Apóstol Pabloqa lliw llaqtakunatan rirqan allin willakuykunata willananpaq

PABLOQA cristianoman tukupusqanmantapachan tukuy sonqowan Diospa Gobiernonmanta predicarqan. Chaymi payñataq qatiykachasqa kanan karqan. Chaywanpas mana sayk’uspan lliw llaqtakunata rirqan allin willakuykunata willaspa.

Ñawpaqkaq kutipi viajaspan Pablo Listra llaqtata rirqan, chaypin wist’u naceq runata qhaliyachirqan. Chayta rikuspan runakuna qaparispa Pablomanta Bernabemantawan nirqanku: ‘¡Dioskunan kanku!’ nispa. Chaymi sacrificiokunata haywayta munarqanku, paykunan ichaqa manapuni munarqankuchu. Chay qhepallamanmi chay runakuna Pabloq enemigonkunata kasuspa paykunata rumiwan ch’aqerqanku. Wañusqa kananpaqña yuyaykurqanku chaypas, Pabloqa qhaliyaspan llaqtata kutirqan cristianokunata kallpachananpaq.

Judío cristianokunan Pablota nirqanku mana judío iñiqkunapas Moisespa wakin Kamachikuyninta kasukunanku kasqanta. Chay churanakuy kaqtinmi Pabloqa Jerusalenpi apostolkunaman umalliq runakunamanwan rirqan chayta allichanankupaq. Paykunataq Diospa qelqankunata allinta t’aqwispa santo espiritunta mañakuspa ima iñiq t’aqakunaman cartakunata apachirqanku, kamachirqankutaq ama idolokunata yupaychanankupaq, amallataq yawarta seq’osqa aychatapas mikhunankupaq nitaq qhelli kawsaypi purinankupaqpas. Cristianokunaqa chaykunatan kasukunanku karqan manan Moisespa lliw Kamachikuynintachu (Hechos 15:28, 29).

Iskaykaq kutipi viajaspan Pabloqa Berea llaqtaman rirqan. Chaypi tiyaq judío runakunaqa tukuy sonqowanmi willasqanta chaskikurqanku, hinapunichus kasqantataq sapa p’unchay Diospa Siminpi t’aqwirqanku. Chaypin Pabloqa enemigonkunamanta ayqekullarqantaq. Atenas llaqtaman chayaspan yachayniyoq runakunaq ñawpaqenpi respetowan sumaq discursota qorqan.

Kinsakaq kutipi viajaspan Jerusalén llaqtaman rirqan. Yupaychana wasipi kashaqtinmi askha runakuna wañuchiyta munarqanku. Roma soldadokunan ichaqa paykunamanta ayqechispa tapunankupaq aparqanku. Roma llaqtayoq kasqanraykun kamachikuq Felixpa ñawpaqenpi defiendekurqan. Judío runakunaqa manan sut’inchayta atirqankuchu imaymanamanta tumpasqankuta, chaywanpas Felixpa rantinpi kamachikuq Feston paykunaq makinman entregananpaq yuyaykurqan. Chaymi Pabloqa nirqan: “Kikin Roma rey Cesarpa juzgawanantan mañakuni”, nispa. Festotaq nirqan: “Cesarmanmi rinki”, nispa (Hechos 25:11, 12).

Pabloqa Romapin juzgasqa kanan karqan. Chaymi Italia llaqtaman barcopi rirqan, ichaqa lamar-qochan yaqalla llapankuta millp’urqan, chaymi paray tiempo pasanankama Malta islapi qhepakurqan. Roma llaqtaman chayaspan alquilakusqan wasipi iskay wata tiyarqan. Soldadokunaq qhawasqan kashaspapas Pabloqa kusikuywanmi llapa visitaqninkunata predicarqan.

(Hechos 11:22–28:31.)