Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

Qallariynin

Qallariynin

‘Diospa prometesqan herenciata iñiywan pacienciawan chaskiqkuna hina kaychis’ (HEBREOS 6:12)

1, 2. ¿Imaynatan huk watukuq umalli qhawariq ñawpa tiempopi Diosta serviq runakunata, imaraykun allinpuni kanman chay runakunawan amigontin kay?

KURAKÑA watukuq umalliq discursonta uyarispan huk cristiana nirqan: “Tukuy tiempopas amigontin kankuman hinatan Bibliapi tarikuq runakunamanta riman”, nispa. Chay nisqanqa cheqaqmi karqan, chay umalliqa askha watakunañan Bibliapi tarikuq qharikunamanta warmikunamanta yachashasqa yachachishasqapas, chayraykun paykunataqa cheqaqpaqpuni qhawarirqan, amigonkunapas kankuman hinapunin kapurqanku.

2 May munaymi kanman Bibliapi tarikuq runakuna amigonchis kaqtinqa, ¿amigoykikunachu paykuna? ¿Imaynan sientekuwaq paykunawan rimaspa kuska kaspa, allintapuni paykunata reqsispapas? Wakinmi kanku Noé, Abraham, Rut, Elías, Ester. ¿Imaynan kanman kawsayniyki paykunata reqsiqtiyki? Paykunaqa sumaq simikunawanchá kallpachawasunman (leey Proverbios 13:20).

3. a) ¿Imaynatan yanapawasunman Bibliapi tarikuq runakunamanta yachay? b) ¿Ima tapuykunatan kutichisun?

3 Kawsarimpuqtinkun ichaqa anchatapuni kusikusun paykunawan amigontin kaspa (Hech. 24:15). Ichaqa kunanpas paykunamanta yachayqa yanapawasunmi. Apóstol Pablon willawanchis chaypaq imata ruwananchista, ninmi: ‘Diospa prometesqan herenciata iñiywan pacienciawan chaskiqkuna hina kaychis’, nispa (Heb. 6:12). Chaypaq chay runakunaq kawsayninmanta yachasun, ichaqa ñawpaqta kay tapuykunataraq kutichisun, chaykunamantan Pablo rimarqan: ¿Iman iñiy, imaraykun necesitanchis? ¿Imaynapin ñawpa tiempopi Diosta serviqkuna hina iñiyniyoq kasunman?

¿Iman iñiy, imaraykun necesitanchis?

4. ¿Imatan yuyaykunku runakuna iñiymanta, imaraykun pantasqata yuyaykunku?

4 Iñiyqa ancha munaymi, kay libropin yachasunchis Bibliapi tarikuq wakin runakunamanta, paykunaqa ancha chaninpaqmi qhawariqku iñiytaqa. Kay tiempopin ichaqa askha runakuna pisichanku iñiyta, chayqa llakikunapaqmi. Paykunapaqqa iñiyqa yanqapi creeymi, mana ima pruebapas kashaqtin imapipas creey. Ichaqa, ¿chhaynachu? Manan. Cheqaq iñiyqa manan ñoqanchispa qhawarisqanchisman hina imapipas creeyllachu otaq hawan ukhunta Diospi creeychu.  Sonqonchispi imatapas allinpaq qhawarisqanchisqa q’otuwasunmanmi, sapa p’unchaymi chayqa cambian. Cheqaq iñiyqa manataqmi Diospi yanqa creeyllachu, Bibliaqa ninmi: “Supaykunapas creenkun, manchakuymantataq khatatatanku”, nispa (Sant. 2:19).

5, 6. a) ¿Ima iskay mana rikuna kaqkunapin iñinchis? b) ¿Ima rikch’anachiymi rikuchin iñiyninchis allin qaqa kananta?

5 Qhawarisun imatachus cheqaq iñiymanta Bibliaq nisqanta (leey Hebreos 11:1). Pablon willarqan iñiyqa iskay mana rikuna kaqkunata cheqaqpaqpuni creey kasqanta. Huknin kaqqa ‘mana rikukuq’ cheqaq kaqkunan. Ñawinchisqa manan rikunmanchu Jehová Diosta, Churinta, hanaq pachapi kamachikushaqña Diospa Reinontapas, ichaqa chaykunaqa cheqaqmi. Iskay kaqqa manaraq sucedesqankunata ‘suyakuymi’, huknin suyakusqanchisqa hamuq tiempopi mosoq pachan, chaytaqa manan rikunchisraqchu. Ichaqa kanmi pruebakuna mana rikusqanchis kaqkunapi, suyakushasqanchiskunapipas iñinapaq.

6 Apóstol Pablon willan cheqaqta iñinapaqqa pruebakuna kananta. Nirqanmi iñiyqa ‘suyasqanchista cheqaqtapuni chaskinapaq yuyay’ kasqanta, chayqa t’ikrakullantaqmi “wasiq titulon” nispa. Kaypi yuyaykuy, huk runan huk wasita regalayta munasunki. Yaqapaschá chay wasiq titulonta qospa nisunki “kayqa wasiyki” nispa. Chayta nispaqa manan chay papel patapi kawsanaykitachu nishasunki, aswanpas chay documenton sut’ita rikuchin chay wasiqa qanpa kapusqanta, chhaynapin chay documentoqa wasiykipas kanman hina. Chay hinallataqmi imapipas iñinanchispaq pruebakunaq kasqanpas, chaykunaqa sut’in rikukun, cheqaqmi. Mana pruebakuna kaqtinqa manan cheqaq iñiyniyoqchu kasunman.

7. ¿Iman cheqaq iñiy?

7 Chay hinaqa cheqaq iñiyqa mana iskayaq kaymi, tukuy sonqo Jehová Diospi confiaymi. Paytaqa munakuq taytata hinapunin qhawarinanchis, manataqmi iskayananchischu promesankunata hunt’ananpi. Kawsananchispaqqa necesitanchismi mikhuyta chay hinallataqmi iñiypas, mana chinkananpaqqa allinkunatan ruwananchis (Sant. 2:26).

8. ¿Imaraykun iñiyniyoq kananchis?

8 ¿Imaraykun iñiyniyoq kananchis? Pablon willawanchis ancha importante kasqanmanta (leey Hebreos 11:6). Mana iñiyniyoq kaspaqa manan Jehová Diosman asuykuyta atisunmanchu, nitaqmi paypa sonqonpaq hinapas kawsayta atisunmanchu. Chayraykun iñiyniyoqpuni kananchis Diosman asuykunapaq, payta hatunchanapaqpas, chay  ruwaymi imamantapas aswan importanteqa.

9. ¿Imaynatan Jehová Dios rikuchirqan iñiyniyoq kay necesitasqanchista?

9 Jehová Diosqa yachanmi mayta iñiyniyoq kayta necesitasqanchista, chayraykun allin iñiyniyoq runakunamanta willawanchis paykuna hina iñiyniyoq kanapaq. Hinaspapas Diospa llaqtanpin tarinchis allin iñiyniyoq iñiqmasikunata, chaymi Biblia niwanchis ‘iñiyninkuta qatikunapaq’ (Heb. 13:7). Pabloqa rimallarqantaqmi ñawpa tiempopi Diosta serviq “ancha askha” runakunamanta, paykunan allin iñiyniyoq karqanku (Heb. 12:1). Hebreos 11 capitulopin wakillanmanta rimarqan. Bibliaqa askha qharikunaq, warmikunaq, wayna-sipaskunaq, wawakunaq kawsayninkumantan willan. Kay tiempopiqa iñiyniyoq kayqa chinkapushanmi, chayraykun allinpuni kanqa paykunamanta yachay.

¿Imaynapin paykuna hina iñiyniyoq kasunman?

10. ¿Imaynatan sapallanchispi estudiasqanchis yanapawasunman Bibliapi tarikuq runakuna hina iñiyniyoq kanapaq?

10 Pitapas mana allinta reqsispaqa manan pay hina kayta atisunmanchu. Chayraykun kay librota ruwamuspaqa allinta t’aqwikurqan allin iñiyniyoq runakunaq kawsayninta, chhaynapi paykunata allinta reqsinaykipaq. Ichaqa ama kay libropi yachasqaykillawanchu contentakuy. Sapallayki estudiasqaykipi huk qelqanchiskunapipas astawanraq paykunamanta yachay. Sapanka willakuyta rikushawaqpas hinata leey hinaspataq yuyaymanay. Leespaqa chaypipas kashawaq hinata leey, qhawariy orqokunata, reparay q’apaykunata ladoykipi imakunachus sucedesqantapas. Astawanqa chay runapas kawaq hinata qhawarikuy hinaspa reparay imayna sientekusqanta imata yuyaykusqantapas. Chaykunata ruwanki chayqa manan cuentopi runakunata hinachu paykunata qhawarinki, allintapunin chay runakunata reqsinki, chhaynapin paykunata qhawarinki unaymantañapas amigontin kawaqchis karqan hinata.

11, 12. a) ¿Imaynapin Abrahamwan Sarawanpas kashasunman hina sientekusunman? b) ¿Imaynatan yanapawasunman Anamanta, Eliasmanta Samuelmantapas yachasqanchis?

11 Chay hunt’aq sonqowan Diosta serviq runakunata reqsispaqa paykuna hina kaytan munanki. Paykunamanta yachayqa kaykunapin yanapawasunman: Yaqapaschá invitasunkikuman predicaqkunaq necesitakusqan llaqtakunapi predicanaykipaq, otaq nisunkikuman hukniraymanta predicanaykipaq chaytataq sasa ruwayta manchakunapaq hina qhawariwaq. Chhaynapi tarikuspa allinta yuyaykuspa Diosmanta mañakuqtiykiqa  Abrahampa kawsayninpi yuyaymanaymi yanapasunki. Abrahampas Sarapas Ur llaqtapi allin kawsayninkutan saqerqanku, chay ruwasqankumantan askha bendicionkunata chaskirqanku. Abraham hina Sara hina ruwaspaqa paykunawanpas kashawaq hinan sientekunki.

12 Yuyaykuy kaypi, yaqapaschá pi reqsisqaykipas mana allinta tratarqasunki, chay hawa sinchita llakikuspataq manaña huñunakuykunamanpas riyta munankiñachu. Chhaynapi tarikuspaqa yaqapaschá Anaq kawsayninpi yuyaymanay yanapasunkiman, Peninaña mana allinta tratarqan chaypas payqa manan saqerqanchu Jehová Dios yupaychayta. Anaq ruwasqanqa yanapasunkin allinta decidinaykipaq, chhaynapin Anaqa amigayki hina kanqa. Chaymantapas sichus mana valeqpaq hina qhawarikunki, kallpachakusqaykipas yanqapaq hina kasqanta qhawarinki chayqa, yaqapaschá Elías hina sientekushanki, payqa imaymana pruebakunapin tarikurqan ichaqa Jehová Diosmi sonqocharqan. Wayna-sipaskunatapas qhelli ruwaykunapi puriq compañeronkunan tanqankuman paykuna hina kanankupaq, chhaynapi tarikuqkunataqa Samuelpa imayna kasqanmi yanapanman, payqa manan qatikurqanchu yupaychana karpapi Elipa churinkunaq mana allin ruwasqankuta.

13. ¿Ñawpa tiempopi Diosta serviqkunaq iñiyninta qatikusqanchisraykuchu iñiyninchis aswan pisi kanman?

13 Ichaqa ñawpa tiempopi Diosta serviqkunaq iñiyninta qatikusqanchisraykuqa manan yuyaykunanchischu iñiyninchispas aswan pisi kanman hinataqa. Bibliapunin kallpachawanchis chay runakuna hina kananchispaq (1 Cor. 4:16; 11:1; 2 Tes. 3:7, 9). Kay libropi tarikuq wakin runakunapas paykunaq ñawpaqninta Diosta serviqkunatan qatikullarqankutaq. Hukninmantan 17 capitulopi yachasunchis, chaypin willashan Diosmanta mañakuspa Anaq rimasqanta hina Mariapas yaqa kaqllatataq rimasqanta, chaymi rikuchin Mariaqa Ana hina ruwasqanta. ¿Chayraykuchu Mariaq iñiynin aswan pisi kanman? Manan. Anaq imayna kasqanmi Mariataqa yanaparqan Jehová Diospi astawan confiananpaq, allin qhawarisqan kananpaqpas.

14, 15. ¿Imayna ruwasqan kay libro kashan, imatan ruwananchis allinta yanapawananchispaq?

14 Kay libroqa ruwakamurqan allin iñiyniyoq kanapaqmi. Kaypi willakuykunaqa lloqsimurqanñan 2008 watamantapacha 2013 watakama Qhawaq revistapi, “Paykuna hina kay” nisqa yachachikuypi. Ichaqa kay libropiqa kashanmi huk yachachikuykunapas. Tapukuykunaqa sapanka capitulota allinta t’aqwinapaqmi yanapawasun,  reparachiwasunmi chaypi kaq yachachikuykuna imaynapi allinninchispaq kasqanta. Wakin dibujokunapas kay librollapaqmi ruwakamurqan ancha munaytaqmi kashanpas, wakintaqa astawanmi hatunyachikamurqan. Huk yanapaykunapas kashanmi, watakunaq pasasqanman hina sucedesqanmanta willakuymi kashan hinallataq iskay mapakunapas. Kay librotaqa estudiasunmanmi sapallanchispipas iñiq t’aqapipas. Familiakunapas llapallankun kuska estudiankuman. ¡Leespallaraqmi anchata kusikunkichis!

15 Kay libroqa yanapawasunpunin ñawpa tiempopi Diosta serviqkuna hina iñiyniyoq kanapaq. Leespaqa aswan allin iñiyniyoqmi kasun, hanaq pacha Taytanchismanpas astawanmi asuykusun.