Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 88 WILLAKUY

Jesusta jap’inku

Jesusta jap’inku

Jesusqa apostolkunawanmi Cedrón wayq’onta purispa Olivos orqoman riranku. Kuska tuta masñan karan killapas junt’an kasharan. Getsemaní huertaman chayaqtinkun Jesusqa paykunata niran: “Kaypi rijch’ashaqlla suyawaychis”, nispa. Jesustaq chikan ukhuman jaykuran, sinchita llakikuspataq Jehová Diosta niran: “Munayniyki ruwakuchun”, nispa. Jinan Jehová Diosqa juj angelta kachamuran Jesusta kallpachananpaq. Kinsa apostolninkunaq kasqanman kutimuqtinmi Jesusqa rikuran puñushasqankuta. Jinan niran: “¡Sayariychis, manan puñunaykichis tiempochu! Horan chayaramun enemigoykunaq makinpi kanaypaq”, nispa.

Chay ratopin Judas Iscariote chayamuran askha runakunawan, paykunaqa espadantin k’aspintin iman jamuranku. Judasqa yacharanmi maypi Jesús kashasqanta, sapa kutilla chay huertaman risqankurayku. Judasmi soldadokunata niran: “Noqan Jesusta rikuchisaykichis”, nispa. Jinan Jesusman qayllaykuspa “yachachikuq” nispa much’aykuran. Jesustaq niran: “Judas much’aykuwaspachu traicionawanki”, nispa.

Jesusqa ñaupaqman rispan tapuran: “¿Pitan maskhashankichis?”, nispa. Soldadokunataq niranku: “Jesustan”, nispa. Paytaq niran: “Noqan kani”, nispa. Jinan qhepaman kutirispanku pampaman wijch’ukuranku. Wajmantan Jesusqa tapuran: “¿Pitan maskhashankichis?”, nispa. Paykunataq niranku: “Jesustan”, nispa. Jesustaq niran: “Noqan kani niykichistaq. Kay runakunaqa ripullachunku”, nispa.

Pedroqa Jesusta jap’inankuta reparaspan espadanta orqoran, jinan uma sacerdoteq esclavonpa ninrinta qhoruran, chay esclavoq sutinmi karan Malco. Jesusmi ichaqa kaq rato llamiykuspa qhaliyachiran. Pedrotataq  niran: “Espadaykita waqaychay, espadawan maqanakuqqa, espadallawantaqmi wañuchisqa kanqa”, nispa. Apostolkunaqa ayqekurankun. Jesustataq jap’ispa makinkunata wataspa uma sacerdote Anaspa wasinman aparanku. Anastaq Caifaspa wasinman apachiran. Ichaqa, ¿iman pasaran apostolkunawan?

“Kay pachapiqa sasachakuykunapin tarikunkichis, ichaqa ¡kallpachakuychis!, noqaqa ñan atipaniña kay pachata” (Juan 16:33)