Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 94 WILLAKUY

Discipulokuna santo espirituta chaskinku

Discipulokuna santo espirituta chaskinku

Jesús janaq pachaman ripusqanmantaqa chunka p’unchayñan pasaran. Jinan discipulokunaqa santo espirituta chaskiranku. Chayqa pasaran 33 wata Pentescostés fiestapin, chay fiestamanmi askha nacionkunamanta runakuna Jerusalenman jamuranku. 120 discipulokuna jinan altos cuartopi juñusqa kasharanku. Jinan qonqaylla qallu jina nina rauraykuna sapankankuq uma patanman tiyaykuran, jinaspa juj rimaykunapi rimayta qallariranku. Jinaspapas chay wasipin sinchi wayra suenayta uyarikuran.

Jerusalenman riq runakunan chay suenayta uyarispa phawaylla riranku imachus pasasqanta yachanankupaq. Anchatan admirakuranku Jesuspa discipulonkuna juj rimaykunapi rimasqankuta uyarispa, jinan niranku: “Kay runakunaqa Galileamantan kanku, ¿imaynapitaq rimayninchispiri rimashanku?”, nispa.

Jinan Pedroqa juj apostolkunapiwan runakunaq ñaupanpi sayariranku. Jinaspa Pedro niran: “Qankunan Jesusta wañuchirankichis, Jehová Diosmi ichaqa kausarichipun, kunanqa janaq pachapin  Diospa paña ladonpi kashan. Jinaspa prometewasqanku santo espirituta qowanku, chaymi rikurankichis uyarirankichispas kay milagrokunata”, nispa.

Jinan runakunaqa anchata admirakuranku, Pedroq rimasqantaq sonqonkuman chayaran, chaymi tapuranku: “¿Imatan ruwanayku?”, nispa. Pedrotaq niran: “Juchaykichismanta pesapakuspa Jesuspa sutinpi bautizakuychis. Chaymi santo espirituta chaskinkichis”, nispa. Jinan chay p’unchay 3.000 runakuna jina bautizakuranku. Chaymantapachan Jerusalenpi aswan askha discipulokuna yapakuranku. Apostolkunaqa santo espirituq yanapayninwanmi iñiq t’aqakunata jatarichiranku, chhaynapin discipulokunaman yachachiranku Jesuspa llapa kamachisqanta.

“Simiykiwanchus runa qayllapi rimanki: ‘Jesusqa Señormi’, nispa, sonqoykiwantaqchus iñinki Diosqa wañusqamanta kausarichimusqanpi chayqa, salvasqan kanki” (Romanos 10:9)