Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 55 WILLAKUY

Diospa angelnin Ezequiasta yanapan

Diospa angelnin Ezequiasta yanapan

Asiria nacionmi Israelpa chunka ayllunkunata jap’ikapuran. Chay qhepamanmi Asiriamanta rey Senaqueribqa Judá nacionpa iskaynin ayllunta jap’ikapuyta munaran. Jinan Judá nacionpa llaqtankunata pisi-pisimanta jap’ikapuran, astawanqa Jerusalén llaqtatan jap’ikapuyta munaran. Jehová Diosmi ichaqa chay llaqtata pakaykuran.

Judá nacionmanta rey Ezequiasmi Asiria reyman askha qolqeta qoran mana atacananpaq. Chaywanpas Senaqueribqa jatun ejercitontan kacharan Jerusalenta jap’ikapunanpaq. Chay ejercitoqa pisi-pisimantan llaqtaman qayllaykamusharan, jinan runakunaqa sinchi manchasqa kasharanku. Chaymi Ezequiasqa niran: “Ama manchakuychischu, Jehová Diosmi yanapawasun”, nispa.

Senaqueribqa jujnin oficialnintan kacharan Jerusalén runakunamanta burlakunanpaq. Llaqta jawamantan alto kunkawan niran: “Ama Ezequiaswan engañachikuychischu, manan Jehová Diospas ni mayqen diospas makiykumanta salvasunkichischu”, nispa.

Chaymi Ezequiasqa Diosta tapuran imachus ruwananpaq. Diostaq niran: “Ama kasuychu, Asiria reyqa manan Jerusalenta jap’ikapunqachu”, nispa. Chay qhepamanmi Senaqueribqa juj cartata apachimuran. Chaypin niran: “Entregakuychis, Jehová Diosqa manan salvasunkichischu”, nispa. Jinan Ezequiasqa mañakuran: “Diosniy, chay reymanta salvawayku cheqaq Dios kasqaykita yachanankupaq”, nispa. Diostaq niran: “Senaqueribqa manan jaykumunqachu, noqan Jerusalentaqa jark’aykusaq”, nispa.

Senaqueribqa seguron kasharan Jerusalenta jap’ikapunanpaq. Jehová Diosmi ichaqa juj angelninta kachamuran, chay angelmi Jerusalén qayllapi kashaq 185.000 Asiria  soldadokunata juj tutallapi wañuchiran. Chaymi Senaqueribqa mana imanakuyta atispa llaqtanman kutipuran. Jehová Diosmi Ezequiasta llaqtantapas pakaykuran prometesqanman jina. Jerusalenpi tiyawaq karan chayri, ¿confiawaqchu karan Jehová Diospa yanapayninpi?

“Señor Diospa angelninqa, Señor Diosta manchakuqkunatan muyuykunpas qespichinpas” (Salmo 34:7)