Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 17 WILLAKUY

Moisés ajllakun Jehová Dios adorayta

Moisés ajllakun Jehová Dios adorayta

Egiptopi tiyashaqtinku Jacobpa familianta “Israel runakuna” nispa niranku. Jacobpas Josepas wañupusqanku qhepamanmi juj faraonñataq kamachikuyta qallariran. Chay faraonmi manchakuran Israel runakuna astawan askhayasqanmanta. Chaymi paykunata esclavoman tukuchipuran. Obligaranmi ladrillokunata ruwanankupaq campopipas llank’anankupaq. Chhaynataña tratashaqtinkupas Israel runakunaqa astawanmi askhayasharanku. Faraonmanqa manan chay gustaranchu, chaymi kamachiran llapa qhari wawakunata wañuchinankupaq. Chaywanqa anchatachá Israel runakunaqa manchakuranku.

Israelmanta Jokébed (Jocabed) sutiyoq warmin munay rijch’ayniyoq qhari wawata onqokuran. Jinaspa wawanta mana wañuchinankupaq juj canastapi Nilo mayuq cantonpi churaran. Miriamtaq (María) imachus pasananta yachananpaq qayllallamanta qhawasharan.

 Faraonpa ususinmi chay mayuman bañakuq jamuran, jinan canastapi rikuran wawa waqashaqta, chaymi khuyapayaran. Jinan Miriamqa tapuran: “¿Maskhampuykimanchu juj warmita kay wawata uywapunasuykipaq?”, nispa. Paytaq “ari” nispa niran. Chaymi Miriamqa mamanta pusamuran, jinan faraonpa ususinqa niran: “Kay wawata uywapuway, pagapusaykin”, nispa.

Wawa wiñaqtinmi Jokebedqa faraonpa ususinman aparan. Moisés sutitan churaran, wawanta jinataq uywakapuran. Moisesqa faraonpa wawan jinan wiñaran, chaymi mana imanpas faltaranchu. Chaywanpas payqa manan Jehová Diosta qonqaranchu. Moisesqa yacharanmi Israelmanta kasqanta, chaymi ajllakuran Jehová Dios serviyta.

Moisesqa 40 watanpi kashaqtinmi llaqtamasinkunata yanapayta munaran. Juj p’unchaymi Egipto llaqtayoq runa Israel runata maqasharan, chayta rikuspan Moisesqa maqaspa wañurachiran, jinaspa cuerponta aqopi p’amparan. Chayta yachaspan faraonqa Moisesta wañuchiyta munaran, chaymi Moisesqa Madián llaqtaman ayqekuran. Chaypin Diosqa payta cuidaran.

‘Iñisqanraykun Moisespas [...] mana munaranchu “Egipto reypa ususinpa wawan” nisqa kayta. Aswanmi [...] Diospa llaqtanwan ñak’arichisqa kayta ajllakuran’ (Hebreos 11:24, 25)