Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 97 CAPÍTULO

Uvas chajrapi llank’aqkunamanta

Uvas chajrapi llank’aqkunamanta

MATEO 20:1-16

  • “QHEPAPI” KAQKUNAN “ÑAUPAQPI” KANQAKU

Perea ladopin Jesusqa niran: “Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku”, nispa (Mateo 19:30). Chayta astawan entiendechinanpaqmi juj ejemplota willaran.

Niranmi: “Janaq pacha gobiernoqa uvas chajrayoq runamanmi rijch’akun, chay runan tutallamanta lloqsiran chajranpi llank’achinanpaq runakunata contrataq. Llank’apakuqkunata tarispataq paykunawan rimanakuran juj p’unchaymanta juj denario qolqeta pagapunanpaq, jinaspa uvas chajranman kacharan. Las nueveta jina wajmanta lloqsispan mercado plazapi rikullarantaq qasi sayashaq runakunata. Jinan paykunata niran: ‘Qankunapas uvas chajrayman llank’aq riychis, iman paganatan pagapusaykichis’, nispa. Chaymi paykunaqa riranku. Chajrayoqmi lloqsillarantaq las doceta jina, chaymantataq tardenta las tresta jina, chaypipas kaqllatataqmi ruwaran. Las cincota jinaña lloqsispan chajrayoqqa tarillarantaq qasi sayashaq runakunata, jinan paykunatapas niran: ‘¿Imanaqtinmi kaypi ch’isiyaq sayashankichis mana imata ruwaspa?’, nispa. Chaymi paykunaqa niranku: ‘Manan pipas contratawankuchu’, nispa. Jinan chajrayoqqa niran: ‘Chhaynaqa, qankunapas uvas chajrayman llank’aq riychis’”, nispa (Mateo 20:1-7).

Bibliapiqa Jehová Diostan uvas chajrayoqwan comparakun, Israel llaqtatataq uvas chajrawan comparakun. Chhaynaqa Jesús uvas chajrayoq runamanta rimaqtinqa Jehová Diospichá uyariqninkunaqa piensaranku (Salmo 80:8, 9; Isaías 5:3, 4). Chaymantapas Jesusqa uvas chajrapi llank’aqkunawanmi Israel runakunata comparasharan, chaywanmi rikuchisharan imachus chay tiempopi pasasharan chayta.

Fariseokunapas juj umallikunapas tukuy tiempon Diosta serviypi llank’ashananku karan. Paykunatan Jesús comparasharan uvas chajrapi ch’isiyaq llank’asqankumanta junt’asqata pagonkuta suyaq llank’apakuqkunawan.

Sacerdotekunapas juj umallikunapas pisillata Diosta serviq runakunata jinan común runakunataqa qhawariqku. Chaymi Jesusqa chay común runakunata compararan las nuevemanta, las docemanta, tardenpi las tresmanta, las cincomanta ima llank’apakuqkunawan.

Umalli runakunapaqqa Jesusta qatikuq runakunaqa ‘ñakasqan karanku’ (Juan 7:49). Jesusta qatikuqkunaqa común llank’anallayoqmi karanku, 29 watapiñan Jehová Diosqa ‘uvas chajrayoq runa’ jina paykunata Jesuswan wajachimuran paypaq llank’anankupaq. Paykunan karanku “qhepapi kaqkuna” otaq las cincollata chajraman jamuqkuna jina.

Chay ejemplo churasqanpin Jesusqa nillarantaq: “Ch’isinyashaqtintaq uvas chajrayoqqa llank’achiq encargadota niran: ‘Llank’aqkunata wajamuspa pagapuy, qhepa chayamuqkunamanta qallarispan ñaupaq chayamuqkunapi tukunki’, nispa. Las cincota jina llank’ayta qallariqkunan jamuspanku juj denario qolqeta sapankanku chaskiranku. Chaymi ch’isiyaq llank’aqkunaqa masta chaskinankupaq piensasharanku, ichaqa paykunapas juj denario qolqetan chaskillarankutaq. Chayta chaskikuspan paykunaqa chajrayoqmanta rimapakuyta qallariranku, jinaspa payta niranku: ‘Kay qhepa chayamuqkunaqa juj horallamá llank’anku, noqaykun ichaqa ruphaypa chayasqan sayk’usqallaña ch’isiyaq llank’aykuyku, ¿chaychu paykunamanqa noqaykuman jinallataq pagapushanki?’, nispa. Chajrayoqtaq paykunamanta jujninta niran: ‘Amigo, noqaqa manan ima mana allintachu ruwashayki. ¿Manachu rimaranchis juj denario  qolqeta pagapunaypaq? Pagoykita aparikuspa ripuy [...]. ¿Manachu qolqeywanqa ima munasqaytapas ruwayman? Icha, ¿envidiakushankichu paykunapaq allin kaqta ruwapusqaymanta?’, nispa. Chhaynallataqmi qhepapi kaqkunaqa ñaupaqpi kanqaku, ñaupaqpi kaqkunataq qhepapi kanqaku”, nispa (Mateo 20:8-16).

Jesuspa discipulonkunaqa tapukusharankuchá: “¿Imaynapitaq umalli runakunari “qhepapi” kankuman? ¿Imaynapitaq noqanchisri “ñaupaqpi” kasunman?”, nispa.

Paykunaqa “qhepapi kaqkuna” jinaña rikusqa karanku chaypas, “ñaupaqpin” kananku karan. Jesuspa wañusqanwanmi Israel nacionqa wijch’usqa kanan karan, chaymantan ichaqa juj mosoq llaqtata Dios ajllanan karan, chaytan nikun ‘Diospa Israel llaqtan’ nispa (Gálatas 6:16; Mateo 23:38). Chay mosoq llaqtapi kaqkunan santo espirituwan bautizasqa kananku karan, bautizaq Juan nisqanman jina. Paykunan “ñaupaqpi” kananku karan, chhayna bautizasqa kanankupaq, Jesusmantapas “kay pachaq k’uchunkunakamaraq” willanankupaqwan (Hechos 1:5, 8; Mateo 3:11). Judío umallikunan ichaqa “qhepapi” kananku karan, chaymi Jesuspa discipulonkunata sinchita cheqnikunanku karan.