Santiago 4:1-17

  • Ama kay pachaq amigon kanamanta (1-12)

    • Saqra contran qaqata sayana (7)

    • Diosman asuykunamanta (8)

  • Mana alabakuq kanamanta (13-17)

    • ‘Jehová Dios munanqa chayqa, kayta jaqayta ruwasunchis’ (15)

4  ¿Imataq qankunatari maqanakuyman jap’inakuyman apashasunkichis? ¿Manachu sonqoykichispi qankunawan maqanakuq millay munapayaykuna chayman apashasunkichis?  Chaychá qankunaqa imatapas munashallankichis, manataq imatapas chaskinkichischu; cheqnipakushallankichis,* jujpa kaqnintapas munapayashallankichis, manataq imatapas tarinkichistaqchu. Arí, qankunaqa maqanakushallankichismi, guerrapipas kashawaqchis jinan jap’inakushankichis. Mana imayoqchus kashankichis chayqa, mana mañakusqaykichisraykun chhayna kashankichis.  Mañakunkichisña chaypas, mana allinkunata ruwanaykichispaqtaq aychaykichispa munayninta ruwanaykichispaqtaq mañakunkichis chayri, ¿imaynapitaq chaskiwaqchis imachus mañakusqaykichista?  ¡Yau Diosta wasanchaq runakuna! ¿Manachu yachankichis kay pachaq amigon kaqkunaqa Diospa enemigon kasqankuta? Pipas kay pachaq amigon kayta munaqqa Diospa enemigonmanmi tukupushan.  ¿Icha, Diospa simin qelqapi: “Envidiakuyman aysawaqninchis sonqonchisqa sinchitapunin imaymanata munapayachiwanchis”, nispa nisqan yanqa kananpaqchu piensankichis?  Diospa qosqan ancha sumaq sonqo kaymi ichaqa chaymanta aswan jatun. Chaymi simin qelqapipas nin: “Diosqa uma oqariqkunaq contranpin kashan, k’umuykukuqkunamanmi ichaqa ancha sumaq sonqo kayninta rikuchin”, nispa.  Chayrayku, k’umuykukuywan Diosta kasukuychis, Saqraq contranpitaq qaqata sayaychis, jinan payqa qayllaykichismanta ayqerikapunqa.  Diosman achhuykuychis,* jinan paypas qankunaman achhuykamusunkichis. Yau juchasapakuna, makiykichista maqchikuychis; yau iskayaqkuna, sonqoykichista ch’uyanchaychis.  Chaymantapas qankunaqa llakisqan kashanaykichis, waqashanaykichismi, arí, asikunaykichistaqa waqaychis, kusikunaykichistaqa llakikuychis. 10  Jehová Diospa ñaupanpi k’umuykukuychis, jinan payqa jatunchasunkichis. 11  Wayqe-panaykuna, amaña pimantapas rimakuychischu. Pipas iñiqmasin contra rimashanman juzgashanmanpas chayqa, kamachikuypa contranpin rimashanman, chay kamachikuytataqmi juzgashanmanpas. Kamachikuyta juzgaspaqa manan kamachikuypa nisqantachu junt’ashanman, aswanpas juezmi kashanman. 12  Ichaqa jujllan kamachikuyta churaqqa, jujllataqmi juezpas, payllan salvananpaqpas wañuchinanpaqpas atiyniyoqqa. Chhaynaqa, ¿pitaq qanri kanki runamasiykita juzgashanaykipaq? 13  Yau: “Kunanpas paqarinpas chay llaqtata risunchis, chaypitaq juj wata kamusunchis, negociota ima ruwamusunchis, jinaspa qolqeta ganamusunchis”, nispa niqkuna, 14  ¿imaraykun chhaynata rimankichis? ¿Acaso qankunari yachankichischu paqarin imachus vidaykichis kananta? ¿Manachu yachankichis vidaykichisqa pacha phuyu jinalla kasqanta? Pacha phuyuqa juj raton rijuriramun juj ratomantaq chinkarapun ¿riki? 15  Chayta ninaykichismantaqa, ¿manachu aswanpas niwaqchis: “Jehová Dios munanqa chayqa kausashallasunmi, jinaspa kayta jaqayta ruwasunchis”, nispa? 16  Qankunataq ichaqa chhaynaniraqta alabakuspa jatunchakushankichis, chhayna alabakuyqa manapunin allinchu. 17  Chhaynaqa, pipas allin kaq ruwayta yachashaspa mana chayta ruwanchu chayqa, juchatan ruwashan.

Uraypi willakuykuna

Griego rimaypiqa “wañuchishallankichis” ninmi. Chaypaq qhaway 1Jn 3:15 textota.
“Achhuykuy” simitaqa “asuykuy, qayllaykuy otaq chimpaykuy” nillankutaqmi.