Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 65 WILLAKUY

Ester llaqtanta salvan

Ester llaqtanta salvan

Esterqa Susa llaqtapin tiyaran, chayqa Persia nacionpin tarikuran. Askha watakuna ñaupaqtan rey Nabucodonosor Esterpa familianta Jerusalén llaqtamanta apapusqa. Estertaqa primon Mardoqueon uywaran. Payqa rey Asueropaqmi llank’aran.

Rey Asueron juj reinata munaran. Jinan reyman pusamuranku sumaq rijch’ayniyoq sipaskunata, chaymi Estertapas pusaranku. Jinan reyqa Esterta ajllaran reina kananpaq. Primon Mardoqueotaq Esterta kamachiran judía kasqanta ama pimanpas willananpaq.

Hamanmi llapa umalliqkunata umalliran, payqa orgulloson karan. Jinan llapa runakuna payman k’umuykunankuta munaran. Mardoqueon ichaqa mana k’umuykuqchu. Jinan sinchita phiñakuspa wañuchiyta munaran. Hamanqa yacharusqan Mardoqueo judío kasqanta, jinan llapa judiokunata wañuchiyta munaran. Chaypaqmi reyta niran: “Judío runakunaqa sinchi millaymi kanku, wañuchinanchismi”, nispa. Chaymi reyqa Hamanman permisota qoran juj leyta churananpaq. Chay leymi niran: “Adar killapi 13 p’unchaypin llapa judiokunata wañuchinkichis”, nispa. Jehová Diosmi ichaqa chayta rikumusharan.

Esterqa manan yacharanchu. Jinan Mardoqueoqa chay leymanta juj copiata apachispa niran: “Reywanmi rimanayki”, nispa. Estertaq niran: “Reypa mana invitasqan payman riqtaqa wañuchinkun. 30 p’unchayñan reyqa mana invitawanchu. Chaywanpas risaqmi, varanta jaywarimuqtinqa kausasaqmi, mana chayqa jinachá wañusaqpas”, nispa.

Esterqa jaykuranmi reypa pationman, reytaq varanta jaywarimuran. Chaymi Esterqa reyman qayllaykuran, reymi tapuran: “Ester, ¿imatan munashanki?”, nispa. Estertaq niran: “Qanwan  Hamanwan mijuna wayk’uchisqayman jamunaykichista munani”, nispa. Riqtinkutaq Esterqa juj kaq p’unchaypaqwan invitaran. Chaypin reyqa tapullarantaq: “¿Imatan munasharanki?”, nispa. Estertaq niran: “Reyniy, juj runan noqatapas llaqtaytapas wañuchiyta munawanku, salvawayku”, nispa. Jinan reyqa niran: “¡¿Pitaq wañuchiytari munasunkichis?!”, nispa. Estertaq niran: “Kay millay Hamanmi”, nispa. Jinan reyqa kaqpacha kamachiran Hamanta wañuchinankupaq.

Hamanpa churachisqan leytaqa manan reypas chinkachiyta atiranchu. Chaymi reyqa Mardoqueota churaran umalliqkunata umallinanpaq, jinaspa permisota qoran mosoq leyta churananpaq. Chay leymi niran: “Judiokunaqa atinkun defiendekuyta atacasqa kaqtinku”, nispa. Jinan adar killa 13 p’unchaypi judiokunaqa enemigonkuta atiparanku. Chaymi judiokunaqa sapa wata chay p’unchayta festejanku.

“Noqaraykun kamachikuqkunaman reykunamanpas apasqa kankichis, chhaynapi paykunapas waj nacionmanta runakunapas willasqa kanankupaq” (Mateo 10:18)