Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 73 WILLAKUY

Juan ñanta preparan

Juan ñanta preparan

Zacariaspa Elisabetpa wawanku Juanmi wiñaspa profeta karan. Diosmi Juanta ajllaran Mesías jamunanmanta runakunaman yachachinanpaq. Ichaqa manan sinagogapichu nitaq llaqtapichu yachachiran, aswanpas ch’inneqpi. Runakunaqa Judea llaqtakunamanta Jerusalenmanta iman Juanta uyarinankupaq riranku. Jinan paykunaman yachachiran Diosta kasukunankupaq, mana allin ruwayninkuta saqepunankupaqpas. Chayta uyarispan askha runakuna juchankumanta pesapakuspa Juanwan Jordán mayupi bautizachikuranku.

Juanqa camelloq millmanwan ruwasqa p’achawanmi churakuran, mielta langostakunata iman mijuran. Askhan paymanta yachayta munaranku, chaymi orgulloso fariseokunapas, saduceokunapas payta rikuq riranku. Juanmi paykunata niran: “Juchaykichistan saqepunaykichis. Abrahanpa wawanmi kayku nispaña ninkichis chaypas manan Diospa wawankunachu kankichis”, nispa.

Askhan Juanta tapuranku: “¿Imatan ruwanayku Diosta kusichinaykupaq?”, nispa. Juantaq niran: “Iskay p’achayoq kankichis chayqa, jujninta necesitaq runaman qoychis”, nispa. ¿Imaraykun chayta niran? Runamasinku munakuyta yachanankupaq, chhaynapin Diospa sonqonta kusichinkuman.

Juanqa impuesto cobraqkunatan niran: “Honrado kaychis, amataq pitapas engañaychischu”, nispa. Soldadokunatataq niran: “Ama llullakuychischu nitaq lluk’iytapas chaskiychischu”, nispa.

Sacerdotekunapas, Leví runakunapas Juanman rispan tapuranku: “¿Pitaq kanki? Llapankun yachayta munanku pichus kasqaykita”,  nispa. Juantaq niran: “Noqaqa ch’inneqpi rimaqmi kani, runakunatan yanapani Diosman kutirikunankupaq, profeta Isaiaspa nisqan jina”, nispa.

Runakunaqa kusisqan uyariqku Juanpa yachachisqanta. Askhataq tapuranku: “¿Qanchu Mesías kanki?”, nispa. Paytaq niran: “Qhepayta jamuqqa aswan atiyniyoqmi noqamanta. Manan usut’allantapas paskanaypaq jinachu kani. Noqaqa unullawanmi bautizani. Paymi ichaqa santo espirituwan bautizanqa”, nispa.

“Paymi jamuran chay k’anchaymanta willaq, chhaynapi llapa runakuna paypa willasqanwan creenankupaq” (Juan 1:7)