Kichay leenaykipaq

Índice nisqaman riy

Jehová Diospa testigonkuna

Simita akllay quechua (Cusco)

 60 WILLAKUY

Mana jayk’aq tukukuq gobierno

Mana jayk’aq tukukuq gobierno

Juj tutan rey Nabucodonosorqa musphanata mosqokuran, jinan mana puñuytapas atiranchu. Chaymi watuqkunata wajachimuspa niran: “Mosqokusqayta explicawaychis”, nispa. Jinan paykunaqa niranku: “Reyniy, willawayku mosqokusqaykita”, nispa. Reytaq niran: “Qankuna willawaychis mosqokusqayta, mana willawaqtiykichisqa wañuchisaykichismi”, nispa. Paykunataq niranku: “Willawayku mosqokusqaykita, jinan explicasaykiku”, nispa. Reytaq niran: “Engañaytan munawankichis”, nispa. Jinan watuqkunaqa niranku: “Manan pipas mañakusqaykitaqa ruwayta atinmanchu”, nispa.

Jinan Nabucodonosorqa sinchita phiñakuran, jinaspa kamachiran llapa yachayniyoqkunata wañuchinankupaq. Chay pasaqtinqa Danielpas amigonkunapas wañunankun karan. Chaymi Danielqa reymanta tiempota mañakuran, jinaspa paypas amigonkunapas Diosmanta mañakuranku. ¿Imatan Dios ruwaran?

Danielmanmi rijuriypi willaran reypa mosqokusqanta, explicarantaq significasqanta. Jinan Danielqa reypa oficialninman rispa niran: “Ama wañuchiychischu yachayniyoqkunata, yachanin reypa mosqokusqanta”, nispa. Jinan oficialqa reyman pusaran. Danielmi reyta niran: “Diosmi willarasunki jamuq tiempopi pasananta. Mosqoyniykipin rikuranki juj imagenta, umanmi qorimanta kasqa, qhasqonwan makinkunawantaq qolqemanta, wijsantaq cobremanta, chakankunataq fierromanta, chakinkunataq fierromanta t’urumantawan. Jinan orqomanta qaqa ch’eqtakamuspa imagenpa chakinpi chayaran jinaspa ñut’uran, wayrataq phukurpariran, jinan mana imapas karanñachu. Chay qaqataq jatun orqoman tukuspa pachantinman junt’aykuran”, nispa.

Chay qhepamanmi niran: “Gobiernoykin chay imagenpa  umanqa, chay qhepamanmi qolqewan tupaq gobierno kanqa. Chaymantataq cobrewan tupaq juj gobierno kanqa, chay qhepamantaq fierrowan tupaq gobierno kallanqataq. Ultimotataq juj gobierno kanqa fierro jina kallpayoq, mayninpitaq t’uru jina pisi kallpayoq. Chay qhepamanmi rikuranki juj qaqata, chayqa Diospa gobiernontan representan. Chay gobiernon llapa gobiernokunata ch’usaqyachispa wiñaypaq kamachikunqa”, nispa.

Nabucodonosorqa Danielpa ñaupaqenpin pampaman qonqorikuspa niran: “Diosniyki mosqokusqaytaqa willarasunki, manan mayqen diospas Diosniyki jinaqa kanchu”, nispa. Chay qhepamanmi Danielta churaran yachayniyoq runakunata umallinanpaq, Babilonia provinciata kamachinanpaqpas. Jehová Diosqa uyariranmi Danielpa mañakusqanta ¿riki?

“Chay reykunatan juñuranku hebreo rimaypi ‘Armagedón’ nisqa partepi” (Apocalipsis 16:16)