Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 131 CAPÍTULO

Jesusta k’aspiman clavanku

Jesusta k’aspiman clavanku

MATEO 27:33-44 MARCOS 15:22-32 LUCAS 23:32-43 JUAN 19:17-24

  • JESUSTA ÑAK’ARINA K’ASPIMAN CLAVANKU

  • K’ASPIMAN LETREROTA CHURAQTINKU RUNAKUNA JESUSMANTA BURLAKUNKU

  • JESÚS JUJ RUNAMAN PARAISOTA PROMETEN

Jesustan aparanku llaqta jawapi “Golgota” nisqa pataman, chayqa “calavera pata” ninantan nin. Chaypin iskay suwakunatawan warkunanku karan. Chay pataqa rikukuqmi ‘karumantapas’ (Marcos 15:40).

Chayman chayaqtinkun kinsantinkuq p’achanqa ch’utisqa karan, chaymantataq drogayoq vinota paykunaman qokuran. Chay vinotaqa wakin warmikunan preparankuman karan, chhaynapi nanayta mana nishuta sientenankupaq. Soldadokunaqa manan jark’arankuchu chayta ujanankutaqa, Jesusmi ichaqa mana chayta ujayta munaranchu. Payqa allin yuyayninpin kayta munasharan, chhaynapi chay jatun pruebata wañunankama aguantananpaq.

Chaymantan Jesusta k’aspi pataman churaspa clavayta qallariranku (Marcos 15:25). Makinman chakinman clavokuna jaykuqtinqa maytachá nanaran. K’aspita sayachishaqtinkupas astawanraqchá nanaran cuerpon chutarikuqtin. K’irinkunapas astawanchá kicharikuran. Chaywanpas Jesusqa manan soldadokunataqa phiñarikuranchu, aswanmi paykunapaq Diosmanta mañapuran: “Yayáy, perdonay kay runakunata, paykunaqa manan yachankuchu imatachus ruwashanku chayta”, nispa (Lucas 23:34).

Roma runakunaqa juj letrerotan churaqku ima juchamantapas wañuchisqanku runakunaman. Chaymi Pilatoqa Jesusta warkusqanku k’aspiman juj letrerota churachiran hebreo rimaypi, latín rimaypi, griego rimaypi ima, chaypin payqa qelqasqa: “Judío runakunaq reynin, Nazaret llaqtayoq Jesús”, nispa. Chaymi umalli sacerdotekunaqa phiñasqa niranku: “¿Imaraykutaq: ‘Judío runakunaq reynin’, nispari qelqaranki? Aswanpas: ‘Judío runakunaq reyninmi kani’, nispa nisqantachá qelqawaq karan riki”, nispa. Jinan Pilatoqa niran: “Imachus qelqasqayqa ñan qelqasqaña kashan”, nispa (Juan 19:19-22).

Chaywan phiñakuspan umalli sacerdotekunaqa jatun juntapi jina Jesús contra rimayta qallariranku. Wakin chayninta pasaq runakunapas umankuta maywispan Jesusta k’amiranku: “¡Yau runa, templota thunispa kinsa p’unchaypi sayarichiq! Salvakuyyá chay ñak’arina k’aspimanta uraykamuspa”, nispa. Jinallataq kamachikuy simita yachachiqkunapas umalli sacerdotekunapiwan ninakuranku: “¡Jujkunatan salvan, pay kikintataq mana salvakuyta atinchu! Israelpa reynin Cristo kaspaqa uraykamuchunyá chay ñak’arina k’aspimanta, chayta rikuspa paypi creenanchispaq”, nispa (Marcos 15:29-32). Jesuspa ladonpi warkusqa kaqkunapas k’amillarankutaqmi.

Roma soldadokunapas burlakuytan qallariranku. Vino ujashasqankutan antojachiq jina payman jaywapakuranku. Chaymantataq letreronpi qelqasqata qhawaspa asipayaranku: “Judío runakunaq reynin kanki chayqa, salvakuyyá”,  nispa (Lucas 23:36, 37). Chhaynatan Jesusmanta burlakusharanku pay ñan, cheqaq kaq, kausay ima kashaqtin. Chaywanpas payqa mana pisipaspan chaykunata aguantaran, manataqmi pitapas k’amiranchu ni ima niranpaschu.

Tawa soldadokunan Jesusmanta ch’utisqanku p’achanta tawaman llik’iranku, sorteaspataq rakinakuranku. Ukhu p’achantapas oqarirankun, ichaqa “mana sirayniyoqmi chay p’achaqa karan, wichaymanta uraykama muyu awasqa”. Chaymi paykunaqa ninakuranku: “Ama llik’isunchu, aswanpas sorteasun pipaqchá kanqa chaypaq”, nispa. Chhaynapin junt’akuran: “Jawa p’achaytan paykunapura rakinakuranku, ukhu p’achaytapas sortearankun”, nisqa profecía (Juan 19:23, 24; Salmo 22:18).

Chaymantan jujnin warkusqa suwaqa repararan Jesús juj reypuni kasqanta, chaymi suwamasinta anyaran: “¿Manachu juj chikallantapas Diosta manchakunki, kay runa jinaña ñak’arishaspapas? Noqanchisqa razonwanmi khaynata ñak’arishanchis, imachus ruwasqanchismantataqmi kaytaqa chaskishanchispas; kay runan ichaqa mana ima mana allintapas ruwaranchu”, nispa. Jinaspa Jesusta niran: “Gobiernoykiman jaykuspayki noqata yuyarikuwanki”, nispa (Lucas 23:40-42).

Jinan Jesusqa payta niran: “Cheqaqtan kunan niyki: Noqawanmi paraisopi kanki”, nispa (Lucas 23:43). Chay promesaqa manan apostolkunaman prometesqan janaq pacha gobiernoman jaykunanpaqchu karan (Mateo 19:28; Lucas 22:29, 30). Aswanpas kay pachapi paraisoman jaykunanpaqmi karan. Chhayna paraisotan Jehová Diosqa qallariypi Adán Evaman qoran. Maytachá chay suwaqa kusikuran Jesuspa prometesqanta uyarispa.