Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 8 CAPÍTULO

Diospa gobiernon

Diospa gobiernon

1. ¿Ima reqsisqa mañakuymantan kay capitulopi yachasun?

MILLONNINPI runakunan reqsinku “Yayayku” nisqa mañakuyta. Jesusmi chay mañakuytaqa discipulonkunaman yachachiran imayna mañakuyta yachanankupaq. ¿Imakunamantan mañakuran? ¿Imaraykun noqanchispaq importante chay mañakuy?

2. ¿Imakunamanta mañakunankupaqmi Jesús yachachiran?

2 Jesusmi niran: “Qankunaqa khaynatan mañakunkichis: ‘Yayayku janaq pachapi kaq, sutiyki ch’uyapaq jap’isqa kachun. Gobiernoyki jamuchun. Munayniyki ruwakuchun janaq pachapipas kay pachapipas’”, nispa (leey Mateo 6:9-13; qhaway willakuyta). ¿Imaraykun Jesús chaykunamanta mañakunankupaq yachachiran? (Qhaway 20 willakuyta.)

3. ¿Imakunamantan kay capitulopi yachasun?

3 Yacharanchisñan Diospa sutinqa Jehová kasqanta, runakunapaq kay allpapaq imatachus Dios munasqanmantapas. Ichaqa, ¿imatan Jesús nisharan “gobiernoyki jamuchun” nispa nisqanwan? ¿Iman Diospa gobiernon? ¿Imatan chay gobierno ruwanqa? ¿Imaynatan Diospa sutinta ch’uyanchanqa? Chaykunamantan kay capitulopi yachasun.

DIOSPA GOBIERNON

4. ¿Pitan Dios ajllaran gobiernonpi kamachinanpaq?

4 Jehová Diosmi janaq pachapi juj gobiernota jatarichiran, chay gobiernopi rey kananpaqtaq Jesusta  ajllaran. Chaytan Biblia sutichan Diospa gobiernon nispa. Chaymi Jesusta nikun: ‘Reykunaq reynin, señorkunaq Señornin’, nispa (1 Timoteo 6:15). Jesusqa gobiernokunaq mana ruway atisqantan ruwanqa. Jinaspapas Jesusqa aswan atiyniyoqmi llapa juñunasqa gobiernokunamantapas.

5. ¿Maymantan Diospa gobiernon kamachimunqa? ¿Maytan kamachinqa?

5 Kausarisqanmanta 40 p’unchay qhepamanmi Jesusqa janaq pachaman kutipuran. Qhepamantaq Diosqa Jesusta gobiernonpi rey kananpaq nombraran (Hechos 2:33). Diospa gobiernonqa janaq pachamantan kay allpata kamachimunqa (Apocalipsis 11:15). Chaymi ‘janaq pacha gobierno’ nispa nikun (2 Timoteo 4:18).

6, 7. ¿Imaraykun Jesús aswan allin kamachikuq?

6 Bibliapin willan lliu kamachikuq runamantapas Jesús aswan allin kamachikuq kasqanta. ¿Imarayku? ‘Mana jayk’aq wañuq’ kasqanrayku (1 Timoteo 6:16). Kamachikuq runakunaqa llapankun wañunku, Jesusmi ichaqa mana jayk’aqpas wañunqachu. Chaymi ruwasqankunaqa wiñaypaq kanqa.

7 Chaymantapas Biblian willan Jesusqa allin rey khuyapayakuq kasqanta. Juj profecian Jesusmanta niran: ‘Señor Diospa espiritunmi paywan kashallanqa, ajinapin yachayniyoq allin yuyayniyoq kanqa, payqa kusa yuyaykuqmi allin kallpayoqmi kanqa, Señor Diospa munaynintan reqsinqa, paytan manchakunqa. Manan payqa ñawinpa rikusqanman jinallachu juzganqa, manataqmi rimayta uyarispallachu juchachanqapas. Chanin kayman jinan sarunchasqakunata juzganqa’,  nispa (Isaías 11:2-4). ¿Munawaqchu chhayna reyniyoq kayta?

8. Jesusqa manan sapallanchu kamachimunqa, ¿imaynapin chayta yachanchis?

8 Biblian willan Jesuswan kuska janaq pachapi kamachimunankupaq wakin runakunata Dios ajllasqanta. Chaymi apóstol Pablo Timoteota niran: “Tukuy imatapas aguantasun chayqa, paywan kuskan rey kasun”, nispa (2 Timoteo 2:12). ¿Jayk’a runakunan Jesuswan kuska kamachimunqaku?

9. a) ¿Jayk’a runakunan Jesuswan kamachimunqaku? b) ¿Jayk’aqmantapachan Jehová Dios 144.000 cristianokunata ajllayta qallariran?

9 Ñaupaq capitulopi yachasqanchis jina apóstol Juanmi juj rijuriypi Jesusta 144.000 reykunatawan rikuran. ¿Pikunan kanku 144.000 reykuna? Apóstol Juanmi kutichin: “Paykunaqa corderoq qhepallantan purinku, maytaña riqtinpas”, nispa. Nillarantaqmi: “Paykunaqa runakuna ukhumantan rantisqa karanku”, nispa (leey Apocalipsis 14:1, 4). Jesusmi corderoqa, 144.000 reykunataq Jesuswan kuska kamachimunankupaq Dios sonqo cristianokuna kanku. Paykunaqa wañupuspan janaq pachapi kausarinku (Apocalipsis 5:10). Diosqa apostolkunaq tiemponmantapachan 144.000 cristianokunata ajllayta qallariran.

10. Diosqa munakuwaspanchismi Jesusta 144.000 runakunatawan ajllaran kamachimunankupaq, ¿imaraykun chayta ninchis?

10 Diosqa munakuwaspanchismi Jesusta runakunatawan ajllaran kamachimunankupaq, ¿imaraykun chayta ninchis? Jesusqa noqanchis jina runa kaspan sufriran, chaymi khuyapayawasun. Apóstol Pablo niran: ‘Jesusqa allintan yachan imayna sientekusqanchista  pisipasqanchistapas, noqanchis jinataq imaymana pruebakunata pasaran’, nispa (Hebreos 4:15; 5:8). 144.000 ajllasqa cristianokunapas pantaqmi karanku onqoykunawantaq sufriranku. Chaymi Jesuspas ajllasqa cristianokunapas entiendewasun imayna sientekusqanchista problemanchiskunatapas.

¿IMATAN DIOSPA GOBIERNON RUWANQA?

11. ¿Imaraykun Jesús yachachiran janaq pachapi Diospa munaynin ruwakunanpaq mañakunankuta?

11 Jesusmi discipulonkunaman yachachiran Diospa munaynin janaq pachapi ruwakunanpaq mañakunankuta. ¿Imarayku? 3 capitulopin yacharanchis Satanasqa Diospa contranpi jatarisqanta. Jehová Diosmi Satanasta mana kasukuq angelkunatawan permitiran juj tiempo janaq pachapi kanankuta. Chaymi mana llapankuchu janaq pachapiqa Diospa munayninta ruwasharanku. 10 capitulopin astawan yachasun Satanasmanta supayninkunamantawan.

12. ¿Imakunamantan Apocalipsis 12:10 textopi willashan?

12 Bibliaqa willaranñan Jesús rey kananpaq nombrasqa kasqan qhepaman Jesuswan Satanaswan maqanakunankuta (leey Apocalipsis 12:7-10). Apocalipsis 12:10 textopin willashan imakuna pasasqanta. Ñaupaqtaqa Jesusmi janaq pachapi kamachikuyta qallariran, chaymantataq Satanasta kay allpaman wijch’uykamuranku, chaykunaqa ñan junt’akunña.

13. ¿Iman janaq pachapi pasaran Satanás wijch’uykamusqa kaqtin?

13 Kasukuq angelkunaqa anchatan kusikuranku Satanaswan supayninkunawan kay pachaman wijch’uykamusqa kaqtinku. Bibliapin nin: “¡Kusikuychis janaq pachapi kaqkuna!”, nispa (Apocalipsis 12:12). Kunanqa  thaj kausaymi janaq pachapiqa kan llapanku Diospa munayninta ruwasqankurayku.

Satanasta janaq pachamanta wijch’uykamusqankuraykun imaymana sufrimiento kashan, ichaqa tukupunqañan

14. ¿Imaynan kay allpapi kausay kashan Satanasta wijch’umusqankurayku?

14 Kay allpapin ichaqa imaymana sufrimiento kashan. Biblia nin: “Saqran sinchi phiñasqa qankunaman uraykamushan, yachanmi payqa tiempon pisillaña kasqantapas”, nispa (Apocalipsis 12:12). Janaq pachamanta wijch’umusqankuraykun Satanasqa sinchi phiñasqa kashan, yachantaqmi pisi tiempollamanta wañuchisqa kananta. Chaymi imaymanata ruwashan runakunata sufrichinanpaq.

15. ¿Imatan Dios munan kay allpapaq?

15 Kay allpapaq Diospa munasqanqa manan cambianchu. Jehová Diosqa munanmi kay allpa paraíso kananta, runakunapas perfecto kaspa wiñaypaq tiyanankuta (Salmos 37:29). ¿Imaynatan Diospa gobiernon chaykunata ruwanqa?

16, 17. ¿Imatan niwanchis Daniel 2:44 texto Diospa gobiernonmanta?

16 Daniel 2:44 texton nin: “Chay reykuna kamachikushaqtinmi, janaq pacha Diosqa mana jayk’aq thunikuq suyuta [otaq gobiernota] sayarichinqa, manataqmi waj suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”, nispa. ¿Imatan chay profecía Diospa gobiernonmanta yachachiwanchis?

17 Ñaupaqta niwanchis kay pachapi gobiernokuna kamachikushaqtin Diospa gobiernon kamachikuyta qallarinan kasqanta. Iskaypitaq niwanchis Diospa gobiernon wiñaypaq kananta. Kinsapitaq niwanchis kay pacha gobiernokuna Diospa gobiernonwan  maqanakunankuta. Diospa gobiernonmi ichaqa atipanqa, jinaspa mundontinta kamachimunqa. Chay gobierno jinaqa manan jayk’aqpas kanqachu.

18. ¿Ima nispan sutichakun Diospa gobiernonwan kay pacha gobiernokunawan guerrata?

18 ¿Iman pasanqa kay pacha gobiernokuna Diospa gobiernonwan manaraq maqanakushaqtinku? Supaykunan “llapa reykunata” engañanqaku ‘tukuy atiyniyoq Diospa jatun p’unchaynin guerraman juñumunankupaq’. Chay guerratan “Armagedón” nispa sutichakun, chaypin kay pacha gobiernokuna Diospa gobiernonwan maqanakunqaku (Apocalipsis 16:14, 16; qhaway 10 willakuyta).

19, 20. ¿Imaraykun Diospa gobiernonta necesitanchis?

19 ¿Imaraykun Diospa gobiernonta necesitanchis? Kinsa razonmi kan. Ñaupaqta: Juchayoq runan kanchis, chaymi onqonchis wañunchispas. Diospa gobiernon kamachimuqtinmi ichaqa wiñaypaq kausasun. Biblia nin: “Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq”, nispa (Juan 3:16).

20 Iskay kaq razontaq kay: Millay runakuna ukhupin kausanchis. Askha runakunan llullakunku, engañanku, qhelli kausaypi purinku. Noqanchisqa manan chaykunataqa tukuchiyta atisunmanchu. Diosmi ichaqa atinqa. Vidankuta mana cambiaqkunataqa Armagedón guerrapin wañuchipunqa (leey Salmos 37:10). Kinsa kaq razontaq kay: Kay pachapi kamachikuqkunaqa mana allin kamachikuqmi kanku, manataq problemanchiskunata allichayta atinkuchu, nitaq  runakunata kallpachankuchu Diosta kasukunankupaq. Chaymi Biblia nin: ‘Runaqa runamasinta mana allinta ruwananpaqmi kamachin’, nispa (Eclesiastés 8:9).

21. Diospa gobiernon, ¿imaynatan Diospa munayninta kay allpapi ruwachinqa?

21 Armagedón qhepata Diospa gobiernon kamachimuqtinmi kay allpapi Diospa munaynin ruwakunqa. Chay tiempopiqa Satanaspas supayninkunapas wisq’asqan kanqaku (Apocalipsis 20:1-3). Jesuspa sacrificakusqanraykun manaña pipas onqonqachu. Llapa kasukuq runakunapas wiñaypaqmi paraisopi tiyanqaku (Apocalipsis 22:1-3; qhaway 21 willakuyta). Chaymantapas llapa runakunan Diospa sutinta respetanqaku, chhaynapin Diospa sutin ch’uyapaq jap’isqa kanqa.

¿JAYK’AQMI JESÚS KAMACHIKUYTA QALLARIRAN?

22. Jesusqa manan kay allpapi kashaspachu nitaq janaq pachaman kutipuspa jinachu kamachiyta qallariran, ¿imaynapi chayta yachanchis?

22 Jesusmi discipulonkunaman yachachiran “gobiernoyki jamuchun” nispa mañakunankupaq. Chhaynaqa manaraqmi chay tiempopiqa Diospa gobiernonqa kamachisharanchu. Ñaupaqtaqa Diosmi juj gobiernota jatarichispa Jesusta reyta nombranan karan. ¿Janaq  pachaman kutipuqtin jinachu Jesús nombrasqa karan? Manan. Jesuspa kausarisqan qhepamanmi apóstol Pedropas Pablopas willaranku Salmos 110:1 textopi kaq profecía Jesuspi junt’akusqanta, chay profeciapin Jehová Dios niran: “Paña ladoypi tiyaykuy, enemigoykikunata chaki sarunaykiman churanaykama”, nispa (Hechos 2:32-35; Hebreos 10:12, 13). Chaywanmi yachanchis Jesusqa rey jina nombrasqa kananpaqqa suyananraq kasqanta.

Diospa gobiernonmi Diospa munayninta kay allpapi ruwachinqa

23. a) ¿Jayk’aqmi Jesús kamachiyta qallariran? b) ¿Imamantan qatimuq capitulopi yachasun?

23 Askha watakunañan cheqaq cristianokunaqa entienderanku 1914 watapi Bibliapi askha profeciakuna junt’akusqanta. Chay watamantapachan astawan yapakamuran guerrakuna, yarqaykuna, onqoykunapas. Jesuspas chay watapin Diospa gobiernonpi kamachikuyta qallariran (Salmos 110:2; qhaway 22 willakuyta). Chay qhepamanmi Satanasqa kay allpaman wijch’uykamusqa karan, kunanqa ‘pisillañan tiemponqa kashan’ (Apocalipsis 12:12). Qatimuq capitulopin yachasun chay tiempopi tiyashasqanchismanta. Yachasuntaq pisi tiempollamanta kay allpapi Diospa munaynin ruwakunanmanta.