychis’, nispa. Chakinkuraqchá pisiran phawasqankupi. Ichaqa ñanta rishaqtinkun juj runawan tuparanku. ¿Pin karan chay runa?...

Jesusmi karan. Paymi niran: “Phawaychis, wayqeykunaman willamuychis”, nispa. Paykunaqa ancha kusisqan kutiranku. Jesuspa qatikuqninkunawan tupaspan niranku: ‘¡Jesusqa kausashanmi! ¡Rikuramuykun!’, nispa. María Magdalenan Pedroman Juanmanwan willaranña sepultura ch’usaq kapusqanta, chaymi paykunaqa pasasqakuña qhawaq. Dibujopi rikusqayki jina, paykunaqa Jesusta k’uyusqanku telakunata qhawaspan sinchita admirakuranku. Manan creeyta atirankuchu Jesuspa kausarimpusqanpi.

¿Imatan Pedropas Juanpas piensashankuman?

Chay domingo p’unchaymi Jesusqa iskay qatikuqninkunaman rijuriran Emaús llaqtaman rishaqtinku. Jesusqa paykunawan kuskan rimaspa ñanta risharan. Ichaqa manan repararankuchu Jesús kasqanta jujniray rijch’ayniyoq kasqanrayku. Chay  qhepamanmi mijunankupaq Jesús mañakuqtin chayraq repararanku Jesús kasqanta. Jinan ancha kusisqa Jerusalén llaqtata kutiranku karupiña kasharanku chaypas. Chayanankupaqqa ñan Jesusqa Pedrowan tupanmanña karan.

Chay ch’isintan Jesuspa qatikuqninkuna juj cuartopi juñukusharanku. Punkuqa wisq’asqan kasharan. Chayllamanmi Jesusqa cuartopi rijuriran. Chayraqmi creeranku Jesuspa kausarimpusqanta. ¡Maytachá paykunaqa kusikuranku! (Mateo 28:1-15; Lucas 24:1-49; Juan 19:38-20:21.)

 Jesusqa 40 p’unchaymi qatikuqninkunaman rijuriran kausarimpusqanta yachanankupaq. Chay qhepamanmi janaq pachaman kutipuran papanpa kasqanman (Hechos 1:9-11). Qatikuqninkunaqa llapa runakunamanmi willaranku Jesuspa kausarimpusqanta. Chay willasqankumantan sacerdotekuna wakinta maqaranku wakintataq wañuchiranku, chaywanpas predicashallarankun. Yacharankun wañuchisqa kaqtinkupas Jesús jina kausarichisqa kanankuta.

¿Imaynatan jujkuna Jesuspa kausarisqanta yuyarinku? Qanri, ¿imatan ruwanayki?

Wakin nacionkunapiqa conejokunata runtukunata ruwaspan Jesuspa kausarimpusqanta yuyarinanku. Bibliaqa manan ninchu chaykunata ruwaspa Jesuspa kausarimpusqanta yuyarinku. Aswanmi willan Diosta servinanchis kasqanta.

Noqanchismi ichaqa Jesuspa qatikuqninkuna jina Jesuspa kausarimpusqanmanta runakunaman willamunanchis. Manan runakunata manchakunanchischu. Sichus predicasqanchisrayku runakuna wañuchiwasun chayqa, Diosmi yuyariwasun. Arí, Jesusta jinan kausarichiwasun.

Diosqa manan qonqanchu serviqninkunata, wañupuqtinkupas kausarichimpunqan. ¿Kusikunkichu chayta yachaspa?... Arí, chaykunata yachasqanchismi kallpachawanchis Diospa sonqonta kusichinapaq. Ichaqa, ¿imata ruwananchis Diosta kusichinapaq?... Qatimuq capitulopin chaymanta yachasun.

Jesuspa kausarimpusqanpi creesun chayqa, allin iñiyniyoqmi kasun, chaypaq leesun Hechos 2:22-36; 4:18-20; 1 Corintios 15:3-8, 20-23.