Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 134 CAPÍTULO

¡Jesús kausarimpun!

¡Jesús kausarimpun!

MATEO 28:3-15 MARCOS 16:5-8 LUCAS 24:4-12 JUAN 20:2-18

  • JESÚS KAUSARIMPUN

  • JESUSPA SEPULTURANPI IMAYMANAKUNA PASAN

  • JESÚS WAKIN WARMIKUNAMAN RIJURIN

Jesuspa sepulturanman riq warmikunaqa anchatan admirakuranku sepulturata ch’usaqta jina rikuspanku. Chaymi María Magdalenaqa phawaylla riran Simón Pedroman apóstol Juanmanwan (Juan 20:2). Sepulturapi qhepakuq warmikunan ichaqa juj angelta rikuranku, sepultura ukhupitaq juj angeltawan rikuranku ‘pampakama yuraq p’achayoqta’ (Marcos 16:5).

Jinan jujnin angelqa paykunata niran: “Ama mancharikuychischu, yachanin [...] Jesusta maskhashasqaykichista; payqa manan kaypiñachu, nisqanman jinan kausarichisqa kapun. Jamuychis, qhawaykuychis maypichus kasharan chayta. Chhaynaqa usqhaylla rispa discipulonkunaman willamuychis wañusqamanta kausarichisqa kasqanta. Payqa ñauparinñan Galileaman, chaypin payta rikumunkichis”, nispa (Mateo 28:5-7). Warmikunataq ‘manchasqa ancha admirasqa ima’ phawaylla apostolkunaman willaq riranku (Marcos 16:8).

Pedrota Juantawan tarispan Mariaqa paykunata niran: “Señortan sepulturamanta orqorapusqaku, manan yachaykuchu maymanchus churarunku chayta”, nispa (Juan 20:2). Jinan paykunaqa kaq rato sepulturaman phawaranku. Juanmi ñaupaqta chayaran, ichaqa manan jaykuranchu; jawallamantan rikuran telakunata.

Pedron ichaqa chayaspa jina sepulturaman jaykuran, chaypin rikuran Jesusta k’uyusqanku telakunata. Jinan Juanpas jaykuspa chayraq creeran Mariaq willasqanta. Jesús willaranña kausarichisqa kananta chaypas, paykunaqa manan chayta entienderankuchu (Mateo 16:21). Chaymantan paykunaqa admirasqa wasinkuman ripuranku, Marian ichaqa chayllapi qhepakuran.

 Chaykaman wakin warmikunaqa phawaylla risharanku apostolkunaq kasqanman, chayllamanmi Jesusqa paykunaman qonqaylla rijurispa napaykuran. Chaymi paykunaqa payman k’umuykuranku. Jinan Jesusqa niran: “¡Ama manchakuychischu! Phawaychis, wayqeykunaman willamuychis Galileaman rinankupaq, chaypin rikumuwanqaku”, nispa (Mateo 28:9, 10).

Terremoto pasaqtin, angelkunapas rijurimuqtinqa sepulturata cuidaq guardiakunaqa sinchita manchakuspan ‘wañusqa jinaraq kapuranku’. Yuyayninkuman kutispataq llaqtaman riranku, jinaspa “umalli sacerdotekunaman willamuranku tukuy imachus pasasqanta”. Paykunataq judío umallikunawan rimanakuspa soldadokunaman qolqeta qoranku, jinaspa niranku: “‘Puñushanaykukaman discipulonkuna tuta jamuspa cuerponta suwaruwasqaku’, nispan ninkichis”, nispa (Mateo 28:4, 11, 13).

Roma nacionpiqa wañuchispan castigaqku turnonkupi puñupuq soldadokunataqa, chaymi chay sacerdotekunaqa soldadokunata niranku: “Chaytachus kamachikuq yacharunqa chayqa, aman llakikunkichischu, noqaykuñan paywan rimasaqku”, nispa (Mateo 28:14). Jinan soldadokunaqa qolqeta chaskispa sacerdotekunaq nisqanman jina ruwaranku. Chhaynapin chay llullakusqanku lliu judiokunaman chayaran.

María Magdalenan sepulturaq kasqanpi kashaspa qonqaylla iskay angelkunata rikuran maypichus Jesuspa cuerpon kasharan chaypi tiyashaqta. Paykunan Mariata niranku: “¿Imaraykun waqashanki?” nispa. Jinan payqa niran: “Señorniytan orqorusqaku, manan yachanichu maymanchus churarunku chayta”, nispa. Chayta nispan payqa kutirispa juj runata rikuran, chay runan payta niran: “¿Imaraykun waqashanki? ¿Pitan maskhashanki?”, nispa. Mariataq huertapi llank’aq runapaq piensaspa chay runata niran: “Wiraqocha, qan aparanki chayqa, willaway maymanchus churamuranki chayta, chhaynapi apakapunaypaq”, nispa (Juan 20:13-15).

Chay runaqa Jesusmi karan, Marian ichaqa mana reqsiruranchu. Maypachachus Jesús: “¡María!”, niqtinmi ichaqa Mariaqa payta reqsiruran. Jinaspa kusisqa niran: “¡Yachachikuq!”, nispa. Cieloman chay rato ripushananpaq piensaspataq payman jap’ipakuran, jinan Jesusqa niran: “Ama jap’ipakuwaychu, manaraqmi Yayamanqa wichapuniraqchu. Ichaqa phaway wayqeykunaman nimuy: ‘Noqan wichapushani Yayayman, Yayaykichisman; Diosniyman, Diosniykichisman’”, nispa (Juan 20:16, 17).

Jinan Mariaqa phawaylla riran maypichus apostolkuna juj discipulokunapas juñusqa kasharanku chayman, chaypin paykunata niran: “¡Señortan rikuramuni!”, nispa. Paykunaqa ñan uyarisqakuña wakin warmikunaq willasqantapas (Juan 20:18). Chaywanpas chay willasqankutaqa ‘cuentopaq jinan rikuranku’, chaymi mana Mariatapas creerankuchu (Lucas 24:11).