Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 12 CAPÍTULO

¿Imatan ruwanayki Diospa amigon kanaykipaq?

¿Imatan ruwanayki Diospa amigon kanaykipaq?

1, 2. ¿Pikunan karanku Diospa amigonkuna?

¿IMAYNA runatan ajllakuwaq amigoyki kananpaq? Yaqapaschá munakuq, sumaq sonqo, piwanchus allinta entiendenakunki chay runata ajllakuwaq.

2 Jehová Diospas wakin runakunatan ajllakuran amigonkuna kanankupaq. Ejemplopaq, Abrahanmi karan Diospa amigon (Isaías 41:8; Santiago 2:23). Rey Davidpas Diospa sonqonpaq jinan karan (Hechos 13:22). Profeta Danielpas Diospa ancha munasqa amigonmi karan (Daniel 9:23).

3. ¿Imaraykun Jehová Diospa amigonkuna karanku Abrahán, David, Danielpas?

3 ¿Imaraykun Jehová Diospa amigonkuna karanku Abrahán, David, Danielpas? Abrahanqa Jehová Diospa ‘simintan kasukuran’ (Génesis 22:18). Chaywanmi yachanchis Diosqa kasukuq, humilde runakunaq amigon kasqanta. Jinaspapas Diosqa juj llaqtaq amigonmi kanman, chaymi Israel llaqtata niran: “Noqata kasuwaychis, noqan Diosniykichis kasaq, qankunataq llaqtay kankichis”, nispa (Jeremías 7:23). Qanpas Diospa amigon kayta munanki chayqa paytan kasukunayki.

JEHOVÁ DIOSQA YANAPANMI AMIGONKUNATA

4, 5. ¿Imaynatan Jehová Dios amigonkunata yanapan?

4 Biblian willan Diosqa ‘tukuy sonqowan serviqninkunaman atiyninta rikuchisqanta’ (2 Crónicas 16:9). Jinaspapas Salmos 32:8 textopin Diosqa amigonkunaman  prometen yachayta allin consejokunatapas qonanpaq.

5 Atiyniyoq enemigonchismi mana munanchu Diospa amigon kananchista. Diosmi ichaqa yanapayta munawanchis (leey Salmos 55:22). Diospa amigon kasqanchisraykun imapiña tarikuspapas tukuy sonqowan payta servinchis. Jinaspapas David jinan Diospi confianchis, chaymi pay jina ninchis: “Paña ladoypin [Diosqa] kashan, manan imapas urmachiwanqachu”, nispa (Salmos 16:8; 63:8).

¿IMA NINMI SATANÁS RUNAKUNAMANTA?

6. ¿Ima ninmi Satanás runakunamanta?

6 11 capitulopi yachasqanchis jina Satanasmi Jehová Dios contra jatarispa llullamanta tumparan. Nirantaq: “Diosqa manan dejanchu Adanwan Evawan allin kaqta mana allin kaqta decidinankuta”, nispa. Chaymantapas Job libropin Satanasqa Diospa amigonkunamanta khaynata niran: “Diostaqa manan munakusqankuraykuchu servinku, aswanpas interesraykullan. Munaspayqa Diospa contranpin pitapas jatarichiyman”, nispa. ¿Iman Jobta pasaran? ¿Imatan paymanta yachasunman? ¿Imaynatan Dios yanaparan? Chaykunamanta kunan yachasun.

7, 8. a) ¿Ima niranmi Jehová Dios Jobmanta? b) ¿Ima niranmi Satanás Jobmanta?

7 ¿Pin karan Job? Jobqa 3.600 watakuna ñaupaqtan kausaran. Anchatan Diosta respetaran mana allin ruwaykunatapas cheqnikuranmi, chaymi Diosqa niran: “Pay jina runaqa manan kay pachantinpi kanchu”, nispa (Job 1:8). Jobqa Jehová Diospa amigonmi karan.

8 Satanasmi ichaqa niran Jobqa interesraykulla  Diosta servisqanta. Chaymi Diosta niran: “Qanqa paytapas familiantapas tukuy kaqnintapas manan piwanpas llamiykachinkichu, aswanmi lliu ima ruwasqantapas saminchashanki, chaymi uywankunapas suyuntinman junt’aykushan. Kaqninkunatachus kunan qechuruwaq, chayñayá yachawaq imaynataraqchus uyaykipi ñakasunkiman chayta”, nispa (Job 1:10, 11).

9. ¿Ima ruwanantan Jehová Dios Satanasta permitiran?

9 Satanasmi niran: ‘Jobqa imatapas chaskisqanraykullan Diostaqa servishan, munaspayqa Diospa contranpin churayman’, nispa. Jehová Diosqa manan acuerdopichu kasharan Satanaspa nisqanwan. Chaywanpas permitiranmi Jobta pruebaman churananpaq. Chhaynapin lliu yachanman imarayku Job Diosta servisqanta.

SATANÁS JOBTA PRUEBAMAN CHURAN

10. a) ¿Imaynatan Satanás Jobta pruebaman churaran? b) Chhaynapi tarikuspa, ¿imatan Job ruwaran?

10 Ñaupaqtaqa, Satanasmi Jobpa uywankunata suwachiran, puchuqtataq wañuchiran. Serviqninkunatapas yaqa llapantan wañuchiran, chunka wawankunatataq jatun wayrawan wañuchiran. “Chaykunaña kaqtinpas Jobqa manapunin juchallikuranchu, manallataqmi Diostapas juchacharanchu” (Job 1:12-19, 22).

Jehová Diosqa bendeciranmi Jobta junt’aq sonqo kasqanmanta

11. a) ¿Imatawanmi Satanás Jobta ruwaran? b) Chhaynapi tarikuspa, ¿imatan Job ruwaran?

11 Satanasmi ichaqa urmachiytapuni munaran Jobta, chaymi Diosta desafiaran: “Pay kikinta llamiykuwaq, chayñayá yachawaq imaynataraqchus uyaykipi ñakasunkiman chayta”, nispa. Jinan Satanasqa Jobta millay onqoywan jap’ichiran (Job 2:5, 7). Jobmi ichaqa sinchitaña ñak’arishaspapas ‘manapuni Dios contraqa imatapas rimaranchu’ (Job 27:5).

12. ¿Imaynatan Job rikuchiran Satanaspa rimasqan mana cheqaqchu kasqanta?

 12 Jobqa manan yacharanchu Satanaspa rimasqanmanta, imarayku sinchita sufrisqantapas. Payqa piensaran Dios pruebaman churananpaqmi (Job 6:4; 16:11-14). Chaywanpas Jobqa junt’aq sonqon Diospaq karan, manataqmi interesraykuchu Diostaqa serviran, aswanpas munakusqanraykun. Satanaspa rimasqanqa manan cheqaqchu karan.

13. ¿Imatan yachakuran Jobpa kasukusqanwan?

13 Jobqa manan yacharanchu Diosman imatachus Satanás nisqanta, chaywanpas Jobqa kasukushallaranmi Diosta. Chaywanmi sut’ita yachakuran Satanasqa llullakuspa rimasqanta. Diosqa bendeciranmi Jobta junt’aq sonqo kasqanmanta (Job 42:12-17).

SATANASQA QANMANTAWANMI RIMASHARAN

14, 15. ¿Ima niranmi Satanás llapa runakunamanta?

14 Kunankamapas Satanasqa nishanmi runaqa interesraykulla Diosta servisqanchista. Job 2:4 textopin Satanasqa niran: ‘Tukuy imantapas runaqa qoyta atinmi, kausayninta salvananraykuqa’, nispa. Chaywanqa llapa runamantan rimasharan. Jobpa wañupusqanmanta pachaj-pachaj watakuna qhepamanpas Satanasqa kaqllatan runakunamanta nisharan, Diostapas k’amishallaranmi. Chaymi Proverbios 27:11 textopi nin: “Churilláy, yachayniyoq kay, jinaspa sonqoyta kusirichiway, chaymi k’amiwaqniyman kutichisaq”, nispa.

15 Sichus Diosta servinaykipaq, amigon kanaykipaq ima decidikunki chayqa, Satanaspa llullakusqantan rikuchinki. Chaypaqqa yaqapaschá vidaykipi cambiokunata ruwanayki kanqa, chay decidisqaykin ichaqa allinpuni kanqa. Jinaspapas iñiyniykipin allinta sayanayki.  Satanasmi nin: “Ima problemapipas tarikuspaqa manas Diostaqa kasukunkichu”, nispa. Payqa imaymanatan ruwashan Diosta mana kasukunanchispaq. ¿Imakunata?

16. ¿Imaynatan Satanás runakunata jark’an Diosta mana servinankupaq?

16 Satanasqa manan munanchu Diospa amigon kananchista, chaymi imaymanawan jark’awanchis. Payqa “qaparishaq león jinaraqmi purishan” (1 Pedro 5:8). Chaytaqa reparanki familiaykikuna, amigoykikuna juj runakunapas Biblia estudianaykita allin kaqta ruwanaykita jark’asuqtiykikun. Chhaynapi tarikuspan piensasunman Satanás jark’awananchispaq paykunata tanqashasqanta * (Juan 15:19, 20). Jinaspapas Satanasqa allin angelman tukuspan munayllata engañawasunman Diosta mana kasunanchispaq (2 Corintios 11:14). Chaymantapas khaynatan piensachiwasunman: “Noqaqa manan jayk’aqpas Diostaqa serviyta atiymanchu”, nispa (Proverbios 24:10).

DIOSPA KAMACHIKUYNINKUNATA KASUKUY

17. ¿Imaraykun Jehová Diosta kasukunchis?

17 Diosta kasukuspaqa Satanás llulla kasqantan rikuchinchis. Ichaqa, ¿iman yanapawasun kasukuq kananchispaq? Biblian nin: “Diosta munakuychis tukuy sonqoykichiswan, tukuy almaykichiswan, tukuy kallpaykichispiwan”, nispa (Deuteronomio 6:5). Diostaqa  munakusqanchisraykun kasukunchis. Astawan munakusun chayqa ima kamachisqantapas kasukusunmi. Apóstol Juanmi niran: “Diosta munakuyqa kamachikuyninkunata kasukuymi; kamachikuyninkunaqa manataqmi sasa junt’aychu”, nispa (1 Juan 5:3).

18, 19. a) ¿Ima ruwaykunatan Jehová Dios cheqnikun? b) Diosqa atinallanchistan kamachiwanchis, ¿imaynapin chayta yachanchis?

18 Jehová Diosqa willawanchismi wakin ruwaykuna mana allin kasqanta. Wakintan tarinki “ Diospa cheqnikusqan ruwaykunata cheqnikuy” nisqa recuadropi. Yaqapaschá wakintaqa mana juchapaqchu qhawarinki. Ichaqa Bibliapi kaq textokunata leespa piensanki chayqa reparankin Diospa kamachikuyninkunaqa allinniykipaq kasqanta. Jinaspapas reparankichá vidaykipi cambiokunata ruwanayki kasqanta, chayta ruwayqa manapaschá facilchu kanqa, ichaqa chayta ruwaspan Diospa amigon kanki jinaspa kusisqa kausanki  (Isaías 48:17, 18). Ichaqa, ¿atisunmanchu cambiayta? Arí.

19 Jehová Diosqa atinallanchistan kamachiwanchis (Deuteronomio 30:11-14). Payqa cheqaq amigonchismi, noqanchismantapas aswan allintan reqsiwanchis. Yachanmi imayna runa kasqanchista imapi pisipasqanchistapas (Salmos 103:14). Apóstol Pablon niran: “Diosqa junt’aqpunin, chaymi mana dejanqachu mana aguantanaykichiskama tentasqa kanaykichistaqa; aswanpas tentasqa kashaqtiykichismi payqa yanapayta qosunkichis, chhaynapi aguantanaykichispaq”, nispa (1 Corintios 10:13). Diosqa yanapawasunpunin allin kaqta ruwananchispaq. Qanmanpas ‘atiytan’ qosunki problemaykikunata atipanaykipaq (2 Corintios 4:7). Jehová Diosqa askha kutipin Pablotapas yanaparan, chaymi payqa niran: “Tukuy imapaqmi kallpa qowaqniyqa kallpata qowan”, nispa (Filipenses 4:13).

 DIOSPA MUNASQAN RUWAYKUNATA RUWAY

20. ¿Imakunatan vidanchispi rikuchinanchis? ¿Imarayku chayta rikuchinanchis?

20 Diospa amigon kanapaqqa paypa cheqnikusqan ruwaykunatan cheqnikunanchis (Romanos 12:9). Munakusqan ruwaykunatataq munakunanchis. Vidanchispitaq rikuchinanchis “munakuyta, kusikuyta, thaj kausayta, pacienciakuyta, sumaq sonqo kayta, allin sonqo kayta, iñiyta, llamp’u sonqo kayta, cuerpo kamachiq kayta ima” (Gálatas 5: 22, 23). Diospa amigonkuna imayna kasqankuta yachanaykipaq leey Salmos 15:1-5 textota.

21. ¿Iman yanapasunkiman sumaq cualidadkunata vidaykipi rikuchinaykipaq?

21 ¿Iman yanapasunkiman sumaq cualidadkunata vidaykipi rikuchinaykipaq? Chaypaqqa Bibliatan leenayki estudianayki ima, chaypin yachanki imakunata Dios munakusqanta (Isaías 30:20, 21). Chayta ruwaspaqa astawanmi Jehová Diosta munakunki, chaytaq kallpachasunki Diosta kasukunaykipaq.

22. ¿Imatan rikuchinki Jehová Diosta kasukuspa?

22 Vidanchispi cambiokunata ruwayqa mauk’a p’achata saqepuspa mosoq p’achawan churakuy jinan. Biblian kamachiwanchis ‘ñaupa kausayninchista’ saqepuspa ‘mosoq runa kaywan p’achawan jina churakunanchista’ (Colosenses 3:9, 10). Vidanchispi cambiokunata ruwayqa manan facilchu. Ichaqa Diosta kasukusun chayqa premiotan chaskisun (Salmos 19:11). Jehová Diostaqa munakusqaykiraykun kasukunayki, manan jamuq tiempopi premiota chaskinaykiraykuchu. Chayta ruwaspan rikuchinki Satanás llulla kasqanta, jinaspa Diospa cheqaq amigon kanki.

^ párr. 16 Chaywanqa manan nishanchu “Satanasmi Biblia estudianaykita jark’aq runakunata controlashan” nispaqa. Biblian ichaqa nin Satanás “kay pacha kamachiq dios” kasqanta, lliu kay pacha paypa makinpi kasqantawan. Chaymi mana admirakunanchischu Dios serviyta wakin runakuna jark’awasqanchismantaqa (2 Corintios 4:4; 1 Juan 5:19).