MATEO 11:16-30 LUCAS 7:31-35

  • JESÚS ANYAN WAKIN LLAQTAKUNATA

  • JESÚS NIN ‘JAMUYCHIS, NOQAN SAMACHISAYKICHIS’ NISPA

Jesusqa ancha allinpaqmi bautizaq Juanta qhawariran, runakunan ichaqa mana chhaynatachu qhawariranku, chaymi Jesusqa niran: ‘Kay tiempo runakunaqa mercado plazapi tiyashaq erqechakuna jinan kanku, paykunan pujllaqmasinkuta ninku: “Flautatan tocapuraykiku, manataq tusurankichischu; khuyaytan waqarayku, manataq llakikurankichischu”’, nispa (Mateo 11:16, 17).

Chay nisqanta entiendechinanpaqmi Jesusqa niran: “Juanqa mana mijuspa mana ujaspan jamuran, runakunataq ninku: ‘Supaypa junt’aykusqanmi kashan’, nispa. Runaq Churinmi ichaqa jamuran mijuspa ujaspa ima, runakunataq ninku: ‘Qhawariychis kay runata, payqa rajrapun, machaqmi’”, nispa (Mateo 11:18, 19). Juanqa Nazareo runataq karan chayqa, manan vinotapas ujaqchu; runakunataq niqku “supaypa junt’aykusqanmi kashan”, nispa (Números 6:2, 3; Lucas 1:15). Jesusmi ichaqa imatapas ujakuqlla, mijukuqlla; runakunataq niqku ‘rajrapun, machaqmi’ nispa.

Chaymi Jesusqa chay runakunata comparasharan mana imawanpas contentakuq erqechakunawan. Ichaqa niranmi: “Chaywanpas runaqa imatapas allinta ruwasqanwanmi rikuchinqa yachayniyoq kasqanta”, nispa (Mateo 11:16, 19). Imachus ‘ruwasqankuwanmi’ Jesuspas Juanpas rikuchiranku chay runakunaq rimasqanqa yanqa kasqanta.

Chaymantan Jesusqa Corazín llaqtata, Betsaida llaqtatawan anyaran: “¡Ay qanmanta, Corazín llaqta! ¡Ay qanmanta, Betsaida llaqta! Qankunapi jinachus Tiro llaqtapi Sidón llaqtapipas milagrokunata ruwakunman karan chayqa, mayñachá juchankumanta pesapakunkuman karan”, nispa. Capernaum llaqtatapas anyaranmi. Payqa kutillaqpunin chay llaqtataqa, chaywanpas pisillan chaypi tiyaq runakunaqa paypi iñiranku, chaymi payqa chay llaqtata niran: “Juicio p’unchaypiqa qankunan aswan castigasqa kankichis Sodoma llaqtamantaqa”, nispa (Mateo 11:24).

Chaymantataq Jesusqa Yayanta jatuncharan wawa jina kaqkunaman yachachikuyninkunata entiendechisqanmanta, ‘yachayniyoq runakunamantataq’ pakasqanmanta (Mateo 11:25). Jinaspa niran: “Noqaman jamuychis, llapa sayk’usqakuna, llasa q’epiyoqkuna; noqan samachisaykichis. Yugoyta apaychis, jinaspa noqamanta yachaychis, jinan samakuyta tarinkichis; noqaqa llamp’u sonqon kani, k’umuykukuq sonqoyoqtaqmi kanipas. Yugoyqa llamp’ullan, q’epiypas manan llasachu”, nispa (Mateo 11:28-30).

Jesusqa Diosmanta cheqaq kaqta yachachispan runakunaman samakuyta qoran. Payqa manan judío umallikuna jinachu runaq ruwasqan kamachikuykunata yachachiran, manan samana p’unchaymanta kamachikuytapas llasa q’epimanchu tukuchiran. Chaymantapas payqa autoridadkunaq sarunchasqan runakunata, juchanku jawa sinchi llakisqa kaqkunatapas samarichiranmi. Paykunatan entiendechiran imaynapis juchanku perdonasqa kanman chayta, imaynapis Dioswanpas allipunakapunkuman chaytapas.

Chhaynaqa Jesuspa ‘yugonta’ chaskikuqkunaqa khuyapayakuq Yayanchisman entregakuspan kusisqa payta servinku. Payta serviyqa manan llasa q’epi jinachu; kamachikuyninkunapas manan sasa junt’aychu (1 Juan 5:3).