Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 24 WILLAKUY

Manan junt’arankuchu rimasqankuwan

Manan junt’arankuchu rimasqankuwan

Jehová Diosmi Moisesta niran: “Orqoman wichamuy, kamachikuyniykunatan iskay p’alta rumipi qelqaspa qosayki”, nispa. Moisesqa orqoman wichaspan 40 p’unchayta qhepakamuran. Chaypin Diosqa chunka kamachikuykunata iskay p’alta rumipi qelqaspa Moisesman qoran.

Israel runakunaqa Moisés saqerparinanpaqmi piensaranku. Chaymi Aaronta niranku: “¡Juj umalliqtan necesitashayku. Juj diosta ruwapuwayku!”, nispa. Aarontaq niran: “Qorita apamuwaychis”, nispa. Jinan qorita unuyachispa juj torrillota ruwaran. Runakunataq niranku: “¡Kay torillon diosniyku, Egiptomanta orqomuwaqniyku!”, nispa. Fiestata ruwaspankun qori torillota adorayta qallariranku. ¿Chay ruwasqanku juchachu karan? Arí, llapankupas Jehová Diosllata adoranankupaqmi prometekuranku. Ichaqa manan rimasqankuwan junt’arankuchu.

Jehová Diosqa rikumusharanmi ruwasqankuta,  chaymi Moisesta niran: “Llaqtaman uraykuy, mana kasuwaspankun juj idolota adorashanku”, nispa. Jinan Moisesqa orqomanta uraykamuran iskaynin p’alta rumita aparikamuspa.

Chayamushaspan uyariran runakunaq takisqanta. Jinaspa rikuran tusushasqankuta torillota adorasqankutawan. Chaymi Moisesqa sinchita phiñakuspa iskaynin p’alta rumikunata chanqaran, jinan p’akikuran. Kaq raton chay idolota thuniran, Aarontataq tapuran: “¿Imaraykun convencechikuranki kay idolota ruwanaykipaq?”, nispa. Aarontaq niran: “Ama phiñakuychu, yachanki llaqtanchis imayna kasqanta, juj diostan munaranku, jinan qorita ninaman wijch’uykuqtiy kay torillo lloqsimuran”, nispa. Aaronqa manan chayta ruwananchu karan. Moisesqa jujmanta orqoman wichaspan Jehová Diosta valekuran llaqtanta perdonananpaq.

Diosqa perdonaranmi kasukuyta munaq Israel runakunata. Paykunaqa Moisestan kasukunanku karan, chay ruwayqa ancha importanten karan ¿riki?

“Diosman prometekuspaykiqa usqhayllata junt’ay, Diostaqa manapunin mana yuyayniyoqkunaqa kusichinchu. Junt’ay prometekusqaykitaqa” (Eclesiastés 5:4)