Uma sacerdote Elipan iskay wawankuna karan Hofniwan Finehaswan (Finees). Paykunaqa sacerdotekunan karanku adorana karpapitaq llank’aranku. Ichaqa manan Jehová Diosta kasukuqkuchu, runakunatapas millaytan trataqku. Pipas Diosman sacrificiota apaqtinmi Hofniwan Finehaswanqa allin kaq aychata qhepachikuqku. Eliqa yacharanmi wawankuna mana allin ruwasqanta, ichaqa manan imatapas ruwaranchu corriginanpaq. ¿Imatan Dios ruwaran?

Samuelqa erqellaraq kashaspapas manan Hofní, Finehás jinachu millaykunata ruwaran. Chaymi Jehová Diosqa paywan kusisqa kasharan. Juj tutan Samuel puñushaqtin Elipa wajamusqanta jina uyariran. Jinan sayarispa Elipa kasqanman rispa niran: “Kaypin kashani”, nispa. Elitaq niran: “Manan wajamuykichu, puñuq kutipuy”, nispa. Samuel puñushaqtinmi wajmanta uyarillarantaq. Kinsa kaq kutipin Eliqa repararan Jehová Dios Samuelta wajamushasqanta. Jinan Eliqa Samuelta niran: “Wajmanta wajamuqtinqa, khaynata kutichinki: ‘Niway Jehová Dios, kamachiykiqa uyarishanmi’”, nispa.

Chay qhepamanmi uyariran “Samuel, Samuel” nimuqta, chaymi kutichiran: “Niway Jehová Dios, kamachiykiqa uyarishanmi”, nispa. Diostaq niran: “Elitan ninki, qantapas familiaykitapas castigasaqmi.  Qanqa manan wawaykikunata wanachirankichu millaykunata adorana karpapi ruwashaqtinku”, nispa. Qhepantin p’unchaymi Samuelqa adorana punkukunata kicharan. Manchakusharanmi Diospa nisqanta uma sacerdoteman willayta. Elí ichaqa wajaspa tapuran: “¿Imatan Jehová Dios willarasunki?”, nispa. Chaymi Samuelqa llapanta willaran.

Samuelqa Diospa amigollanpunin kasharan kuraqña kashaspapas. Israel runakunaqa yacharankun Jehová Dios Samuelta profeta juez ima kananpaq ajllasqanta.

“Wayna-sipasllaraq kashaspa Kamaqniykimanta yuyarikuy” (Eclesiastés 12:1)