Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 59 WILLAKUY

Ima rayku David ayqekun

Ima rayku David ayqekun

DAVID Goliatta wañuchisqan qhepatan, Israel ejercitopi umalliq Abner Saulman Davidta pusan. Ejercitonpi umalliq kananpaqmi Saulqa Davidta churan, hinaspan qhepachin wasinpi tiyananpaq.

Filisteokunawan maqanakusqankumanta soldadokuna kutimuqtinmi warmikuna takinku: ‘Saulmi waranqanpi wañuchin, Davidtaq chunka waranqanpi,’ nispa. Saulqa cheqnipakunmi paymanta aswanta Davidta hatunchaqtinku. Saulpa churin Jonatanmi ichaqa mana cheqnipakunchu. Munakunmi Davidta, paypas munakullantaqmi Jonatanta. Chay raykun prometenakunku amigontin kanankupaq.

Davidqa sumaqtan arpata tocan, Saulqa kusikunmi paypa tocasqanwan. Huk p’unchaymi ichaqa cheqnipakuspa Davidta wañuchiyta munan. Arpata tocashaqtinmi Saulqa lanzawan ch’aqen: ‘¡Perqamanmi Davidta ch’antasaq!,’ nispa. Davidqa laq’ochiranmi lanza mana hap’inanpaq. Huk kutipipas Saulqa pantallantaqmi Davidman lanzata ch’aqespa. Chaywanmi Davidqa reparakun Saulpa wañuchiy munasqanta.

¿Yuyashankichu Saulpa prometesqanta? Payqa niranmi ususiytan qosaq Goliatta wañuchiq runaman, nispa. Chay raykun Saulqa Davidman qonqa ususin Micalta paywan casarakunanpaq, ñawpaqtan ichaqa 100 filisteokunataraq wañuchinan. ¡Yuyaykuy chaypi! Saulqa munan filisteokuna Davidta wañuchinanta. Manan ichaqa wañuchinkuchu, chaymi Saulqa ususin Micalta Davidman qon warmin kananpaq.

Huk p’unchaymi Saulqa willan churin Jonatanman kamachinkunamanpas Davidta wañuchiy munasqanta. Jonatanmi taytanta nin: ‘Ama imanaypaschu Davidtaqa. Manan payqa hayk’aqpas imanarasunkipaschu. Aswanmi kawsayninta peligropi churaspa Goliatta wañuchiran, chayta rikuspaqa qanpas kusikurankin,’ nispa.

Saulqa uyarinmi churinpa nisqanta, manan Davidta imanasaqpaschu, ninmi. Hukmantan Davidta pusanku Saulpa kamachisqanta ruwananpaq. Huk p’unchaymi arpata David tocashaqtin Saulqa hukmanta lanzawan ch’aqellantaq. David laq’ochiqtinmi lanzaqa perqaman chayan. ¡Kaywanqa kinsa kutitañan wañuchiyta munan! ¡Chaymi Davidqa Saulmanta ayqekun!

Chay tutan Davidqa wasinta ripun, Saultaq runakunata kamachin Davidta wañuchinankupaq. Micalpas yachanmi taytanpa wañuchiy munasqanta. Davidtan nin: ‘Kunanpacha ripuy, mana chayqa wañusqan paqarinki,’ nispa. Chay tutan Micalqa Davidta yanapan ventananta ayqekunanpaq. Qanchis wata hinan Davidqa Saulmanta pakakun, huk cheqasmanta huk cheqasman rispa.

1 Samuel 18:1-30; 19:1-18.