Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 57 WILLAKUY

Davidta Dios akllan

Davidta Dios akllan

¿RIKUSHANKICHU kaypi sucedesqanta? Kay waynachan ukumarimanta ovejachata qechushan. Ukumarin ovejachata apasqa mikhunanpaq. Kay waynachan ichaqa ukumarita qatispa siminmanta chay ovejachata qechumuran. ¡Ukumari sayariqtinmi waynachaqa mat’inpi rumiwan warak’aspa wañuchin! Huk kutipiqa leonmantañataqmi kay waynacha ovejachata qechuran. Kaykuna ruwaqqa mana manchakuq waynachan. ¿Pitaq kay waynachari?

Davidmi. Belén llaqtapin tiyan. Rutpa Boozpa churin Obedmi abuelon karan. ¿Yuyashankichu paykunamanta? Davidpa taytanqa Jesé sutiyoqmi. Taytanpa ovejankunatan Davidqa michiran. Saulta Israelpi kamachiq kananpaq Jehová Dios akllasqanmanta 10 wata qhepatañan Davidqa naceran.

Tiempo chayamuqtinmi Jehová Diosqa Samuelta nin: ‘Sumaq aceiteta aparikuspa riy Belén llaqtapi Jesepa wasinta. Huknin churintan kamachikuq kananpaq akllani,’ nispa. Jesepa kuraq churin Eliabta rikuspan Samuelqa yuyaykun: ‘Kaypunin kanman’ nispa. Jehová Diosmi ichaqa nin: ‘Ama hatun kasqantachu, nitaq sumaq rikch’ayniyoq kasqantachu qhaway. Manan paytachu akllani kamachiq kananpaq,’ nispa.

Chaymi Jeseqa Abinadabta waqyaspa Samuelman pusan. Samuelmi nin: ‘Manan paytapas Jehová Diosqa akllanchu,’ nispa. Chaymantan Jeseqa Sama churinta pusamun. ‘Manan, manan paytapas Jehová Diosqa akllanchu,’ ninmi Samuelqa. Qanchis churinkunatan Jeseqa Samuelman pusan, Jehová Diosmi ichaqa mana mayqentapas akllanchu. ‘¿Chayllachu churiykikuna?,’ nispan tapun Samuelqa.

Jesé nin: ‘Kanraqmi sullk’a kaq. Ovejakunatan michishan,’ nispa. Davidta pusamuqtinmi, Samuelqa rikun sumaq rikch’ayniyoq kasqanta. ‘Kaymi akllasqay, paypa umanman aceiteta hich’ay,’ ninmi Jehová Dios. Chaytan Samuelqa ruwan. Qhepamanmi Davidqa Israelpi kamachiq kanqa.

1 Samuel 17:34, 35; 16:1-13.