Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 34 CAPÍTULO

Jesús 12 apostolninkunata ajllan

Jesús 12 apostolninkunata ajllan

MARCOS 3:13-19 LUCAS 6:12-16

  • JESUSPA 12 APOSTOLNINKUNA

Bautizaq Juan Jesusta Diospa corderonta jina reqsichisqanmantaqa juj wata kuskan jinañan pasaran. Chaymantapachan askha runakuna Jesusta qatikuranku. Wakinmi karan: Andrés, “Pedro” nisqa Simón, Juan, Felipe, “Bartolomé” nisqa Natanael, Juanpa wayqen Santiago ima (Juan 1:45-47).

Ñan tiempoña karan Jesús apostolninkunata ajllananpaq. Chaymi payqa juj orqota rispa tutantin chaypi Diosmanta mañakuran, chhaynapi allin yachaywan ajllananpaq. Paqaristintaq discipulonkunata wajaspa paykuna ukhumanta chunka iskayniyoqta ajllaran apostolninkuna kanankupaq. Chay apostolkunan llank’aqmasinkuna kananku karan, chaymi paykunata allinta yachachinan karan.

Jesuspa ajllasqan apostolninkunan karan: ñaupaqpi wajasqan soqta discipulonkuna, impuesto cobraq Mateo, Santiagoq wawan “Tadeo” nisqa Judas, “Cananita” nisqa Simón, Tomás, Alfeoq wawan Santiago, Judas Iscariote ima (Mateo 10:2-4; Lucas 6:16).

Chay discipulonkunaqa unayñan paywan purisharanku, chaymi allintaña Jesusqa paykunata reqsiran. Chaymantapas Santiagowan Juanwanqa paypa primonkunan kankuman karan. Juj kaq Santiagopas primonmi kanman karan. Chay Santiagoq papan Alfeon Jesuspa padrastron Josepa wayqen kanman karan.

Jesuspaqqa manan sasachu karan apostolninkunaq sutinta yuyariyqa. Qanri, ¿yuyashankichu sutinkuta? Khayna ordenpin facil-llata yuyariwaq: Karanmi iskay Simonkuna, iskay Santiagokuna, iskay Judaskuna ima; jujnin Simonpa wayqenmi karan Andrés, jujnin Santiagoq wayqentaq karan Juan. Chhaynapin pusaq apostolkunaq sutinta yuyariwaq. Wakinkunataq karan impuesto cobraq Mateo, Jesusmanta iskayaq Tomás, sach’a k’uchupi tiyasharan chay Natanael, paypa amigon Felipe ima.

Jesuspa apostolninkunamantaqa chunka jujniyoqmi Jesuspa wiñasqan Galilea provinciamanta karanku. Natanaelmi karan Caná llaqtamanta; Felipewan, Pedrowan, Andreswantaq Betsaida llaqtamanta karanku. Tiempowanmi ichaqa Pedrowan Andreswan Capernaum llaqtaman ripuranku, chaypin Mateopas tiyanman karan. Chay ladopin Santiagowan Juanwanpas tiyaranku, chaypin negocionkupas kasharan. Judas Iscariotellan Judeamantaqa kanman karan, paymi Jesustaqa jap’ichiran.