Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 54 CAPÍTULO

Jesusmi “kausay qoq t’antaqa”

Jesusmi “kausay qoq t’antaqa”

JUAN 6:25-48

  • JESUSQA “JANAQ PACHAMANTA URAYKAMUQ T’ANTAN”

Yachasqanchis jina, Galilea qocha chimpapin Jesusqa waranqanpi runakunaman mijuchiran, jinaspa paykunamanta ayqekuran reyta churayta munaqtinku. Chay tutapitaq unu patanta puriran, Pedrotapas unumanta aysaran chinkaykushaqtin, chaymantataq wayrata thanichispa discipulonkunata salvaran.

Chaymantan Jesusqa Capernaum ladoman chayaran. Chaypin mijuchisqan runakunaqa tapuranku: “¿Jayk’aqtaq kaymanri chayamuranki?”, nispa. Jinan Jesusqa paykunata anyaran mijunaraykulla payta qatikusqankumanta. Jinaspa niran: “Ama ismuq mijunaraykuqa llank’aychischu, aswanpas mana ismuq mijunarayku llank’aychis, chhaynapi wiñay kausayniyoq kanaykichispaq”, nispa. Jinan paykunaqa tapuranku: “¿Imatan ruwanayku?”, nispa (Juan 6:25-28).

Paykunaqa Moisespa chaskisqan kamachikuykunapin piensashankuman karan. Chaymi Jesusqa niran: “Diosqa kay ruwanaykichistan munan: Paypa kachamusqanpi iñinaykichista”, nispa. Paykunan ichaqa mana Jesuspi iñirankuchu askha milagrokunataña ruwashaqtinpas. Aswanmi niranku: ‘¿Ima milagrotan ruwanki, chhaynapi chayta rikuspa qanpi creenaykupaq? Ñaupa taytaykuqa “maná” nisqatan ch’inneqpi mijuranku, chaymantan Diospa simin qelqapas: “Janaq pachamantan t’antata paykunaman qoran”, nispa nin’ , nispa (Juan 6:29-31; Salmo 78:24).

Jinan Jesusqa niran: “Moisesqa manan janaq pachamanta cheqaq t’antatachu qorasunkichis, Yayaymi ichaqa janaq pachamanta cheqaq t’antata qosunkichis. Diospa qosqan t’antaqa janaq pachamanta uraykamuqmi, chay t’antan kay pacha runakunamanqa kausayta qon”, nispa. Paykunataq chay nisqanta mana entiendespa niranku: “Señor, chay t’antataqa qowaykupuni”, nispa (Juan 6:32-34). ¿Ima t’antamantan Jesús rimasharan?

Chaymantan Jesús niran: ‘Noqan kausay qoq t’antaqa kani. Pipas noqaman jamuqtaqa manan jayk’aqpas yarqanqachu, pipas noqapi iñiqqa manan jayk’aqpas ch’akichikunqachu. Qankunaqa rikuwashaspaykichispas manan creewankichischu. Noqaqa janaq pachamanta uraykamurani manan munayniyta ruwaqchu, aswanpas kachamuwaqniypa munayninta ruwaqmi. Kachamuwaqniyqa manan munanchu llapa qowasqanmanta mayqentapas chinkachinayta, aswanpas tukukuy p’unchaypi kausarichimpunaytan munan. Yayayqa munan pipas Churita reqsispa paypi iñiqqa wiñay kausayniyoq kanantan’, nispa (Juan 6:35-40).

Chayta niqtinmi judiokunaqa paymanta rimapakuyta qallariranku: ‘¿Imaynapitaq payri janaq pachamanta uraykamuq t’anta kanman?’, nispa (Juan 6:41). Paykunapaqqa Nazaret llaqtayoq común runallan Jesusqa karan. Chaymi ninakuranku: “¿Manachu kayqa Josepa wawan Jesús kashan? Noqanchisqa taytantapas mamantapas reqsinchismá riki”, nispa (Juan 6:42).

Jinan Jesusqa paykunata niran: ‘Amaña rimapakuychischu. Manan pipas noqamanqa jamunmanchu manachus kachamuwaqniy Yaya pusamunman chayqa; noqaqa tukukuy p’unchaypin payta kausarichimpusaq. Profetakunaq qelqasqanpin nishan: “Paykunan Jehová Diospa yachachisqan kanqaku”, nispa. Pipas Yayata uyarispa paymanta yachaqqa noqamanmi jamun. Manan pi runapas Yayataqa rikuranchu, aswanpas noqallan, Diosmanta jamusqayrayku. Pipas noqapi iñiqqa wiñay kausayniyoqmi kanqa’, nispa (Juan 6:43-47; Isaías 54:13).

Chay wiñay kausaymantaqa ñan Nicodemomanpas Jesusqa willaranña, chay kutipin niran:  ‘Pipas [Diospa sapallan wawanpi] iñiqqa manan wañunqachu, aswanpas wiñay kausayniyoqmi kanqa’, nispa (Juan 3:15, 16). Kay kutipin ichaqa askha runakunaman chayta nisharan. Chaywanmi rikuchisharan mana ima t’antawanchu chay kausayman chayananku kasqanta, aswanpas paypa yanapaynillanwan. Chaymi wajmanta niran: “Noqan kausachiq t’antaqa kani” nispa (Juan 6:48).

Jesusqa manan chay kutillapichu janaq pacha t’antamantaqa rimaran, Capernaum llaqtapi juj sinagogapipas rimallarantaqmi chaymantaqa.