Santiago 1:1-27

  • Napaykuy (1)

  • Aguantaq kayqa kusikuyta apamusqanmanta (2-15)

    • Iñiyninchis probasqa kasqan (3)

    • Iñiywan mañakunamanta (5-8)

    • Munapayayqa juchaman wañuyman iman apan (14, 15)

  • Tukuy allin kaqkunaqa janaq pachamantan jamun (16-18)

  • Diospa siminta uyarispa kasukunamanta (19-25)

    • Espejopi uyanta qhawakuq runamanta (23, 24)

  • Mana ima qhelliyoq ch’uya adoraymanta (26, 27)

1  Diospa, jinallataq Señor Jesucristoq kamachin noqa Santiagon napaykamuykichis qankuna lliupi ch’eqerisqa kaq chunka iskayniyoq ayllukunata:  Wayqe-panaykuna, anchata kusikuychis ima pruebapiña tarikuspapas.  Yachasqaykichis jina, iñiyniykichischus chhayna probasqa kanqa chayqa, allintan imatapas aguantankichis.  Imaymanata aguantaspan qankunaqa allin preparasqa kankichis, chhaynapi tukuy imapipas junt’asqa kanaykichispaq, allinpuni kanaykichispaqwan, arí, mana imapas faltanasuykichispaq.  Chayrayku, mayqenniykichispas yachayniyoq kayta necesitashankichis chayqa, Diosmanta mañakushallaychis, jinan Diosqa chay mañakusqaykichista qosunkichis. Payqa lliuman tukuy sonqowan askhatapuni qoq Diosmi, mana phiñarispataqmi payqa qonpas.  Ichaqa iñiywanmi mañakuna, manan imamantapas iskayanachu. Pipas iskayaqqa lamar-qochapi wayraq aytikachasqan unu jinan kanman.  Chhayna runaqa manan imatapas suyananchu Jehová Diosmantaqa.  Chaymantapas chhayna runaqa imamantapas iskayashallanmi, manataqmi tajanchu ima ruwasqanpipas.  Wajcha iñiqmasiqa jatunchasqa kasqanmanta kusikuchun, 10  qhapaqtaq k’umuykachisqa kasqanmanta kusikuchun. Qhapaqkunaqa t’ikakuna jinan chinkapunqaku. 11  Imaynan plantakunaqa inti lloqsimuqtin chay intiq ruphasqan naq’epun, t’ikankunapas urmapun, sumaq rijch’ayninpas chinkapun, chhaynatan qhapaqkunapas qhapaq kaykunata maskhashaspa chinkapunqaku. 12  Kusisqa kachun pruebata aguantaq runaqa, chhayna probasqa kasqanraykun payqa kausay coronata chaskinqa, chaytan Jehová Diosqa munakuqninkunaman prometeran. 13  Ichaqa pipas pruebapi tarikuspaqa ama nichunchu: “Diosmi pruebaman churawashan”, nispaqa. Imaynan Diosqa mana imawanpas tentasqachu kanman, chhaynallataqmi payqa mana pitapas mana allinkunawanqa pruebaman churanmanchu. 14  Aswanpas sapankan pruebamanqa churakun imachus munasqanwan tentasqa kaspa sonqonta suwachikuspa. 15  Wiñaruspataq chay munapayayqa juchata paqarichin, juchataq wañuyman apan. 16  Munasqa wayqe-panaykuna, ama engañakuychischu. 17  Tukuy allin kaqkunapas tukuy junt’asqa kaqkunapas janaq pachamantan, arí, cielopi k’anchaykunaq Yayanmantan chaykunaqa jamun, payqa manan llanthu jinachu kayman jaqayman cambian. 18  Payqa munayninman jinan cheqaq kaq simiwan paqarichiwaranchis, chhaynapi kamasqankunamanta ñaupaq ajllasqakuna kananchispaq. 19  Munasqa wayqe-panaykuna, kayta allinta yachaychis: Llapaykichispas allin uyariqmi kanaykichis, manataqmi comuntachu rimanaykichis, nitaqmi usqhaylla phiñakuqchu kanaykichispas; 20  runaq phiñakuyninqa manan Diospa chanin kaynintachu apamun. 21  Chayrayku, qankunamanta wijch’upuychis tukuy qhelli kaqta, tukuy millay kaqtawan; jinaspa tukuy llamp’u sonqo kaywan chaskikushallaychis qankunapi churasqa simita, chhaynapi chay simi salvanasuykichispaq.* 22  Ichaqa, ama yanqa uyariqkunallachu kaychis, aswanpas kasukuychispuni Diospa simintaqa, amataq yanqa piensaykunawanpas engañachikuychischu. 23  Pipas Diospa siminta uyarishaspa mana kasukuq runaqa espejopi uyanta qhawakuspa imaynachus kasqanta qonqapuq runa jinan kanman. 24  Arí, chay runaqa uyanta qhawaykuspan ripun, ripuspa jinataqmi qonqarapun imaynachus kasqanta. 25  Ichaqa pipas tukuy yuyaywan qhawan kacharichisqa kayman apaq junt’asqa kamachikuy simita, jinaspa chayman jina purin chayqa, Diospa siminta kasukuq runan chay runaqa, manataqmi yanqa uyariqllachu, chhayna runaqa tukuy ima ruwasqanpin kusisqa kanqa. 26  Pipas “Dios adoraqmi kani” nishaspa qallunta mana watanmanchu chayqa, pay kikintan engañakushanman,* yanqapaqtaqmi Diostapas adorashanman. 27  Yayanchis Diospa qhawarisqanman jinaqa, ch’uya mana ima qhelliyoq adorayqa ñak’ariypi tarikuq wajcha wawakunata viudakunatawan cuidaymi, kay pacha kausaywanpas mana qhellichakuymi.

Uraypi willakuykuna

Chaypiqa “chay simi almaykichista salvananpaq” nillanmantaqmi.
Griego rimaypiqa “sonqontan engañashanman” ninmi.