Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 APÉNDICE

¿Ima ninanmi Diospa sutin, imaynata rimakun?

¿Ima ninanmi Diospa sutin, imaynata rimakun?

AMA hina kaspa Bibliaykita kichariy Salmo 83:18 textota (wakin Bibliakunapin 82:19 textota). ¿Ima ninmi chay textopi? Traducción del Nuevo Mundo de las Santas Escrituras nisqa nin: “Runakuna yachachunku sutiyki Jehová kasqanta, qanllapuni teqsimuyuntinpi Ancha Hatun Dios kasqaykita reqsichunku”, nispa. Huk Bibliakunapipas chhaynatan t’ikranku. Ichaqa askha Bibliakunapin mana rikhurinchu Jehová suti, Jehová sutiq rantintan “Señor” otaq “Dios” nisqa titulokuna rikhurin. Chhaynaqa, ¿iman rikhurinan chay textopi? ¿Huk titulochu icha Jehová sutichu?

Hebreo simipi Diospa sutin

Chay textopiqa sutin kashan. Hebreo qelqapin rikhurin huk importante suti. Chay sutin hebreo simipi khaynata qelqakun: יהוה (YHWH). Español simipitaq t’ikrakun Jehová otaq Yavé, nispa. ¿Huk kutillatachu chay suti Bibliapi rikhurin? Manan, ñawpa Hebreo Qelqakunapiqa yaqa qanchis waranqa kutitan rikhurin.

¿Importantechu Diospa sutin? Chayta reparasun yayayku mañakuypi, chaytan Jesucristo yachachiran. Khaynata qallarin: “Yayayku hanaq pachapi kaq, sutiyki yupaychasqa kachun”, nispa (Mateo 6:9). Qhepamantaq Jesús mañakuran: “Yayalláy, sutiykita hatunchay”, nispa. Yayantaq hanaq pachamanta kutichimuran: “Hatuncharqaniñan, wakmantataq hatunchasaq”, nispa (Juan 12:28). Chaykunapin yachanchis Diospa sutin ancha importante kasqanta. Chhaynaqa, ¿ima raykutaq wakin t’ikraqkuna Bibliamanta Diospa sutinta horqopunku, sutinpa rantintataq titulokunata churanku?

Askha runakunan khaynata ninku, Diospa sutintaqa manan hoqarinachu, manan yachanchischu imayna rimakusqanta, nispa. Ñawpa hebreo simiqa manan vocalkunawanchu (a, e, i, o, u) qelqakuran, chaymi mana yachakunchu ima vocalkunawanchus YHWH nisqa simi rimakusqanta. ¿Chay raykuchu manaña Diospa sutinta hoqarinanchis? Jesús sutipas ñawpa tiempopi  yaqapaschá khaynata rimakuran, Yeshúa otaq Yehoshúa nispa, manan pipas yachanchu imayna rimakusqanta. Ichaqa pachantinpi manan kaqllatachu Jesús sutita rimanku aswanpas rimasqanku simiman hinan. Manaña yachakunchu imaynata rimakuran apostolkunaq tiemponpi chay sutita chaypas, rimashallankun chay sutitaqa mana iskayaspa. Sichus huk suyuman riwaq chayqa, reparawaqmi sutiyki huk simikunapi hukniray rimakusqanta. Chay rayku ñawpa tiempokunapi Diospa sutinta imayna rimakusqanta mana yachasqanchisqa manan hark’awananchischu Diospa sutinta rimashanallapaq.

Hinaspapas Diospa sutinta Bibliapi mana churarankuchu ñawpa judiokunaq yachachisqanta kasukuspa. Yaqa llapa judiokunan ninku, Diospa sutintaqa manan hayk’aqpas rimarinachu, nispa. Chaytaqa yuyaykunku kay kamachikuyta mana allinta entiendespan: “Aman sutiyta mana allinpaq hoqarinkichu, ñoqa Diosniyki Señor Diosqa mana allinpaq sutiyta hoqariqtaqa manan hinallatachu qhawasaq”, nispa (Éxodo 20:7).

Chay kamachikuypi nisqan hina, manapunin Diospa sutintaqa mana allinpaq hoqarinachu. Ichaqa, ¿chay raykuchu manaña sutinta hoqarinanchis? Manapunin. Hebreo simipi Biblia qelqaqkunaqa (“Ñawpa Rimanakuy”) hunt’aq runakunan karanku, paykunaqa kasukurankun israelitakunaman Diospa qosqan Kamachikuykunata. ¿Imatan chay qelqaqkuna Diospa sutinwan ruwaranku? Sapa kutinmi Diospa sutinmanta rimaranku. Chay rayku askha takikunapi sutinta churaranku Diosta yupaychaqkuna allin kunkawan takinankupaq. Chaymantapas Jehová Diosmi kamachinkunata kamachiran sutinmanta waqyakunankupaq, hunt’aq kamachinkunataq kasukuranku (Joel 2:32; Hechos 2:21, NM). Chaymi kunanpas cristianokunaqa Jesús hina respetowan Diospa sutinta hoqarishallanku (Juan 17:26, NM).

T’ikraqkunaqa manan allintachu ruwanku Diospa sutinpa rantinpi titulokunata churaspa. Chaywanmi Diosta rikuchinku mana kawsayniyoqta, kallpata hinalla. Biblian ichaqa kallpachawanchis Dioswan ‘sonqota tupachinapaq’ (Salmo 25:14). Yuyaykuy munasqa amigoykipi. Amigoykiq sutinta mana yachaspa, ¿hukllachakuwaqchu paywan? Kaqllataqmi Jehová Dioswanpas. ¿Imaynatan Dioswan sonqota tupachisunman, Jehová sutinta mana reqsishaspa? Hinaspapas sutinta mana hoqariqkunaqa  manan yachankumanchu chay suti ima ninanta. ¿Ima ninantaq Diospa sutinri?

Diosqa kamachin Moisesman sut’incharanña. Sutinta tapuqtinmi Jehová Dios kutichiran: “Ñoqan kani Ñoqaqa otaq Ñoqan kani munasqay kayta”, nispa (Éxodo 3:14). Otaq Rotherham t’ikrasqan (españolpi) hina: “Ñoqan munasqayman hina kasaq”. Jehová Diosqa imamanpas tukunmanmi munayninta hunt’ananpaq, chaymantapas payqa imatapas ruwallanmanmi munaynin hunt’akunanpaq.

Munasqaykiman hina tukuwaq chayri, ¿ima allinkunatan amigoykikunapaq ruwawaq? Pipas onqoqtin allin medicoman tukuspachá hanpiwaq. Hukñataq askha qolqenta chinkachiqtinqa qhapaqman tukuspachá yanapawaq. Ichaqa runallan kanki, manan atiwaqchu ima munasqaykimanpas tukuyta. Ichaqa Bibliata estudiasqaykiman hina yachanki imaynatan Jehová Dios ima munasqanmanpas tukun munasqanta ruwananpaq. Kusikunmi payta munakuq runakunata yanapaspa (2 Crónicas 16:9). Chay sumaq kayninkunataqa manan yachankumanchu Jehová Diospa sutinta mana yachaqkunaqa.

Diospa sutinqa rikhurinanpunin Bibliapi. Jehová sutita yachasqanchis, payta yupaychanapaq sutinta hoqarisqanchispiwanmi astawan payman asuykachiwanchis. *

^ párr. 3 Sichus astawan yachayta munanki Diospa sutinmanta, sutin ima ninanmanta, yupaychaypi ima rayku sutin hoqarinamantapas chayqa, El nombre divino que durará para siempre nisqa folletota t’aqwiy, chay folletotaqa Jehová Diospa testigonkunan ruwan.