Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 77 WILLAKUY

Manan imapas k’umuchiranchu

Manan imapas k’umuchiranchu

¿UYARIRANKICHU kay kinsa waynakunamanta? Arí, Danielpa amigonkunan, paykunaqa manan mikhurankuchu kamachikuqpa mikhunanta. Babiloniapi runakunan sutichanku Sadrac, Mesac, Abednego, nispa. Qhawariy paykunata. ¿Ima raykun mana wakinkuna hinachu k’umuykunku kay hatun imagenman? Chaymanta yachasun.

¿Yuyashankichu Jehová Diospa qelqasqan Chunka Kamachikuykunata? Ñawpaq kaqmi nin: ‘Aman huk dioskunata yupaychankichu,’ nispa. Kay waynakunaqa chay kamachikuytan kasukushanku sasaña kaqtinpas.

Babiloniapi kamachikuq Nabucodonosormi waqyachin askha umalliqkunata, paypa ruwachisqan imagenta yupaychanankupaq. Llapa runakunatan nin: ‘Pututukuna, arpakuna, imaymana instrumentokuna tocasqankuta uyarispan, k’umuykuspa yupaychankichis qorimanta ruwasqay imagenta. Mana qonqorikuspa yupaychaqqa rawrashaq hornomanmi wikch’uykusqa kanqa,’ nispa.

Sadracpas, Mesacpas, Abednegopas mana k’umuykusqankuta yachaspan, Nabucodonosorqa sinchita phiñakun. Chaymi paykunata waqyachin. Hukmantan kamachin k’umuykuspa yupaychanankupaq. Waynakunan ichaqa Jehová Diosmanta hap’ipakunku. Paykunan ninku: ‘Servisqayku Diosqa atiyniyoqmi yanapawanankupaq. Manaña qespichiwaqtinkupas manan k’umuykusaqkuchu qorimanta ruwasqayki imagenmanqa,’ nispa.

Kayta uyarispan Nabucodonosorqa astawanraq phiñakun. Chay qayllapin kan horno, chaymi kamachin: ‘¡Qanchis kutita hornota q’oñichimuychis!’ nispa. Chaymi ejercitonpi kallpasapa qharikunata kamachin, Sadracta, Mesacta, Abednegotawan t’eqespa hornoman wikch’uykunankupaq. Horno sinchi rupha kaspanmi wikch’uyuq kallpasapa qharikunata rupharparispa wañuchiran. ¿Iman suceden hornoman wikch’uykusqanku kinsa waynakunata?

Horno ukhuta qhawarispan kamachikuqqa sinchita mancharikun. ‘¿Manachu kinsa waynakunata t’eqespa ruphashaq hornoman wikch’uyuranchis?’ nispan tapun.

‘Arí, chaytan ruwayku,’ ninkun kamachikunaqa.

Kamachikuqmi nin: ‘Ñoqan ichaqa rikushani ninapi purikuq tawa runakunata. Mana watasqan kashanku, ninapas manan imananpaschu. Tawa kaqtaqmi dios hina,’ nispa. Horno punkuman asuykuspan kamachikuq qaparin: ‘¡Sadrac! ¡Mesac! ¡Abednego! ¡Hanaq pacha Diospa kamachinkuna, lloqsimuychis!,’ nispa.

Lloqsimuqtinkun lliw runa rikunku ninaq mana imanasqanta. Kamachikuqmi nin: ‘¡Hatunchasqa kachun, Sadracpa, Mesacpa, Abednegopa Diosnin! Manan paykunataqa imapas huk diosman k’umuykachinchu, chaymi Diosninkuqa angelninta kachamun paykunata qespichinanpaq,’ nispa.

¿Manachu ñoqanchispaq allin ejemplo imaymanapi Jehová Diosta kasukunanchispaq?

Éxodo 20:3; Daniel 3:1-30.