Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 59 CAPÍTULO

“Runakunari, ¿pin niwankutaq?”

“Runakunari, ¿pin niwankutaq?”

MATEO 16:13-27 MARCOS 8:22-38 LUCAS 9:18-26

  • JESÚS JUJ ÑAUSA RUNATA QHALIYACHIN

  • PEDRO CHASKIN JANAQ PACHA GOBIERNO LLAVEKUNATA

  • JESÚS RIMAN WAÑUNANMANTA, KAUSARIMPUNANMANTAWAN

Jesuswan discipulonkunawan Betsaida llaqtaman chayaqtinkun runakunaqa payman apamuranku juj ñausa runata, jinaspa rogakuranku qhaliyachinanpaq.

Jesustaq chay runata makinmanta jap’ispa llaqta jawaman aparan, ñawinman thoqaykuspataq tapuran: “¿Imallatapas rikunkichu?”, nispa. Jinan chay runaqa niran: “Runakunatan sach’ata jina rikushani, ichaqa purishaqta”, nispa (Marcos 8:23, 24). Jinan Jesusqa chay runaq ñawinkunaman makinta churaykuspa qhaliyachiran, jinaspa wasinman kachapuran: “Aman kay llaqtamanqa jaykunkichu”, nispa.

Chaymantataq Jesusqa discipulonkunapiwan “Cesarea Filipo” nisqa llaqtaman wicharanku, chay llaqtaqa 40 kilómetro jina puriypin kasharan, 350 metro jina altopitaqmi kasharanpas. Iskay p’unchay puriy jinachá karan chayman chayanapaqqa, chayneqllapin kasharan “Hermón” nisqa orqopas.

Ñanllapiraq kashaqtinkun Jesusqa juj ladoman sapallan riran Diosmanta mañakuq. Chaypaqqa isqon otaq chunka killallañan faltasharan payta wañuchinankupaq. Chaymantapas payqa llakisqachá kasharan wakin qatikuqninkunawan imachus pasashasqanmanta. Askhañan payta saqepuranku, wakintaq iskayasharanku paymanta. Paykunaqa tapukusharankuchá: “¿Imanaqtintaq Jesusri mana munaranchu reyta churanaykuta? ¿Imanaqtintaq mana ima señaltapas qoranchu?”, nispa.

Payman riqtinkun Jesusqa discipulonkunata tapuran: “Runakunari, ¿pin niwankutaq?”, nispa. Paykunataq niranku: “Wakinqa ‘bautizaq Juanmi’ ninkun, wakintaq ‘Eliasmi’ ninku, wakintaq ‘Jeremiasmi’ ninku, wakinñataq ‘profetakunamanta jujninchá’ ninku”, nispa. Runakunaqa piensaqku Jesusqa wañusqakunamanta kausarimpuq juj profeta kananpaqmi. Chaymi payqa discipulonkunata niran: “Qankunari, ¿pin niwankichistaq?”, nispa. Jinan Simón Pedroqa kaq rato niran: “Qanqa Criston kanki, kausaq Diospa Churin”, nispa (Mateo 16:13-16).

Jesustaq payta niran: ‘Kusikuy, Simón, Diosmi chaytaqa willarasunki. Noqan niyki: Qanmi kanki Pedro, kay qaqa patapin iñiq t’aqayta jatarichisaq, manataqmi chaytaqa Sepulturaq punkunpas atipanqachu’, nispa. Chaywanmi Jesusqa willasharan iñiq t’aqata pay kikin jatarichinanta, Sepulturapas manapuni discipulonkunata presochananta. Chaymantataq niran: “[Pedro], qanmanmi qosayki janaq pacha gobierno llavekunata”, nispa (Mateo 16:18, 19).

Jesusqa manan Pedrotachu apostolkuna ukhupi umallitaqa churasharan, manataqmi “qan patapin iñiq t’aqaqa jatarichisqa kanqa” nispapaschu nisharan. Iñiq t’aqaqa Jesús patapin jatarichisqa kanan karan (1 Corintios 3:11; Efesios  2:20). ¿Iman karan Pedroq chaskinan janaq pacha llavekuna? Chay llavekunan representaran wakin runakuna janaq pacha gobiernoman jaykunankupaq Pedro ñanta kichananta. Payqa kinsa llavetan chaskiran.

Ñaupaq kaq llavetan Pedroqa utilizaran 33 watapi Pentecostés fiestapi, chay kutipin judiokunaman, judioman tukupuqkunamanwan willaran salvasqa kanankupaq imatachus ruwananku karan chayta. Iskay kaq llavetataq utilizaran Samaria runakunaman Diospa gobiernonpi kanankupaq oportunidadta qospa. Kinsa kaq llavetataq utilizaran 36 watapi, chay kutipin Pedroqa chay oportunidadta qoran mana judío runakunamanpas, Cornelioman juj runakunamanwan (Hechos 2:37, 38; 8:14-17; 10:44-48).

Chaymantan Jesusqa discipulonkunaman willaran wañuchinankumanta. Jinan Pedroqa chayta mana entiendespa Jesusta anyaran: “Señor, qan kikiykita khuyapayakuy, qanqa manapunin imaraykupas chhaynapiqa tarikunkichu”, nispa. Jesustaq kutirispa payta niran: “¡Manan uyarisaykichu, Satanás! Urmachiytan munawashanki, qanqa manan Dios jinachu piensanki, aswanpas runakuna jinallan piensanki”, nispa (Mateo 16:22, 23).

Juj discipulonkunata wajaspataq niran: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta apaspa qhepayta jamushallachun. Pipas vidanta salvayta munaqqa chinkachinqan, pipas noqarayku allin willakuykunarayku ima vidanta chinkachiqmi ichaqa salvanqa”, nispa (Marcos 8:34, 35).

Chhaynaqa Jesusta qatikuqkunaqa mana manchakuqmi kananku karan, manataqmi kikinkupiraqchu piensananku karan. Chaymi Jesusqa nillarantaq: “Pipas noqamanta [...] p’enqakunqa chayqa, runaq Churinpas paymantaqa p’enqakullanqataqmi ch’uya angelninkunapiwan Yayanpa qhapaq atiy qosqanwan kutimuspa”, nispa (Marcos 8:38). Arí, chaypachan Jesusqa “sapankaman pagapunqa imachus ruwasqankuman jina” (Mateo 16:27).