Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 3 CAPÍTULO

Ñanta allichananpaq juj wawa nacen

Ñanta allichananpaq juj wawa nacen

LUCAS 1:57-79

  • NACEQ WAWATA “JUAN” NISPA SUTICHANKU

  • ZACARÍAS WILLAN IMATACHUS JUAN RUWANQA CHAYTA

Elisabetqa onqokunanpaq jinañan kasharan. Paytaqa kinsa killa jinan parienten María yanaparan. Chaymantan ichaqa kutipuran Nazaret llaqtanman. Soqta killamantaqa paypas juj wawatan onqokunan karan.

Mariaq ripusqan qhepallatan Elisabetqa mana sasachakuspalla onqokuran, wawachanpas qhalin kasharan. Chaymi Elisabetpas Zacariaspas anchata kusikuranku. Paykunata watukuq jamuqkunapas kusikurankun wawachata rikuspa.

Diospa kamachikuyninman jinaqa, pusaq p’unchayninpin qhari wawakunataqa qhari kayninku qarachata kuchunanku karan, chay p’unchaypin sutintapas churaqku (Levítico 12:2, 3). Chay p’unchay chayamuqtinmi Zacariaspa wasinman jamuranku familiankuna wasimasinkuna ima, wakinkunan munasharanku Zacariaspa wawanta paypa sutinwan sutichayta. Ichaqa Zacariasta ángel Gabrielpa kamachisqanman jinan Elisabetqa niran: “¡Manan! Juanmi sutinqa kanqa”, nispa (Lucas 1:60).

Wakinmi ichaqa niranku: “Manamá pi familiaykipas chhayna sutiyoqqa kanchu”, nispa (Lucas 1:61). Jinaspa makillankuwan Zacariasta tapuranku ima sutitachus churanqa chayta. Jinan payqa juj tablachata mañakuspa chaypi qelqaran: “Juanmi sutinqa”, nispa. (Lucas 1:63).

Jinan Zacariaspa qallunqa paskarikuran. Ñaupaqpi yachasqanchis jina, ángel Gabrielpa willasqanta mana creesqanraykun mana rimayta atipuranchu. Zacarías rimayta qallariqtinmi chaypi kashaqkunaqa anchata admirakuspa ninakuranku: “Pichá kanqa chay wawaqa”, nispa (Lucas 1:66). Llapankun repararanku chay wawata “Juan” nispa sutichasqankuqa Diospa munaynin kasqanta.

Jinan Zacariasqa santo espirituwan junt’a kaspa niran: “Jatunchasqa kachun Israelpa  Diosnin Jehová Diosqa, paymi llaqtanta watukamun kacharichinanpaq. Kamachin Davidpa wasinmantan atiyniyoq salvaqta jatarichipuwanchis”, nispa (Lucas 1:68, 69). ‘Atiyniyoq salvaq’ nispaqa Señor Jesusmantan Zacariasqa rimasharan. Chaymantan nillarantaq: “Maypachachus enemigonchiskunaq makinmanta [Dios] librawasun chayqa, mana manchakuspan payta servisunchis junt’aq kaywan, chanin kaywan, tukuy kausasqanchis p’unchaykuna”, nispa (Lucas 1:74, 75).

Chaymantataq Zacariasqa wawachata niran: “Qantaq, wawáy, ancha jatun Diospa profetan kanki, Jehová Diospa ñaupantan rinki ñanninta allichaq, llaqtanmanmi willanki Diosninku juchankuta perdonaspa salvananmanta, chaytan payqa ruwanqa ancha khuyapayakuq kasqanrayku. Chay khuyapayakuywanmi Diosqa k’ancharimuwasun pacha paqariy k’anchaywan jina, chaywanmi k’anchaykunqa tutayaqpi tiyaqkunata, [...] chhaynapi thaj kay ñanninta pusawananchispaq”, nispa (Lucas 1:76-79). ¡Ancha kusikunapaqchá chay profeciaqa karan!

Chaykuna pasanankamaqa ñachá Mariaqa Nazaret llaqtanman chayaranña. Imachá pasanqa runakuna payta wijsayoqta rikuqtinku.