Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 84 CAPÍTULO

Jesuspa discipulon kayqa manan facilchu

Jesuspa discipulon kayqa manan facilchu

LUCAS 14:25-35

  • JESUSPA DISCIPULON KANAPAQQA ANCHATAN KALLPACHAKUNA

Juj fariseoq wasinpi yachachisqan qhepamanmi Jesusqa Jerusalenman puririran, askha runakunataqmi paytaqa qatikuranku. Chay runakuna ¿cheqaqtapunichu Jesuspa discipulon kayta munaranku? ¿Listochu kasharanku payrayku imatapas ruwanankupaq?

Wakinqa manan listochu kasharanku, chaymi Jesusqa niran: “Pipas noqaman jamuqqa cheqnikunanmi taytanta, mamanta, esposanta, wawankunata, wayqenkunata, panankunata, pay kikintawanpas, mana chayqa manan atinmanchu discipuloy kayta”, nispa (Lucas 14:26).

Jesusqa manan familiakunata cheqnikunapaqchu chaytaqa nisharan, aswanmi chaywan nisharan paymantaqa aswan pisita paykunata munakunata, imaynan Jacobpas esposan Leata aswan pisita munakuran Raquel esposanmanta chhaynata (Génesis 29:31). Jesuspa discipulonkunaqa manan casarakusqanrayku juj importante mijuyman mana riq runa jinachu kananku karan (Lucas 14:20).

Chaymantapas paykunaqa paykuna kikinkumantaqa astawanmi Jesusta munakunanku karan, liston kashananku karan Jesusrayku wañunankupaqpas. Chhaynaqa Jesuspa discipulon kayqa manan facilchu kanan karan, chaymi lliu runakuna allinta chaypi piensananku karan.

Chaymantapas Jesuspa discipulonkunaqa qatikachasqa, runakunaq p’enqachisqan, enemigonkunaq wañuchisqan iman kananku karan. Chayraykun paykunaqa listo kashananku karan Jesús jina imatapas aguantanankupaq, chaymi Jesusqa niran: “Pipas discipuloy kayta munaqqa, ñak’arina k’aspinta apariykuspa qhepayta jamuchun”, nispa (Lucas 14:27).

Jesusta qatikuq runakunaqa allintan piensananku karan paypa discipulon kanankupaq imakunatachus ruwananku karan chaypi. Chaymi Jesusqa niran: “Pipas juj torreta sayarichiyta munaqqa, ¿manachu tiyaykuspa ñaupaqtaraq qolqenta tanteakun torreta tukunanpaq aypanqachus manachus chayta? Mana chayqa, cimientota churaykuspallapaschá sayarapunman, manataq tukuyta atinmanchu”, nispa (Lucas 14:28, 29). Chhaynaqa chay runakunaqa allintan decidikunanku karan wiñaypaq Jesuspa discipulon kanankupaq. Chaymi Jesusqa juj ejemplotawan churaran.

Niranmi: “Juj reypas juj reywan guerraman rinan kashaqtinqa, ¿manachu ñaupaqtaraq tiyaykuspa yuyaychaqninkunata tapurikun atinmanchus chunka waranqa soldadokunallawan iskay chunka waranqa soldadokuna atipayta icha manachus chayta? Manachus atinman chayqa, contranpi jamuq rey karupiraq kashaqtinmi payqa juj comisionta kachanman allipunakapunankupaq. Chayraykun niykichis: Mayqenniykichispas kaqninkunata mana saqeqqa manan atinmanchu discipuloy kaytaqa”, nispa (Lucas 14:31-33).

 Jesuspa chay nisqankunaqa manan chay tiempopi kaqkunallapaqchu karan, qhepaman llapan paypa discipulon kayta munaqkunapaqwanmi karan. Paykunapas liston kashananku karan Jesusrayku ima kaqninkutapas, hasta vidankutapas qonankupaq. Chaymi Diosmanta mañakuspa allinta chaykunapi piensananku karan.

Chaymantan Jesusqa kachimanta rimaran. Chaymantaqa ñan orqopi yachachishaspa rimaranña “kay pachapaq kachi kankichis” nispa (Mateo 5:13). Jesuspa discipulonkunaqa runakunatan yanapananku karan vidankupas Dios serviyninkupas ama ismusqa mijuy jina kananpaq, chaymi paykunataqa kachiwan tupanachiran. Kay kutipin ichaqa niran: “Kachiqa ancha allinpunin; kachitaqchus q’aymayapunman chayqa, ¿imaynatan wajmanta kachiman tukunman?”, nispa (Lucas 14:34). Chay tiempopi kachiqa allpawan chaqrusqan karan, chaymi chay kachi q’aymayapuspaqa manaña valepuqchu.

Chhaynaqa Jesuspa discipulonkunaqa unayña paywan kasharanku chaypas, cuidakunankun karan ama qhepaman kutipunankupaq. Mana chayqa, q’aymayapuq kachi jinan kapunkuman karan, chhaynapitaq manaña Diospaq jinañachu kankuman karan, p’enqaymanraqmi paytapas churankuman karan. Diosta mana serviq runakunapas asipayankumanmi karan paykunataqa. Chaymi Jesusqa niran: “Uyarinanpaq ninriyoqqa uyarichun”, nispa (Lucas 14:35).