Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 3 CAPÍTULO

Diosmi tukuy imatapas kamaran

Diosmi tukuy imatapas kamaran

¿Pin tukuytapas kamaran?

MAKINCHISQA ancha sumaq ruwasqan kashan. ¿Imakunatan makiyki ruwayta atin? ¿Yachankichu?... Qhaway makiykita, dedoykikunata pujllachiy. Kunanqa jap’iy ima rikusqaykitapas. Rikusqayki jina, makiykiqa imaymanatan ruwayta atin ¿riki? ¿Pin makinchista ruwaran?...

Arí, Jesuspa papanmi. Paymi ruwaran siminchista, senqanchista, ñawinchistapas. ¿Kusikunkichu ñawinchista Dios ruwasqanmanta?... Ñawinchis kasqanraykun rikunchis t’ikakunata, q’omer campokunata, sumaq azul cielotapas. Jinaspapas kay dibujopi rikusqanchis jina, rikunchismi urpichakunaq mijusqantapas. Tukuy chaykunata rikuy atisqanchisqa admirakunapaqmi ¿riki?...

¿Runakunachu chaykunata ruwaran? Manan ¿riki? Runakunaqa ruwankumanmi wasikunata, ichaqa manan qorakunatapas t’ikakunatapas wiñachiyta atinkumanchu, manan kausashaq urpichakunatapas ruwayta atinkumanchu. ¿Yacharankichu chayta?...

Diosmi tukuytapas kamaran. Paymi janaq pachata, kay pachata, runakunatapas ruwaran. Jesuspunin kay pachaman  jamuspa willaran qharitapas warmitapas Dios kamasqanta (Mateo 19:4-6).

¿Imaynapin Jesús chayta yacharan? ¿Rikuranchu Diospa kamasqanta?... Arí, rikuranmi. Diospa ñaupaq kamasqan angelmi karan, chaymi rikuran imaynatan Adantapas Evatapas kamaran chayta.

Diosmi nisqa: “Runata ruwasunchis”, nispa (Génesis 1:26). ¿Piwanmi Dios chaypi rimasharan?... Arí, wawanwanmi rimasharan. Paymi kay allpaman jamuspa Jesús sutiyoq kapuran.

Arí, Jesusqa manaraq kay allpaman jamushaspan janaq pachapi papanwan tiyaran, rikurantaqmi tukuy kamasqantapas. Jesusqa papanwan llank’ashaspan imaymanata yacharan. Chaymi payqa ancha allin yachachiq karan. ¡May allinpunin kanqa payta uyariyqa!

 Manaraq Jesusta kamashaspa, ¿llakisqachu Dios kasharan sapallan kasqanmanta?... Manan. Chhaynaqa, ¿imaraykutaq angelkunata, runakunata, animalkunatapas kamaran?... Munakuq kasqanraykun. Payqa munaranmi jujkunapas kusisqa kausanankuta. Chaymi Diosta agradecekunanchis kausay qowasqanchismanta.

Diosqa tukuy kamasqanpin rikuchin munakuwasqanchista. Intipi piensasun, intiqa sumaqtan k’anchawanchis q’oñiwanchis ima. Sichus inti mana kanmanchu chayqa, llapallanchismi chiripi wañupusunman. ¿Kusikunkichu Diosninchis intita kamasqanmanta?...

Diosmi paratapas qowanchis. Mayninqa pujllananchisraykun mana munanchischu paramunanta. Ichaqa parawanmi t’ikakuna wiñan. Chayrayku, ¿pitan “gracias” ninanchis paramuqtin? Arí, Diostan... ¿Frutakunata sumaq verdurakunata mijuspari?... Arí, Diostan “gracias” ninanchis, intiwan parawan chay mijuykunata wiñachisqanmanta.

Sichus pipas tapusunkiman: “¿Pin kamaran runakunata animalkunatapas?”, nispa chayri, ¿ima nispan kutichiwaq?... Ninaykin: “Arí, Diosmi runatapas animaltapas kamaran”, nispa. Ichaqa manapaschá creesunkichu. Nisunkipaschá: “Noqanchisqa animalkunamantan runaman tukuranchis”, nispa. Bibliaqa manan chaytachu yachachin. Aswanmi willan llapa kausaqkuna Diospa kamasqan kasqanchista (Génesis 1:26-31).

Wasitaqa runakunan ruwanku. Ichaqa, ¿pin ruwaran t’ikakunata, animalkunatapas?

¿Ima niwaqmi Diospi mana creeq runakunata?... Juj wasita qhawachispan tapuwaq: “¿Pin chay wasita ruwaran?”, nispa. Wasikunaqa manan kikillanmantachu rijurin, llapanchismi yachanchis runakuna ruwasqanta (Hebreos 3:4).

 Juj huertaman apaspan tapullawaqtaq: “¿Pin kay t’ikakunata ruwaran?”, nispa. Imaynan wasikunapas mana kikillanmantachu rijurin, chhaynatan t’ikakunapas mana kikillanmantachu rijurin. T’ikakunataqa Diosmi ruwaran.

Urpichakunaq takisqanta uyariychis, jinaspa tapuy: “¿Pin chay urpikunata ruwaran? ¿Pin takiyta yachachiran?”, nispa. Tukuy imata kamaq Diosmi ruwaran. Paymi llapanchismanpas kausayta qowanchis.

Wakin runakunaqa Diostaraqmi rikuyta munanku paypi creenankupaq. Chaymi nisunkikuman: “Rikusqallaypin noqaqa creeni, Diospi creenaypaqqa ñaupaqtan payta rikunay”, nispa.

Diostaqa manan pipas rikuyta atinmanchu. Biblian nin: ‘Diostaqa manan pi runapas rikunmanchu’, nispa. Chaymi Diosqa mana munanchu cuadrokunata nitaq ima imagenkunatapas ruwakunanchista. Chaykunata wasinchispi jap’isunman chayqa Diostan phiñachisunman (Éxodo 20:4, 5; 33:20; Juan 1:18).

Manataq Diosta rikunchischu chayqa, ¿imaynapin yachanchis Diospa kasqanta? A ver, kaypi piensasun: ¿Rikushankichu wayrata?... Manan ¿riki? Manan pipas rikunchischu. Ichaqa rikunchismi sach’akunata imayna kuyuchisqanta. Chaypin yachanchis wayraq kasqanta.

¿Imaynapin yachanchis wayraq kasqanta?

Chhaynallataqmi Dioswanpas. Manaña payta rikunchischu chaypas, rikushanchismi t’ikakunata, urpichakunata, tukuy imaymana kamasqantapas. Chaykunata rikuspan yachanchis Dios kasqanta.

Yaqapaschá pipas tapusunki: “¿Pin ruwaran intitapas allpatapas?”, nispa. Chayta kutichinaykipaq Bibliata leesun, ninmi:  ‘Qallariypin Diosqa janaq pachata kay pachatawan kamaran’, nispa (Génesis 1:1). Arí, Diosmi tukuy rikusqanchista kamaran. ¿Creenkichu chaypi nisqanta?...

Kausayniyoq kasqanchisraykun uyarinchis urpichakunaq takisqanta, rikunchis munay t’ikakunata, tukuy kamasqantapas. Anchatan kusikunchis sumaq mijuykunata mijuspapas. May kusisqan kashanchis kausasqanchismanta ¿riki?

Chaykunamantan Diosta “gracias” ninanchis. Ichaqa, ¿imatan ruwana agradecido kasqanchista rikuchinapaq?... Diostan uyarinanchis, kasukunanchistaqmi kamachiwasqanchista. Chayta ruwaspan rikuchisun pay munakusqanchista.

¿Imakunatan ruwananchis agradecido kasqanchista rikuchinapaq? Chaypaq leesun Salmo 139:14; Juan 4:23, 24; 1 Juan 5:21; Apocalipsis 4:11.