Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 64 CAPÍTULO

Perdonakuqmi kananchis

Perdonakuqmi kananchis

MATEO 18:21-35

  • ¿QANCHIS KUTIKAMALLACHU PERDONANANCHIS?

  • JESÚS WILLAN MANA KHUYAPAYAKUQ KAMACHIMANTA

Pedroqa allintachá uyariran pipas contranchispi juchallikuqtin imatas ruwananchis paywan allipunakapunapaq chayta, chaywanpas payqa yachaytachá munaran jayk’a kutitachus piwanpas allipunakapunanchis chayta.

Chaychá Jesusta tapuran: “Señor, ¿jayk’a kutikaman wayqeyta perdonasaq noqa contra juchallikuqtin? ¿Qanchis kutikamachu?”, nispa. Religionpi umallikunaqa kinsa kutikamalla pitapas perdonanapaqmi yachachiqku. Pedroqa “qanchis kutikamachu” nisqanwanqa chay umallikunamanta aswan perdonakuq kananpaqchá piensakusharan (Mateo 18:21).

Jesusmi ichaqa Pedrota niran: “Manan qanchis kutikamallachu, aswanpas qanchis chunka qanchisniyoq kutikaman”, nispa (Mateo 18:22). Chaywanmi Jesusqa rikuchisharan jayk’a kutikamapas perdonana kasqanta. Pedroqa manan yupashananchu karan jayk’a kutitañachus wayqenta perdonasharan chayta.

Chaymantan Jesusqa juj ejemplota churaspa lliuman entiendechiran imaraykus perdonakuq kana chayta. Chaypin rimaran juj khuyapayakuq reymanta, mana khuyapayakuq kamachimantawan. Chay kamachis reyman manu kasqa 10.000 talento qolqemanta, chayqa karan 60 millón denario qolqe. Mana pagapuyta atiqtinsi reyqa kamachikusqa chay kamachita, esposanta, wawankunatawan vendenankupaq, chhaynapi manunta pagananpaq. Chaysi chay kamachiqa reyman k’umuykuspa rogakusqa: “Suyariykullaway, pagapullasaykin manuytaqa”, nispa (Mateo 18:26).

Chaysi chay reyqa kamachinta anchata khuyapayaspa kacharipusqa, llapa manuntataq perdonapusqa. Chay kamachitaqsi chaymanta lloqsispa 100 denario qolqe manukuqnin kamachimasinwan tupasqa, jinaspa kunkanmanta jap’isqa: ‘Pagapuway llapa manusqayta’, nispa.  Jinas chay kamachimasinqa k’umuykuspa rogakuyta qallarisqa: ‘Suyariykullaway, pagapullasaykin manuytaqa’, nispa (Mateo 18:28, 29). Paysi ichaqa mana uyariyta munasqachu, aswansi carcelman wisq’achimusqa llapa manunta pagapunankama.

Kamachimasinkunataqsi llapa chaykuna pasasqanta reyman willamusqaku. Chaysi reyqa chay kamachita wajachimuspa nisqa: “Millay kamachi, noqaqa llapa manuykitan perdonapurayki rogakuwaqtiyki. ¿Manachu qanpas chay kamachimasiykita khuyapayawaq karan?”, nispa. Jinaspas reyqa phiñasqallaña chay kamachita carcelerokunaman entregasqa llapa manunta pagapunankama. Chaykunata willayta tukuspan Jesusqa niran: ‘Kaqllatataqmi Yayaypas ruwasunkichis manachus wayqeykichista tukuy sonqowan perdonankichis chayqa’, nispa (Mateo 18:32-35).

¿Manachu chay kallpachawanchis perdonakuq kanapaq? Diosqa jatun manuta jinan juchanchiskunata perdonapuwaranchis. Chaywan tupanachisqaqa manan imapaschu iñiqmasinchiskunaq contranchispi juchallikusqankuqa. Chaymantapas Jehová Diosqa mana yupay atiytan perdonawashanchis. ¿Chaychu iñiqmasinchiskunata mana perdonasunman? Diosqa ‘contranchispi juchallikuqkunata perdonallaqtinchismi’ noqanchistapas perdonawasun (Mateo 6:12).