Kichay leenaykipaq

Jehová Diospa testigonkuna

Simita akllay quechua (Cusco)

Umalliq t’aqaq cartan

Umalliq t’aqaq cartan

Munasqa wayqe-panaykuna:

Profeta Ezequielmi 2.600 wata ñaupaqta juj rijuriypi rikuran Diospa carronta, chay carrotaqa Jehová Diosmi manejasqa. Chay carroqa phawayllas phawasqa rayoq llifllikaynin jinaraq, may ladomanpas muyurispaqa kaqllatas phawashan, manas chikallantapas sayanchu (Ezeq. 1:4, 9, 12, 14, 16-27).

¿Imatan chay profetaq rikusqan yuyarichiwanchis? Janaq pachapi Diospa organizacionninqa manas sayanchu. Kay allpapipas Diospa llaqtanqa admirakunapaqmi imaymanapi ñauparishan, chaytan sut’ita rikukuran qayna wata ruwakusqanpi.

Estados Unidos nacionpi kaq Brooklyn llaqtamanta betelitakunan Warwick llaqtaman astakuranku, chayqa kashan Nueva York nacionpin. Wakinkunataqmi manaña betelpichu llank’aranku aswanmi juj asignacionkunata chaskiranku. Wakin nacionkunapi betelitakunataq tukuy atisqankuta llank’aranku salonkuna ruwaypi, allichaypi, sucursalkunata juñuypi otaq juj llaqtakunaman astakuranku. Qankunapas manaña astakurankichischu chaypas, imaymana ruwaypichá kasharankichis.

Allpantinpi hermanonchiskunaqa anchatan kallpachakushanku Jehová Diospa llaqtanwan kuska usqhaylla llank’anankupaq, chayta rikuspan umalliq t’aqaqa anchata kusikun. Askha hemanokunan maypichus predicaqkuna astawan necesitakun chayman riranku. Jujkunataq decidiranku juj rimaykunapi otaq jujniraymanta predicanankupaq. Chaymantapas llapa junt’aq sonqo cristianokunan kuraqña otaq onqosqaña kashanku chaypas, kallpachakushanku carrerapi phawayta chhaynapi kausayta chaskinankupaq, ocupasqan kashanku Diosta serviypi. Decidisqataq kashanku Satanás llulla kasqanta rikuchinankupaq (1 Cor. 9:24).

Jehová Diosqa rikumushanmi payta servinaykichispaq tukuyta kallpachakusqaykichista manataqmi qonqanqachu (Heb. 6:10). Qankunaqa Abrahanwan Sarawan ruwasqankuta jinan ruwashankichis. Abrahantaqa 70 más watanpi kashaqtinmi Dios kamachiran Ur llaqtata saqespa Canaán llaqtaman astakunanpaq. Chaypin payqa pachaj watata karpakunapi tiyaran, chay qhepamanmi wañupuran, chhaynata tukuy sonqo Diosta servisqankuqa ancha admirakunapaqmi (Gén. 11:31; Hech. 7:2, 3).

Noqanchispas tapukunanchismi: “¿Paykuna jinachu Diosta servishani?”, nispa. Kay tukukuy p’unchaykunapi junt’aq sonqo kanankupaq kallpachakuqkunaqa Jesuspa kamachisqantan  kasukushanku. Paymi kamachiwaranchis: “Llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis”, nispa (Mat. 28:19).

“Riychis” nispaqa predicaypi ocupasqa kashanamantan Jesusqa nisharan. ¡Anchatan kusikuyku qayna wata tukuy atisqaykichista ruwasqaykichismanta! Llapa kay pachapi Diospa gobiernonmanta predicakusqanqa Jehová Diospa yanapayninwanmi ruwakushan, paypa makintan tukuy chaykunapi rikushanchis (Mar. 13:10).

Askha runakunan Diosmanta allin willakuykunata chaskikushanku. Qayna watan 8.340.847 predicaqkuna karanchis, sapa killataqmi 10.115.264 runakunata estudiachikuran. Chaypin rikunchis Diospa carronqa usqhaylla purishasqanta, qankunapas chaytan ruwashallankichistaq. Chhaynaqa kallpachakushallaychis llank’anaykichispaq, manaraq kausayman jaykunapaq punkuta Jehová Dios wisq’ashaqtin.

¡May allinpunin 2017 watapaq ajllakusqan textoqa! Chay textopin nishan: ‘Jehová Diosman jap’ipaykukuy, allinkaqtataq ruway’, nispa (Sal. 37:3). Jehová Dios serviyta allin kaq ruwaytapas ajllakuspaqa Jehová Diospi confiasqanchistan rikuchishanchis. Manan qonqananchischu Jesuspa prometewasqanchista, paymi niran: “Noqaqa sapa p’unchaymi qankunawan kashasaq kay tiempoq tukukapunankama”, nispa (Mat. 28:20). ¿Qonqanmanchu chay prometesqanta?

Jehová Diosqa bendeciwasunmi tukuy sonqowan servisqanchista. Askhataña otaq pisillataña ruwasunman chaypas tukuy atisqanchistan ruwananchis payta munakusqanchisrayku. Chhaynata servispan Diospa sonqonta kusichisun (2 Cor. 9:6, 7). Chaypaqqa Jehová Diosmantan mañakushanallanchis, simin qelqatataq estudiananchis, kusisqa sonqowantaq predicananchis, chhaynapin Jehová Dioswan allin amigontin kasunchis.

Satanasqa yachanmi ‘tiempon pisillaña kasqanta’, chaymi Diospaq junt’aq sonqo kasqanchista chinkachiyta munan (Apo. 12:12). Saqraqa tukuytan ruwanqa Diosmanta t’aqawananchispaq. Ichaqa Jehová Diosmanta tukuy kallpanchiswan jap’ipakusun chayqa, manan atinqachu (Sal. 16:8). Noqaykuqa anchatan munakuykichis anchatataqmi “gracias” niykichis, kay tukukuy p’unchaykunapi Diospa gobiernonpaq tukuyta ruwasqaykichismanta.

Iñiqmasiykikuna,

Jehová Diospa testigonkunata umalliq t’aqa