Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 26 CAPÍTULO

“Juchaykikunan perdonasqa kapun”

“Juchaykikunan perdonasqa kapun”

MATEO 9:1-8 MARCOS 2:1-12 LUCAS 5:17-26

  • MANA KUYURIY ATIQ RUNATA JESÚS PERDONAN, JINASPA QHALIYACHIN

Tukuyneqpin runakunaqa Jesusmanta rimasharanku, chaymi askha runakuna jamuranku yachachisqanta uyarinankupaq, milagrokuna ruwasqanta rikunankupaqwan. Chay qhepallatan Jesusqa Capernaum llaqtata kutipuran. Chayta yachaspan askha runakuna jamuranku Jesuspa kasqan wasiman. Chaypin kasharan wakin fariseokunapas kamachikuy simita yachachiqkunapas, paykunan jamusqaku Galileamanta, Judea lado llaqtakunamanta ima.

Jesuspa kasqan wasiqa junt’an kasharan, “chaymi manaña punkullapipas campo karanñachu, Jesustaq Diospa siminta paykunaman willayta qallariran” (Marcos 2:2). Chay kutipi imachus ruwasqanwanmi Jesusqa rikuchiran maymantachus ima ñak’ariypas paqarisqanta, chayta tukuchinapaq pay atiyniyoq kasqantawan.

Chaypi Jesús yachachishaqtinmi tawa runakuna mana kuyuriy atiq amigonkuta camillapi wantumuranku Jesús qhaliyachinanpaq. “Ichaqa askha runakuna kasqanraykun mana Jesusman apaykuyta atirankuchu” (Marcos 2:4). Maytachá chaywanqa llakikuranku, ichaqa manan jinallachu karanku. Wasiq techonta t’oqospan paykunaqa chayninta chay amigonkuta Jesuspa kasqanman uraykachiranku.

¿Phiñakuranchu Jesús chay ruwasqankuwan? Manan. Aswanmi payqa iñiyniyoq kasqankumanta admirakuspa chay onqosqa runata niran: “Juchaykikunan perdonasqa kapun”, nispa (Mateo 9:2). Chayta uyarispan fariseokunawan kamachikuy simita yachachiqkunawanqa sonqonkupi niranku: “¿Imaraykutaq kay runari khaynata riman? Diostamá k’amishan chaywanqa, ¿pitaq juchakuna perdonaytari atinman, manachu Dioslla?”, nispa (Marcos 2:7).

Jinan Jesusqa paykunata niran: “¿Imaraykun sonqoykichispi chhaynata piensashankichis? ¿Mayqentaq aswan fácil kanman? ¿Mana kuyuriy atiq runata ‘juchaykikunan perdonasqa kapun’ niychu, icha, ‘jatarispa camillaykita oqarispa ripuy’ niychu?”, nispa (Marcos 2:8, 9). Jesusqa runakunaraykutaq wañunan karan chayqa, atiranmi juchakuna perdonayta.

Chaymi Jesusqa chay onqosqa runata niran: “Sayariy, camillaykita oqarispa wasiykiman ripuy”, nispa. Paytaq kaq rato sayarispa lliu runaq rikusqan chaymanta ripuran. Chaywanmi runakunaqa anchata admirakuranku, Diosta jatunchaspataq niranku: “Manamá jayk’aqpas khaynakunataqa rikuranchischu”, nispa (Marcos 2:11, 12).

Chay runaqa qhali kapuran “juchaykikunan perdonasqa kapun”, nispa Jesús niqtinmi ¿riki? Chaymi rikuchin onqoyqa jucharayku kasqanta, arí, ñaupa taytanchis Adanpa juchan jawan kunanqa lliupas onqoshanchis wañupushanchis ima. Diospa gobiernon kamachimuqtinmi ichaqa lliu Dios serviqkunata Señor Jesucristo perdonanqa, chaypachaqa manañan pipas onqonqachu (Romanos 5:12, 18, 19).