Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 58 CAPÍTULO

T’antata askhayachin, levaduramantawan riman

T’antata askhayachin, levaduramantawan riman

MATEO 15:32-16:12 MARCOS 8:1-21

  • JESÚS 4.000 QHARIKUNAMAN MIJUCHIN

  • JESÚS RIMAN FARISEOKUNAQ LEVADURANMANTA

Decápolis ladopi Jesús kashaqtinmi ancha askha runakuna jamuranku payta uyarinankupaq, onqoyninkumanta qhaliyachisqa kanankupaqwan. Paykunaqa jatun canastakunapi mijuna apaykusqan jamuranku.

Chaymantan Jesusqa discipulonkunata niran: “Khuyapayanin kay runakunata, paykunaqa kinsa p’unchayñan noqawan kashanku, manataqmi imapas mijunankupaq kanchu. Mana mijusqatachus wasinkuman kachapusaq chayqa, ñanpichá pisipapunkuman, wakinqa karu llaqtamantaraqmi kankupas”, nispa. Discipulonkunataq niranku: “¿Maypitaq kay ch’inneqpiri khaytukuy runakunata sajsachinapaq t’antata tarimuykuman?”, nispa (Marcos 8:2-4).

Jinan Jesusqa paykunata niran: “¿Jayk’a t’antaykichismi kashan?”, nispa. Paykunataq niranku: “Qanchisllan kashan iskay kinsa challwachakunallapiwan”, nispa (Mateo 15:34). Jinan Jesusqa runakunata kamachiran pampapi tiyaykunankupaq. T’antata challwakunatawan jap’ispataq Diosman graciasta qoran, jinaspa discipulonkunaman qoran runakunaman rakinankupaq. Jinan llapanku sajsanankukama mijuranku. Puchuq t’antatataq qanchis jatun canastakunapi juñuranku. Chay kutipiqa 4.000 qharikunan mijuranku, warmikunawan wawakunawanqa manan yupasqachu karan.

Chaymantan Jesusqa runakunata kachapuran, jinaspa discipulonkunawan botepi chimparanku “Magadán” nisqa ladoman. Chaypin fariseokuna wakin saduceokunapiwan Jesusta niranku cielomanta juj señalta ruwananpaq.

Jinan Jesusqa niran: “Ch’isinyashaqtin cielo nina puka kaqtinmi qankunaqa ninkichis: ‘Allin tiempon kanqa’, nispa; tutamanta yana phuyu kaqtintaq ninkichis: ‘Kunanqa paranqan, chirinqan’, nispa. Chhaynatan qankunaqa cielota qhawarispa reparankichis imaynachus tiempo kanqa chayta. Chhaynaqa, ¿imaynapitaq mana atinkichischu kay tiempopi imakunachus pasasqanta reparaytari?”, nispa (Mateo 16:2, 3). Jinaspa niran: ‘Jonaswan imachus pasasqallanmi qankunapaqqa señal kanqa’, nispa.

Chaymantan Jesusqa discipulonkunapiwan Betsaida llaqtaman botepi riranku. Discipulonkunaqa qonqapusqakun t’anta apayta, juj t’antallankun kashasqa. Chayllamanmi Jesusqa señalta mañakuq fariseokunata, Herodesta yanapaq saduceokunatawan yuyarispa discipulonkunata niran: “Cuidakuychis fariseokunaq levaduranmanta Herodespa levaduranmantawan”, nispa. Chaymi paykunaqa ninakuranku: “T’antata mana apamusqanchisraykuchá chaytaqa niwashanchis”, nispa. Jinan Jesusqa paykunata niran: “¿Imaraykun tumpanakushankichis t’antata mana apamusqaykichismanta?”, nispa (Marcos 8:15-17).

Jinaspa niran: “¿Manachu yuyarinkichis pisqa t’antata pisqa waranqa qharikunapaq askhayachisqayta?  ¿Jayk’a canasta junt’atan t’anta phasmikunata juñurankichis?”, nispa. Paykunataq: “Chunka iskayniyoq canastatan”, niranku. Jesusqa nillarantaqmi: “Qanchis t’antata tawa waranqa qharikunapaq askhayachiqtiy, ¿jayk’a jatun canasta junt’atan t’anta phasmikunata juñurankichis?”, nispa. Paykunataq: “Qanchis canastatan”, niranku (Marcos 8:18-20).

Jinan Jesusqa niran: “Noqaqa manamá t’antamantachu rimasharani, ¿imaynapitaq chaytari mana repararankichischu? Aswanpas rimasharani fariseokunaq saduceokunaq levaduranmanta cuidakunaykichispaqmi”, nispa (Mateo 16:11).

Chayta niqtinñan paykunaqa entienderanku “fariseokunaq saduceokunaq yachachiyninmanta cuidakunankupaq rimashasqanta”. Imaynan levadurapas masata poqochin, chhaynatan chay umallikunaq yachachiyninpas runakunata pantachiq (Mateo 16:12).