LUCAS 12:1-34

  • JESÚS JUJ QHAPAQ RUNAMANTA WILLAN

  • JESÚS RIMAN ALTON PHAWAQ ANIMALKUNAMANTA LIRIO T’IKAKUNAMANTAWAN

  • ‘PISI T’AQA OVEJAKUNAN’ DIOSPA GOBIERNONMAN JAYKUNQAKU

Fariseoq wasinpi Jesús kashanankaman waranqanpi runakuna jawapi juñukuranku, imaynan Galileapipas askha runakuna juñukuranku jinata (Marcos 1:33; 2:2; 3:9). Chay runakunaqa manan fariseokuna jinachu karanku, paykunaqa Jesusmanta yachanankupaqmi jamuranku.

Chaypin Jesusqa discipulonkunata niran: “Cuidakuychis fariseokunaq levaduranmanta, chayqa iskay uya kayninkun”, nispa. Juj kutipipas rimaranñan chaymantaqa, ichaqa chay fariseoq wasinpi imatachus rikusqanraykun wajmanta chaymanta rimaran (Lucas 12:1; Marcos 8:15). Fariseokunaqa Dios sonqoman tukuspan pakaqku sinchi millay sonqo kasqankuta, chaymi Jesusqa niran: “Manan ima allin tapasqa kaqpas mana rijurichisqaqa kanchu, manallataqmi ima pakasqa kaqpas mana yachakuqqa kanchu”, nispa (Lucas 12:2).

Chaypi kashaq wakin runakunaqa manapaschá uyarirankuchu Jesuspa Galileapi yachachisqanta, chaychá Jesusqa wajmanta wakin yachachisqanmanta rimaran. Niranmi: “Ama manchakuychischu cuerpo wañuchiqkunataqa, paykunaqa manañan imatawanpas ruwayta atinkumanñachu”, nispa (Lucas 12:4). Jinaspa lliuta kallpacharan Diospi confianankupaq. Discipulonkunaqa mana manchakuspan willananku karan Jesusta reqsisqankuta, confianankutaqmi karan Dios paykunata yanapananpipas (Mateo 10:19, 20, 26-33; 12:31, 32).

Chayllamanmi juj runa nimuran: “Yachachikuq, wayqeyta niykapuway herenciaykuta t’aqanakunaykupaq”, nispa (Lucas 12:13). Diospa kamachikusqanman jinaqa iskay partetan phiwi churiqa chaskinan karan (Deuteronomio 21:17). Chay runaqa tupaqnin partemanta astawanchá chaskiyta munasharan. Chaymi Jesusqa niran: “Yau runa, ¿pin noqata churawaran qankuna ukhupi juezta, rakiqtapas?”, nispa (Lucas 12:14).

Jinaspa lliuman niran: “Makilla kashaychis, cuidakuychistaq tukuy imaymana munapayaymanta, runaqa askha imaymanayoqña kanman chaypas, manan chay imaymanankunachu kausaytaqa qonqa”, nispa (Lucas 12:15). May qhapaqña pipas kanman chaypas, wañupuspaqa lliutan saqepunan kanqa. Chaymi Jesusqa chayta entiendechinanpaq juj ejemplota churaran. Chaywanmi rikuchiran Diospa sumaq qhawarinanta astawan maskhana kasqanta.

Niranmi: “Juj runaq chajranmi askhallataña mijuyta qoran. Jinan payqa sonqollanpi niran: ‘Kunanri, ¿imatataq ruwasaq? ¿Maymanñataq cosechaytari waqaychasaq?’, nispa. Jinallamanmi niran: ‘Kaytayá ruwasaq: Taqena wasiykunata thunispayá aswan jatunkunata ruwarusaq, chaymantaq juñumusaq llapa trigoyta llapa kaqniykunatawan, jinaspa sonqoyta nisaq: “Sonqolláy, askha watakunapaqmi imaymanaykikuna waqaychasqa kashan. Kunanqa ama llakikuspalla samakuy, mijukuy, ujakuy, kusikuy ima”’, nispa. Diosmi ichaqa payta niran: ‘Yau mana yuyayniyoq runa, kunan tutan wañunki. ¿Pipaqtaq kunanri chay taqesqaykikuna kanqa?’, nispa. Chhaynapin tarikunqa pipas payllapaq qhapaq kayta juñunqa, manataq Diospaqchu qhapaq kanqa chayqa”, nispa (Lucas 12:16-21).

Jesuspa discipulonkunapas lliu uyariqninkunapas mana reparayllan urmankuman karan qolqe sonqo kayman, otaq kay kausaypi imaymana llakikuykunarayku manaña Jehová Diosta servinkumanchu karan. Chayta yachaspan Jesusqa wajmanta yachachiran wata kuskan ñaupaqtaña juj orqopi yachachisqanta.

 Niranmi: “Amaña vidaykichismantaqa llakipakuychischu imatachus mijunaykichismanta, imawanchus p’achakunaykichismantapas. [...] Qhawariychis alton phawaq animalkunata. Chaykunaqa manan tarpunkuchu ni cosechankupaschu, manan taqenkupas ni despensankupas kanchu, chaywanpas Diosmi mijuchin. ¿Manachu qankunaqa chay animalkunamantapas aswantaraq valenkichis? [...] Qhawariychis lirio t’ikakunaq wiñasqanta, chay t’ikakunaqa manan llank’ankuchu ni puskankupaschu. Chaywanpas niykichismi: Salomonpas ancha qhapaqña kashaspapas manan chay jujnin t’ika jinallapas p’achakuranchu. [...] Chayrayku amaña llakipakuychischu imatachus mijunaykichismanta imatachus ujanaykichismantapas, amataq imamantapas manchan-manchanqa kaychischu. [...] Janaq pacha Yayaykichisqa yachanmi tukuy chaykuna necesitasqaykichista. Chayrayku, maskhashallaychis paypa gobiernonta, jinan llapa chaykunaqa qankunaman qosqa kanqa”, nispa (Lucas 12:22-31; Mateo 6:25-33).

¿Pikunan Diospa gobiernonta maskhananku karan? Diosta serviq juj “pisi t’aqa” runakunan. Chaymantañan yachakuran chay t’aqapi 144.000 runakuna kananta. Paykunamantan Jesusqa niran: “Yayaykichismi qankunamanqa gobiernonta qosunkichis”, nispa. Paykunaqa ‘janaq pachapin mana tukukuq qhapaq kaykunata juñunanku’ karan, janaq pachapin Cristowanpas kamachinanku karan (Lucas 12:32-34).