Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 69 WILLAKUY

Ángel Gabriel Mariata visitan

Ángel Gabriel Mariata visitan

Elisabetpa parientenmi María karan, payqa Nazaret llaqtapin tiyaran. Mariaqa carpintero Josewanmi casarakunanña kasharan. Elisabet soqta killaña onqoq kashaqtinmi ángel Gabrielqa Mariaman rijurispa niran: “¿Imaynalla, María? Jehová Diosmi allinpaq qhawarisunki”, nispa. Mariaqa manan entienderanchu, chaymi Gabrielqa niran: “Onqoqmi rijurinki, jinaspa qhari wawata onqokunki, sutinmi kanqa Jesús. Payqa reymi kanqa, wiñaypaqtaqmi kamachikunqa”, nispa.

Mariataq niran: “¿Imaynataq chayri kanman? Noqaqa manan pi qhariwanpas puñunichu”, nispa. Jinan Gabrielqa niran: “Diospaqqa manan imapas sasachu, santo espiritun uraykamusunki, jinan wawayoq kanki. Parienteyki Elisabetpas onqoqmi kashan”, nispa. Chaymi Mariaqa niran: “Diospa kamachinmi kani, niwasqaykiman jina pasachun”, nispa.

 Mariaqa Elisabet-ta visitaqmi riran. Wasinman chayaqtinmi Elisabetpa wawanqa kusikuymanta wijsanpi saltaran. Jinan Elisabetqa santo espirituq junt’aykusqan niran: “María, Diospa bendecisqanmi kanki. Anchatan kusikuni señorniypa maman visitamuwasqanmanta”, nispa. Jinan Mariaqa niran: “Jehová Diostan tukuy sonqoywan alabani”, nispa. Mariaqa kinsa killan Elisabetwan qhepakuran, chaymantataq Nazaretman kutipuran.

Joseqa yacharusqan María onqoq kashasqanta, jinan manaña munaranchu paywan casarakuyta. Ichaqa mosqoyninpin Diospa angelnin payman rijurispa niran: “Ama manchakuychu Mariawan casarakuytaqa, manan ima mana allintapas ruwanchu”, nispa. Chaymi Mariawan casarakapuran.

“Señor Diosqa ima munasqantan ruwan janaq pachapipas kay pachapipas” (Salmo 135:6)