Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 ISKAY T’AQA

Llakikuykuna: “Imaymana sasachakuypin kayku”

Llakikuykuna: “Imaymana sasachakuypin kayku”

June nin: “25 wata casarasqa kasqayku qhepamanmi qosaywan divorcianakapurqayku, wawaykunapas Diospa llaqtanmantan t’aqakapurqanku, ñoqataqmi sinchita onqopurqani. Chay hawan sinchita llakikapurqani. Manan imata ruwanaypaqpas kallpay kapurqanchu. Chaymi manaña huñunakuykunamanpas nitaq predicaqpas ripurqaniñachu”, nispa.

DIOSTA serviqkunapas llakikuypiqa tarikusunmanmi. Huk salmistatapas ‘sonqontan llakikuyninkuna ñit’iykurqan’ (Salmo 94:19). Jesuspas willarqanmi kay tukukuy p’unchaypi imaymana llakikuykuna kananta, chayrayku Jehová Diosta serviy sasa kananta (Lucas 21:34). ¿Qolqewanchu pisichikushanki? ¿Familiaykichu problemapi tarikushan? ¿Onqosqachu tarikushanki? ¿Imaynatan Jehová Dios chaykunapi yanapasunkiman?

“Runakunaq mana aypay atisqan atiy”

Problemanchiskunata atipanapaqqa necesitanchismi yanapayta. Apóstol Pablon willarqan ‘imaymana sasachakuypi kasqanchista’ ‘maqasqa kasqanchista’. Chaywanpas willarqanmi ‘mana atipasqachu’, ‘mana sinchi llakisqachu’, ‘mana wañuchisqachu’ kasqanchista. ¿Iman yanapawanchis aguantananchispaq? “Runakunaq mana aypay atisqan atiy ñoqanchispi kasqanmi”, chay atiyqa tukuy atiyniyoq Diospa atiyninmi (2 Corintios 4:7 NM, 89).

Piensay imaynatachus ‘runakunaq mana aypay atisqan atiyta’ ñawpaqpi chaskisqaykipi. Yaqapaschá huk discursota uyarispayki repararqanki Jehová Diosqa tukuy tiempo munakuq kasqanta. Paraisomanta hukkunaman willaspapas, ¿astawanchu confiarqanki Diospa promesankunapi? Huñunakuykunapas predicacionpas kallpatan qowanchis llakikuyninchiskunata atipanapaq, thak kaytan qowanchis chhaynapi Diosta kusisqa servinanchispaq.

“Rikuychis may sumaqchus Señor Diosqa kashasqanta”

Jehová Diosqa munanmi gobiernonmantaraq ñawpaqta willananchista, mana saqespa chayta ruwananchistapas (Mateo 6:33; Lucas 13:24). Ichaqa yaqapaschá onqosqa kasqaykirayku, familiaykipi problemakuna kasqanrayku, familiayki otaq amigoykikuna burlakusqanrayku mana kallpayoq sientekunki. Otaq yaqapaschá llank’asqaykirayku mana huñunakuykunaman riyta atinkichu. Imaymanan ruwanaqa, tiempotaqmi mana aypakunchu, kallpapas pisikunmi; chhaynapi tarikuspaqa yaqapaschá sinchi ñut’usqa sientekunki. Yaqapaschá ninkiraq: “Jehová Diosqa nishutan ruwanayta munan”, nispa.

Jehová Diosqa entiendenmi imayna sientekusqaykita, manataqmi mana atinaykitachu mañasunkipas. Sinchi llakisqa kaspaqa tiempotan necesitanchis allinyananchispaq, Diosqa allintan chayta entiendewanchis (Salmo 103:13, 14).

Eliasta imaynatachus Jehová Dios yanapasqanpi piensay. Paymi huk tiempo sinchita desanimakapurqan, sinchi manchasqa kaspanmi ch’inneqman ayqekurqan. ¿Ima nirqanmi Jehová? ¿“Mana allintan ruwashanki” nirqanchu? ¿“Usqhaylla kutispa ruwanaykita ruwamuy” nirqanchu? Manapunin. Iskay kutipin angelninta kacharqan sumaqllata rikch’achispa mikhuykachinanpaq. Chaywanpas Eliasqa 40 p’unchay qhepamanpas llakisqallan kasharqan.  ¿Imatawanmi Jehová Dios ruwarqan yanapananpaq? Sut’itan rikuchirqan payta yanapay atisqanta, chaymantataq “sumaq samp’a” simillawan kallpacharqan. Willallarqantaqmi mana sapallanchu kashasqanta, waranqanpi runakuna Diosta yupaychashasqankutapas. Chaywanmi Eliasqa wakmanta kallpachakurqan Diosta servishanallanpaq (1 Reyes 19:1-19). ¿Imatan chaywan entiendenchis? Elías sinchi llakisqa kashaqtinqa Jehová Diosqa rikuchirqanmi paciencianta, khuyapayarqan imataqmi. Jehová Diosqa manan cambianchu. Payqa ancha chaninpaqmi qhawarisunki chay profetanta hina.

Jehová Diosta ñawpaqpi imayna servisqaykita ama comparaychu kunan imayna servisqaykiwan. Maypachachus ejerciciota ruwaq runa unay tiempo mana ejerciciota ruwapunchu chayqa, wakmanta ruwayta qallariqtinqa manan ñawpaqpi hinachu kallpan. Wakmanta kallpayoq kananpaqqa pisi-pisimantan ruwayta qallarinan. Chhaynallataqmi, cristianokunapas ima yuyaykusqanchistapas hunt’anapaqqa pisi-pisimantan chaypaq kallpachakunanchis (1 Corintios 9:24-27). ¿Imata ruwanaykipaqmi yuyaykushanki? ¿Huñunakuyman rinaykipaqchu? Jehová Diosmanta orakuy yanapanasuykipaq. Diosta servinaykipaq wakmanta kallpaykiq kamusqanman hinan reparanki “may sumaqchus” Diosqa kasqanta (Salmo 34:8). Diosta munakuspa ima ruwasqaykipas imayna huch’uyllaña kanman chaypas, paypaqqa ancha valorniyoqmi (Lucas 21:1-4).

Jehová Diosqa manan mana atinanchistachu mañawanchis

“Kutimpunaypaq yanapay necesitasqay”

¿Imaynatan Jehová Dios kallpacharqan June cristianata? Ninmi: “Jehová Diosmantan orakushallarqanipuni yanapawananpaq. Huk kutinmi qhachuniy willawarqan tiyasqay llaqtapi huk asamblea kananmanta, huk p’unchayllan rirqani. ¡May munaymi karqan wakmanta Diospa llaqtan ukhupi kayqa! Chay asamblean karqan kutimpunaypaq yanapay necesitasqay. Kunanqa wakmantan Diosta servishani, aswan kusisqan kashanipas. Kunanqa yachanin manapuni karunchakunaychu kasqanta, necesitanitaqmi iñiqmasiykunatapas. Tiempollanpi kutimpusqayqa maytan kusichiwan”, nispa.