Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 9 WILLAKUY

Noé arcata ruwan

Noé arcata ruwan

NOEQA huk warmiyoq, kinsa churiyoqmi karan. Churinkunaq sutinmi Sem, Cam, Jafet. Sapanka churinmi warmiyoqkama karanku. Chaymi Noepa familianpiqa pusaq karanku.

Runakunaq mana hayk’aq rikusqanta ruwananpaqmi Diosqa Noeta kamachiran. Niranmi hatun arcata ruwanki, nispa. Arcaqa barco hina hatunmi karan, ichaqa hatun cajamanmi rikch’akuran. Diosmi niran: ‘Ruway kinsa pata altosniyoqta, chaypitaq wasikunata ruwanki’ nispa. Chay cuartokunan karan Noepaq, familianpaq, animalkunapaq, mikhuna waqaychanapaqwan.

Diosmi Noeta kamachiran arcata ruwananpaq unu mana haykunanpaq hina. Niranmi: ‘para unuwan millp’uchisaq kay pachapi hayk’an kawsaqta p’uchukachinaypaq, arcaman mana haykuqkunaqa llapanmi wañunqaku,’ nispa.

Diosta kasukuspan Noepas churinkunapas ruwayta qallariranku. Llapa runakunan ichaqa asikuranku. Manan saqerankuchu mana allin ruwayninkuta. Manan pipas Noeta creeranchu Diosmi parachimunqa nispa willaqtin.

Hatun kaqtinmi arcataqa unay tiempopi ruwaranku. Askha watapin ruwayta tukuranku. Chaymantan Diosqa Noeta kamachiran animalkunata arcaman qatiyunanpaq. Wakin animalkunatan iskayta churanki orqo-chinantinta, nispan kamachiran. Huk animalkunatataq qanchista, nispa. Nillarantaqmi imaymana phalaq animalkunata arcaman apayunanpaq. Noeqa Diospa nisqanman hinapunin ruwaran.

Chaymantan Noepas familianpas arcaman haykuranku. Chayraqmi Diosqa punkuta wisq’aran. Arca ukhupin Noepas familianpas suyaranku. Yuyaykuy qanpas arcapi suyasqaykita. ¿Kanmanchu millp’uq para unu Diospa nisqan hina?

Génesis 6:9-22; 7:1-9.