Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 31 CAPÍTULO

Trigota p’itispa sábado p’unchaypi mijunku

Trigota p’itispa sábado p’unchaypi mijunku

MATEO 12:1-8 MARCOS 2:23-28 LUCAS 6:1-5

  • JESUSPA DISCIPULONKUNA SABADOPI TRIGOTA P’ITINKU

  • JESUSQA ‘SÁBADO P’UNCHAYPA SEÑORNINMI’

Jesusmi discipulonkunapiwan Galileata ripusharanku. Sábado p’unchaypi chajra-chajranta purishaqtinkutaq discipulonkunaqa yarqaymanta trigo umata p’itispa mijuyta qallariranku, fariseokunataq chay ruwasqankuta rikusharanku.

Jinan Jesusta niranku: “¡Qhawariy! Discipuloykikunan sábado p’unchaypi mana ruwanata ruwashanku”, nispa (Mateo 12:2). Yachasqanchis jina, chay ñaupaqllatan wakin judiokuna Jesusta wañuchiyta munaranku sábado p’unchaypi milagro ruwasqanmanta.

Fariseokunapaqqa cosechapi llank’ay jinan karan Jesuspa discipulonkunaq chay ruwasqanqa (Éxodo 34:21). Paykunaqa sasa junt’anamanmi sábado p’unchayta tukuchipusqaku, Jehová Diosmi ichaqa munaran chay p’unchay kusikunapaq kananta, payman astawan achhuykunapaqpas sumaq p’unchay kananta. Chayta entiendechinanpaqmi Jesusqa wakin ejemplokunata churaran.

Ñaupaqtan payqa willaran David runankunapiwan imatachus ruwasqankumanta. Davidqa runankunapiwan yarqasqa kashaspankun Diospa wasinman jaykuranku, chaypitaq Diosman jaywasqa t’antata chaskikuspa mijuranku. Chay t’antaqa sacerdotekunallapaqmi karan, chaywanpas manan Davidtapas ni runankunatapas juchachakuranchu chay t’anta mijusqankumanta (Levítico 24:5-9; 1 Samuel 21:1-6).

Jesusqa nillarantaqmi: “¿Manachu kamachikuy simipipas leerankichis sacerdotekunaqa sábado p’unchaypi templopi llank’ashaspapas  mana juchayoq kasqankumanta?”, nispa. Arí, sacerdotekunaqa sabadopipas llank’arankun templopi imaymanata ruwaspa. Chaymi Jesusqa fariseokunata niran: “Templomantapas aswan allin kaqqa kaypin kashan”, nispa (Mateo 12:5, 6; Números 28:9).

Jesusqa nillarantaqmi: “Diosmi niran: ‘Khuyapayakuq kanaykichistan munani, manan sacrificiokuna jaywawanaykichistachu’, nispa; chayta entiendewaqchis karan chayqa, manachá juchachawaqchischu karan mana juchayoqkunataqa”, nispa. Jinaspataq niran: Runaq Churinqa sábado p’unchaypa Señorninmi”, nispa. Chaypiqa waranqa wata kamachikamunanmantan rimasharan (Mateo 12:7, 8; Oseas 6:6).

Cristo kamachimuqtinqa manañan kay Saqraq munaychakusqan pachapi jinachu imaymanakunawan ñak’arisunchis, chay tiempopiqa lliumi samarisunchis, kusisqataqmi kasunchispas.