Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 63 CAPÍTULO

Jesús willan importante yachachikuykunata

Jesús willan importante yachachikuykunata

MATEO 18:6-20 MARCOS 9:38-50 LUCAS 9:49, 50

  • JESÚS RIMAN AMA PITAPAS URMACHINAMANTA

  • ¿IMATAN RUWANA PIPAS CONTRANCHISPI JUCHALLIKUQTIN?

Chayllaraqmi Jesusqa discipulonkunata yachachiran erqechakuna jina k’umuykukuq kanankupaq. Paykunaqa chhayna kaqkunatan Jesuspa sutinpi chaskinanku karan, chhaynapi Jesustawan chaskinankupaq (Mateo 18:5).

Chayllaraqtaq paykuna discutiranku pichus uma kanankumanta chayqa, anyasqa jinachá qhawarikuranku Jesuspa chay nisqanwanqa. Chaymantan Juan Jesusta niran: “Juj runatan rikumuyku sutiykipi supaykunata qarqoshaqta, chaymi payta jark’arayku mana noqanchiswanchu purisqanrayku”, nispa (Lucas 9:49).

Juanqa apostolkunalla milagrokunata ruwanankupaqmi piensashanman karan. Chaymantapas manataq chay judío runa paykunawan kuskachu puriq chayqa, Juanqa piensasharanchá: “Manan chay runaqa supaykunata qarqoshananchu”, nispa.

Jesusmi ichaqa niran: “Aman paytaqa jark’ankichischu, manan pipas sutiypi ima milagrotapas ruwaqqa chay qhepallaman contraypi mana allinta rimanmanchu, pipas mana contranchispichu kaqqa noqanchiswanmi kashan. Pipas Cristoq kasqaykichisrayku juj vaso unuta jaywarisunkichis chayqa, manapunin premiontaqa chinkachinqachu”, nispa (Marcos 9:39-41).

Chay tiempopaqqa manaraqmi karanchu Cristota qatikuq iñiq t’aqakuna. Chaymi chay runaqa mana Jesuswan kuskaraqchu purinan karan paypa discipulon kananpaqqa. Payqa manan Jesuspa contranpichu kasharan, manataqmi waj religiontachu qallarichisharan. Chaymantapas payqa Jesuspi iñiqpunin kanman karan, chaychá Jesusqa niran “manapunin premiontaqa chinkachinqachu”, nispa.

Chaymantapas jatun juchan kanman karan sichus apostolkuna chay runata iñiyninpi urmachinkuman karan chayqa. Chaymi Jesusqa niran: “Pitaqchus noqapi iñiq kay juch’uykunamanta jujninta urmachinman chayqa, aswan allinmi paypaqqa kanman asnoq muyuchisqan molino rumita kunkanman warkuruspa lamar-qocha ukhuman wijch’uykusqa kaynin”, nispa (Marcos 9:42). Jinaspa niran: ‘Makiykichus, icha imaykichus juchaman urmachisunkiman chayqa, wit’urukuy; aswan allinmi qanpaqqa kanman ch’ulla makillayoq kausayman jaykuy iskay makintin Gehenaman rinaykimantaqa’, nispa. Chay “Gehena” nisqaqa Jerusalén llaqtaq cantonpi q’opa kananan karan. Chhaynaqa allintachá apostolkunaqa entienderanku Jesús wiñaypaq wañuymanta rimashasqanta.

Jesusqa nillarantaqmi: ‘Amapunin kay juch’uykunamantaqa mayqentapas pisichankichischu, paykunata cuidaq angelkunaqa qhawashallankun Yayaypa uyanta’, nispa. Jinaspa chay ‘juch’uykuna’ Diospaq ancha importante kasqankuta rikuchinanpaq 100 ovejayoq runamanta rimaran. Jujnin oveja chinkaqtinsi chay  runaqa 99 ovejankunata saqespa chay chinkasqata maskhaq rin, tarispataqsi anchata kusikun. Chaymi Jesusqa niran: ‘Chhaynallataqmi Yayaypas manapuni munanchu kay juch’uykunamanta jujnillanpas chinkananta’, nispa (Mateo 18:10, 14).

Chaymantan Jesusqa niran: “Qankuna kikiykichispi kachiyoq kaychis, jujkuna-jujkunawantaq sumaqta kausaychis”, nispa (Marcos 9:50). Chaytaqa ninman karan apostolninkunaq discutisqankuta yuyarisqanraykun. Imaynan kachiqa mijunata sumaqyachin, chhaynatan discipulokunaq sumaq rimasqankupas paykunata yanapanan karan sumaqta kausanankupaq (Colosenses 4:6).

Chaymantan Jesusqa problemakuna imayna allichanamanta niran: “Wayqeykichus qan contra juchallikun chayqa, rispa sapallanpi reparachimuy chay juchanta. Uyarisunki chayqa, allin ñanmanmi payta kutichimpunki. Manachus uyarisunki chayqa, pusarikuy juj testigota otaq iskaytapas, chhaynapi iskay otaq kinsa testigokunaq siminmanta tukuy imapas allinta yachakunanpaq. Paykunatapas mana uyariqtinqa iñiq t’aqaman willay. Manallataq iñiq t’aqatapas uyarinqachu chayqa, waj nacionmanta runa jina, impuesto cobraq runa jina qanpaq kachun”, nispa (Mateo 18:15-17). Jesusqa “iñiq t’aqaman willay” nispaqa umalliqkunaman willanamantan rimasharan. Paykunatapas mana uyarikuqtinqa qarqokunanmi karan chay juchallikuqta.

Cristota qatikuq iñiq t’aqakuna kaqtinmi umalliqkunaqa Diospa siminman jina imatapas decidinanku karan. Chaypachan paykuna pitapas juchayoqta tariqtinkuqa ‘janaq pachapipas imatapas watakushanman’ jina kanan karan. Pitachus mana juchayoqta tariqtinkutaq janaq pachapipas imatapas ‘paskakushanman jina kanan karan’. Chaykunata decidinankupaq juñunakuqtinkun junt’akunan karan: “Maypichus iskaypas kinsapas sutiypi juñunakushanku chaypin noqaqa chaupinkupi kashani”, nispa Jesuspa nisqan (Mateo 18:18-20).