Danielmi qelqarqan Diospa Gobiernonmanta, Mesías chayamunanmantawan. Babilonia llaqta thunichisqa kapurqan

MANARAQ Jerusalén llaqtata thunichishaqtinkun Danieltaqa waynachallataraq Babilonia llaqtaman aparqanku. Preso hinaña judiokuna apasqa karqanku chaypas, manan carcelpichu tiyarqanku nitaq kamachi hinapaschu karqanku. Jehová Diosqa manan hayk’aqpas Danielta saqerparirqanchu. Yanaparqanmi leonkuna mana wañuchinanpaq, mosqoypi hinataqmi rikuchirqan hamuq tiempopi imakuna sucedenanta. Danielqa Mesiasmanta Diospa Gobiernonmantawanmi willarqan.

Mesiaspa chayamunan tiempo. ¿Hayk’aqmi “Mesías” rikhurimunan karqan? Jerusalén llaqtaq perqankunata wakmanta sayarichinapaq kamachikuy lloqsimusqanmantapacha “69” semanakuna pasasqan qhepamanmi. “Semana” nisqaqa manan qanchis p’unchayllachu aswanmi qanchis wata. Chay kamachikuyqa 455 watapin (m.J.h.) lloqsimurqan, Danielpa wañupusqan unay watakuna qhepamanña. Chaymantapacha 69 semanakunata otaq 483 watakunata yupaspan 29 wataman chayanchis. ¿Iman pasarqan chay watapi? Chaymantañan chaytaqa yachasun. Danielqa qelqallarqantaqmi runakunaq huchanrayku Mesiasta “wañuchinanku” kasqanta (Daniel 9:24-26).

Mesías hanaq pachapi Rey kananmanta. Danielmi huk rikhuriypi ‘runaq churinta hina rikurqan’ Diospa tiyanan qayllaman asuykushaqta, chay Churiqa Mesiasmi karqan. ‘Paymi kamachikuy atiyta chaskirqan, qhapaqchasqa karqan, rey kananpaqtaq churasqa karqan’. Chay kamachikuyqa wiñaypaqmi kanan karqan. Qhepamanmi Daniel yachallarqantaq huk allin willakuyta: Reyqa huk runakunawan kuska kamachinanta. Paykunatan sutichakun: “Ancha Hatun Diospa llaqtan”, nispa (Daniel 7:13, 14, 27).

Diospa Gobiernon llapa gobiernokunata tukuchinqa. Diosmi Babiloniapi rey Nabucodonosorpa mosqokusqanta Danielwan willachirqan. Mosqoyninpin rikusqa runaman rikch’akuq hatunkaray estatuata, umanmi kasqa qorimanta, qhasqonwan makinkunawantaq qolqemanta, wiksanwan teqninkunawantaq broncemanta, chakankuna fierromanta, chakinkunataq wakin fierromanta wakintaq kanasqa t’urumanta. Hinan huk ch’eqtasqa qaqa urmaykamuqtin chakinman chayaspa ñut’urparisqa. Danielmi reyman willarqan imatachus mosqokusqanta: qorimanta uman tupan Babiloniawan, wakinkunataq qhepaman hamuq atiyniyoq gobiernokunawan. Estatuaq chakinkunaman rikch’akuq gobierno atiyniyoq kashaqtinmi, Diospa Gobiernon kay pachapi llapa gobiernokunata chinkachinqa. Chhaynapin Diospa Gobiernon kay pachata wiñaypaq kamachinqa (Daniel, 2 capítulo).

Danielqa rikurqanmi Babilonia llaqta thunichisqa kasqanta. Ñawpaqmantaña willakusqan hinan kamachikuq Ciro chay llaqtata thunichirqan. Jerusalén llaqta wikch’usqa kasqanmanta qanchis chunka wata hunt’akushaqtinmi judío runakuna llaqtankuman kutipurqanku. Llaqtapi kamachikuqkunaq, sacerdotekunaq, profetakunaq umallisqanmi Jerusalén llaqtata Dios yupaychana wasitawan wakmanta hatarichirqanku. Ichaqa, ¿iman sucederqan 483 watakuna qhepaman?

(Daniel.)