Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 5 WILLAKUY

Sasa kawsay qallarin

Sasa kawsay qallarin

EDÉN huertamanta qarqochikuspan Adanwan Evawanqa askha sasachakuykunapi tarikuranku. Ñak’ariywanmi llank’aranku mikhunankupaq. Sumaq ruruq sach’akuna wiñanantaqa, khiskakuna kisakunan tukuypi wiñaran. Kayqa sucederan Adanpas Evapas Diospa kamachisqanta mana kasukusqankumanta, manaña Diospa amigon kasqankumantawan.

Astawanqa, wañuytan qallariranku. Yuyariy: Diosqa niranmi hark’asqay sach’aq rurunmanta mikhunkichis chayqa wañunkichismi, nispa. Mikhusqanku p’unchaymi wañuyta qallariranku. ¡Mana yuyayniyoq kayninkupin Diosta mana kasukurankuchu!

Edén huertamanta qarqochikusqanku qhepatañan Adanwan Evawanqa wawayoq karanku. Chay raykun wawankupas machuyaspa wañunanku karan.

Adanpas Evapas Jehová Diosta kasukuspaqa, kusisqan kawsankuman karan paykunapas wawankupas. Wiñaypaqmi kusisqa kay Allpapi tiyankuman karan. Manan pipas machuyananchu, onqonanchu nitaq wañunanpaschu karan.

Diosqa munan wiñaypaq kusisqa runakunaq kawsanantan, chaytan payqa prometen. Manan Allpallachu sumaq kanqa, llapa runan qhali kawsanqa. Llapankun amigontin kanqaku Dioswanpas runamasinkuwanpas.

Eva ichaqa manan Diospa amiganñachu karan. Chaymi ñak’arispa sinchi nanaywan wachakuran. Arí, Jehová Diosta mana kasukuspanmi sinchi nanaypi tarikuran, ¿riki?

Adanwan Evawanqa askha warmi-qhari wawakunayoqmi karanku. Phiwi wawankutan Caín sutita churaranku. Iskay kaq wawankutataq Abel sutita. ¿Iman paykunata sucederan?

Génesis 3:16-23; 4:1, 2; Apocalipsis 21:3, 4.