Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 87 CAPÍTULO

Allin yachaywanmi imatapas ruwana

Allin yachaywanmi imatapas ruwana

LUCAS 16:1-13

  • MANA ALLIN MAYORDOMOMANTA JESÚS WILLAN

  • QHAPAQ KAYKUNAWAN YANAPACHIKUSPAN ‘AMIGOKUNATA RUWANA’

Chinkasqa churimanta willaspan Jesusqa allinta rikuchiran juchankumanta kutirikuqkunataqa maytapuni Dios khuyapayasqanta. Anchatachá chaywanqa fariseokuna, kamachikuy simita yachachiqkuna, impuesto cobraqkunapas admirakuranku (Lucas 15:1-7, 11). Chaymantan Jesusqa discipulonkunapaq juj ejemplota churaran, chaypin willaran patronninta mana allinta serviq mayordomomanta.

Paytan patronninqa niran: ‘Qanmantan mana allin rimayta uyarishani, chaymi manaña wasiypi kaqniykunata qhawankiñachu’, nispa. Jinan mayordomoqa sonqonpi niran: “Kunanri, ¿imatataq ruwasaq patronniy mayordomo kayniymanta wijch’upuwaqtinri? Manamá riki kallpaypas kanñachu chajrapi llank’anallaypaqpas, p’enqaymá limosna mañapakuypas. ¡Ah! Yachaniña imachus ruwanayta, chhaynapi mayordomo kayniymanta wijch’usqa kaqtiy pillapas wasinpi chaskiwananpaq”, nispa. Jinan payqa patronninman manu kaqkunata wajaspa tapuran jayk’atachus debesharanku chayta (Lucas 16:3-5).

Jujninmi niran: “Pachaj barril oliva aceiten manu kashani”, nispa. Chayqa karan 580 jina galonkunan. Chay manukuqqa aceite vendeqpaschá karan, otaq olivo chajrayoqpaschá karan. Paytan chay mayordomoqa niran: ‘Manukusqaykimanta kay qelqata jap’iy, jinaspa pisqa chunka barril-llataña qelqay’, nispa. Chhaynaqa 290 galonllamantañan paganan karan (Lucas 16:6).

Jujnin manukuqtaq niran: “Pachaj carga trigon manu kashani”, nispa. Jinan mayordomoqa paytapas niran: “Manukusqaykimanta kay qelqata jap’iy, jinaspa pusaq chunkallataña qelqay”, nispa (Lucas 16:7).

Chay mayordomoqa manaraqtaq qarqosqachu kasharan chayqa, atiranraqmi chay manukuqkunaq manunta pisiyachiyta. Chayta ruwaspan payqa chay manukuqkunawan amigota ruwasharan, chhaynapi qarqosqa kaqtin yanapanankupaq.

Chay mayordomoqa patronninpa kaqnintaña gastasharan chaypas, allin yachaywanmi chaytaqa ruwaran. Chayta yachaspan patronninqa anchata admirakuran. Chaymantan Jesusqa niran: “Kay pacha runakunaqa k’anchaypi puriq runakunamantaqa aswan yachaysapan kanku jujkunapaq imatapas ruwaspankuqa”, nispa (Lucas 16:8).

Jesusqa manan chay mana allin mayordomo jina kanankupaqchu uyariqninkunata kallpachasharan. Aswanmi payqa ‘k’anchaypi puriqkunata’, arí, Diosta serviqkunata kallpachasharan jamuq tiempopi piensaspa allin yuyaywan qhapaq kayninkunata utilizanankupaq, chaymi niran: “Mana allin qhapaq kaykunawan amigokunata ruwaychis, chhaynapin paykuna wiñay  tiyana cheqaskunapi chaskisunkichis chay qhapaq kaykuna tukukapuqtin”, nispa (Lucas 16:9).

Jehová Dioslla, Churin Jesusllapiwanmi pitapas ‘wiñay tiyana cheqaskunaman’ otaq kay pachapi paraisomanpas jaykuchinkuman. Chayraykun paykunawan amigota ruwananchis, chaymi qolqenchiswan otaq ima kaqninchiswanpas Diospa gobiernonta yanapakunanchis, chhaynapin paykunaqa sumaqta chaskiwasun qhapaq kaykuna chinkapuqtin.

Sichus ima kaqninchistapas Diosta servinapaq utilizasunchis chayqa, allintan junt’asunchis Diospa gobiernonpaq imaymana ruwananchiskunatapas. Chaymi Jesusqa niran: “Manachus junt’aq kankichis mana allin qhapaq kaykunawan chayqa, ¿piñataq confiasunkichisman cheqaq qhapaq kaykunatari?”, nispa (Lucas 16:11).

Chaywanmi payqa discipulonkunaman rikuchisharan chay ‘wiñay tiyana cheqaskunaman’ jaykunankupaqqa tukuy atisqankuta ruwananku kasqanta. Paykunaqa manan Diostawan qhapaq kaykunatawanqa servinankuchu karan, chaymi Jesusqa niran: “Manan pi kamachipas iskay patrontaqa serviyta atinmanchu, mana chayqa, jujnintan cheqnikunman jujnintataq munakunman, jujninmanmi k’askakunman jujnintataq pisichanman. Manan atiwaqchischu Diostawan qhapaq kaykunatawan serviytaqa”, nispa (Lucas 16:9, 13).