Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 60 CAPÍTULO

Jesuspa rijch’aynin jujnirayman tukun

Jesuspa rijch’aynin jujnirayman tukun

MATEO 16:28-17:13 MARCOS 9:1-13 LUCAS 9:27-36

  • JESUSPA RIJCH’AYNIN JUJNIRAYMAN TUKUN

  • APOSTOLKUNA DIOSPA KUNKANTA UYARINKU

“Cesarea Filipo” nisqa llaqtapin Jesusqa yachachisharan, chay llaqtaqa 25 kilometropi jinan “Hermón” nisqa orqomanta kasharan. Chaypin Jesusqa apostolninkunata niran: “Cheqaqtan niykichis: Kaypi sayashaqkunamanta wakinqa manapunin wañunqakuchu ñaupaqta runaq Churinta gobiernonpi jamushaqta rikunankukama”, nispa (Mateo 16:28).

Paykunaqa admirakurankuchá chay nisqanwan. Yaqa juj semanamanta jinataq Jesusqa Pedrota, Santiagota, Juantawan pusarikuspa juj jatun orqoman wicharan. Tutañan kanman karan, chaychá apostolkunaqa puñuy-puñuy kasharanku. Chayllamanmi Jesús mañakushaqtin paypa rijch’aynin jujnirayman tukuran, uyanmi k’anchariran inti jinaraq, p’achanpas sinchi yuraqmanmi tukuran.

Jinan rijuriypi rikukuran ‘Moisesta Eliastawan’. Paykunan Jesuswan rimayta qallariranku “Jerusalenpi kashaspa ripunanmanta” (Lucas 9:30, 31). Chay ‘ripunanqa’ karan wañuchisqanku qhepaman kausarichisqa kananmi, chaymantaqa ñan Jesuspas apostolkunaman willaranña (Mateo 16:21). Chhaynaqa manan pipas paypa wañunantaqa jark’ananchu karan, imaynan Pedropas jark’ayta munaran jinata.

Chay rijuriyta rikuspan kinsantin apostolkunaqa anchata admirakuranku. Chay rikusqanku cheqaqpuni kananpaq piensaspataq Pedroqa Jesusta niran: “Yachachikuq, noqaykupaqqa ancha allinmi kaypi kasqaykuqa. Kinsa karpakunata ruwarusaqku, jujta qanpaq, jujta Moisespaq, jujtataq Eliaspaq”, nispa (Marcos 9:5). Yaqapaschá Pedroqa chayta niran chay rikushasqanku mana ratollachu tukukunanpaq.

Pedro rimashallaqtinraqmi sinchi k’anchashaq phuyu paykunata llanthuykuran, chay ukhumantataq juj kunka nimuran: “Kaymi munakusqay Churiyqa, payqa sonqoypaq jinan, payta uyariychis”, nispa. Discipulonkunataq chayta uyarispa manchakuymanta pampakama k’umuykuranku. Jesustaq ichaqa paykunata niran: “Sayariychis, ama manchakuychischu”, nispa (Mateo 17:5-7). Sayariqtinkutaq Jesusllaña chaypi kashasqa. Paqaristin p’unchaytaq chay orqomanta uraykushaqtinku Jesusqa paykunata kamachiran: “Aman pimanpas willankichischu chay rikusqaykichistaqa runaq Churin wañusqanmanta jatarichisqa kanankama”, nispa (Mateo 17:9).

Chay rijuriypi Eliasta rikusqankuraykun apostolkunaqa Jesusta tapuranku: “¿Imaraykutaq kamachikuy simita yachachiqkunari: ‘Eliasraqmi ñaupaqtaqa jamunan’, ninku?”, nispa. Jesustaq niran: “Ñan Eliasqa jamuranña, paykunataq mana reqsirankuchu”, nispa (Mateo 17:10-12). Chayta nispaqa bautizaq Juanmantan Jesusqa rimasharan, paymi Cristopaq ñanta allicharan, imaynan Eliaspas Eliseopaq ruwaran jinata.

Chay rijuriyta rikuspaqa anchatachá Jesuswan apostolninkunapiwan kallpachakuranku. Chaypin rikukuran Diospa gobiernonpi Cristoq lliflli kayninta. Chhaynapin Jesuspa willasqanman jina wakin apostolkuna payta rikuranku “gobiernonpi jamushaqta”, ‘lliflli kayninpi’ kashaqta ima (Mateo 16:28). Chay jina señaltachá fariseokunaqa rikuyta munaranku, ichaqa manan ima señaltapas Jesusqa paykunaman rikuchinanchu karan. Jesusqa confianza apostolninkunallamanmi chaytaqa rikuchiran, chaywanmi allinta yachakuran Jesuspuni Diospa ajllasqan kasqanta. Chaymi Pedroqa qhepaman qelqaran: “Chayraykun profetizasqa simipiqa astawanraq iñinanchis”, nispa (2 Pedro 1:16-19).