Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 78 CAPÍTULO

¡Listo kashay, junt’aq mayordomo!

¡Listo kashay, junt’aq mayordomo!

LUCAS 12:35-59

  • JUNT’AQ MAYORDOMOQA LISTON KASHANAN

  • JESUSQA T’AQANACHIQMI JAMURAN

Jesusmi willaran “pisi t’aqa” runakunalla janaq pacha gobiernoman jaykunankuta (Lucas 12:32). Chay gobiernoman jaykuytaqa ancha allinpaqmi Jesuspa discipulonkunaqa qhawarinanku karan. Chaymi payqa allinta entiendechiran imatas paykuna ruwananku karan chayta.

Ñaupaqtan kallpacharan paypa kutimunanta rijch’asqalla suyanankupaq, chaymi niran: “P’achasqallaña listo kashaychis, mecheroykichispas jap’ichisqallaña kashachun, casarakuy fiestamanta patronninpa kutimunanta suyashaq kamachikuna jinataq kaychispas, chhaynapi chayamuspa punkuta takamuqtin jina kichanaykichispaq. Chay kamachikunaqa kusisqan kanqaku patronnin chayamuspa rijch’ashaqllata tariqtinqa”, nispa (Lucas 12:35-37).

Jinaspa niran: “Tutatapas, kuska tuta pasaytapas [patrón] chayamuspa chhayna rijch’ashaqllata tariqtinqa kusisqan chay kamachikunaqa kanqaku”, nispa (Lucas 12:38). Jesuspa discipulonkunaqa allintachá entienderanku chay kamachikuna jina rijch’asqalla patronpa kutimunanta suyananku kasqanta.

Jesusqa manan allin llank’aq kanallankupaqchu discipulonkunataqa kallpachasharan, aswanpas jamuq tiempopi paypa kutimunanta listo suyanankupaqmi kallpachasharan, chaytan astawanqa nisharan “pisi t’aqa ovejakuna” ukhupi kaqkunata. Chaymi niran: “Qankunapas rijch’ashaqlla kashaychis, mana piensasqaykichis horatan runaq Churinqa jamunqa”, nispa (Lucas 12:40).

Jinan Pedroqa niran: “Señor, ¿noqallaykupaqchu kay ejemplota churashanki, icha llapapaqchu?”, nispa. Jesustaq niran: “¿Pipunitaq kanman allin yuyayniyoq junt’aq mayordomori? Paytan patronninqa churanqa kamachinkunaman necesitasqanku mijunata tiempollanpi qonanpaq. Chay kamachiqa kusisqan kanqa patronnin kutimuspa chhayna ruwashaqta tariqtinqa. Cheqaqtan niykichis: Paytan patronqa llapa kaqninkuna qhawaqta churanqa”, nispa (Lucas 12:41-44).

Chay ejemplo churasqanpi ‘patronqa’ Jesustan representaran, chay ‘allin yuyayniyoq junt’aq mayordomotaq’ janaq pachapaq ajllasqa ‘pisi t’aqa ovejakunamanta’ wakin iñiqkunata representaran (Lucas 12:32). Paykunan patronpa kutimusqan tiempopi paypa ‘kamachinkunaman necesitasqanku mijunata tiempollanpi qonanku karan’. Chay tiempopiqa allin organizasqan kanan karan imaynatachus Jesuspa discipulonkunaman espiritual mijuna chayanan karan chay. Chaytan Jesusqa chay ejemplowan entiendechiyta munaran.

Chaymantan payqa chay ejemplo churasqanta astawan mast’ariran, chhaynapin discipulonkunata astawan entiendechiran rijch’asqalla kananku kasqanta, sonqonkutapas allinta cuidananku kasqanta. Niranmi: “Ichaqa chay kamachichus sonqonpi ninman: ‘Patronniyqa jayk’aqraqchá kutimunqa’, nispa, jinaspa qhari kamachikunata warmi kamachikunatawan maqayta qallarinman, jinallataq mijunman, ujanman, machanmanpas chayqa, patronninmi jamunqa mana suyasqan p’unchayta mana yachasqan horata, jinaspa sinchita castiganqa, mana iñiqkunawan kuskatataq churanqapas”, nispa (Lucas 12:45, 46).

Chaymantan Jesusqa niran: “Noqaqa kay pachapi ninata jap’ichiqmi jamurani”, nispa. Chaywanmi payqa nisharan imachus yachachisqanwanqa runakuna imaymanata rimanankuta, rimayninkupi mana tupachinankuta, pantasqa yachachikuykunatapas yanqayachinan kasqanta. Chhaynapin wakin runakunaqa t’aqanasqa  kananku karan. Chaymi Jesusqa niran: “Taytan jatarinqa churin contra, churitaq taytan contra, mamataq ususin contra, ususitaq maman contra, suegrataq qhachunin contra, qhachuntaq suegran contra”, nispa (Lucas 12:49, 53).

Tukuy chaykunatan Jesusqa discipulonkunaman niran. Chaymantan runakunaman kutirispa niran: “Inti jaykuy ladomanta phuyu lloqsimuqta rikuspaykichismi qankunaqa: ‘Sinchi wayrantinmi paramunqa’, ninkichispacha, chhaynapunitaqmi kanpas. Uray ladomanta wayramuqtintaq: ‘Nishutan ruphamunqa’, ninkichis, chhaynapunitaqmi kanpas. ¡Iskay uyakuna! Cielota qhawarispan qankunaqa yachankichis imaynachus tiempo kanqa chayta. Chhaynaqa, ¿imaynapitaq manari reparankichischu kay tiempopi imakunachus pasashasqanta?”, nispa (Lucas 12:54-56). Chaytaqa niran askha runakuna pay Mesías kasqanpi manapuni iñiyta munasqankuraykun.