Romanos 7:1-25

  • Manaña kamachikuy simipichu kasqankuta juj ejemplowan rikuchikun (1-6)

  • Juchata kamachikuy simi sut’iman orqosqanmanta (7-12)

  • Juchawan maqanakuymanta (13-25)

7  Wayqe-panaykuna (noqaqa kamachikuy simita yachaqkunamanmi qelqamushaykichis), ¿manachu yachankichis kamachikuy simiqa kausanankamalla runaq patronnin kasqanta?  Kamachikuy simiq nisqanman jinaqa, casarasqa warmiqa qosan wañunankaman payman watasqa kashan, qosan wañupuqtinmi ichaqa libre kapun paypa kamachikuyninmanta.  Qosan kausashallaqtinraqchus juj qhariq kapunman chayqa, “jujwan pantaq warmi” nisqan kanman. Qosan wañupuqtinmi ichaqa libre kapunman paypa kamachikuyninmanta; chhaynapi tarikuspachus juj qhariq kapunman chayqa, manan pantaq warmichu kanman.  Chhaynaqa, wayqe-panaykuna, Cristoq cuerponraykun qankunapas kamachikuy simipaq ña wañupunkichisña wañuymanta kausarichisqa Cristoq kanaykichispaq, chhaynapi Diospaq allin ruwaykunata ruwananchispaq.  Aychanchispa munayninman jina kausashaqtinchismi kamachikuy simiqa sut’iman orqoran juchaman aysaq munapayaykunata, chaykunan cuerponchista tanqaq wañuyman apaq ruwaykunata ruwananchispaq.  Chhaynaqa, ñataq watawaqninchis kamachikuypaq wañupunchisña chayqa, kunanqa libreñan kapunchis kamachikuy simimanta, chhaynapi manaña qelqasqa kamachikuyman jinachu kamachi kananchispaq, aswanpas Diospa espiritunman jinaña kamachi kananchispaq.  Chhaynaqa, ¿nisunmanchu: “Kamachikuy simiqa manan allinchu”,* nispa? ¡Manapunin! Manachus kamachikuy simi kanman karan chayqa, manan yachaymanchu karan imachus jucha kasqanta. Manachus kamachikuy simi ninman karan “aman jujpa kaqninta munapayankichu” nispa chayqa, manan yachaymanchu karan chay ruway mana allin kasqanta.  Juchaqa chay kamachikuyraykun imaymanakunata munapayachiwaran, manaraq kamachikuy simi kashaqtinmi ichaqa wañusqa kasharan.  Manaraq kamachikuy simi kashaqtinqa kausasharanin noqaqa, kamachikuy simi chayamuqtinmi ichaqa jucha kausariran, noqataq wañupurani. 10  Chhaynapin reparani chay kamachikuyqa kausayman apananmantaqa wañuyman apaq kasqanta. 11  Juchaqa kamachikuywanmi jap’iwaran, chhaynapin chay kamachikuywan wañuchiwaran. 12  Chhaynaqa, kamachikuy simiqa ch’uyan, chaypi imakunachus nikusqanpas ch’uyan, chaninmi, allintaqmi kanpas. 13  Chhaynaqa, ¿allin kaqchu wañuyman apawanqa? ¡Manapunin chhaynachu! Aswanpas juchan chaytaqa ruwan, allin kaqwanmi juchaqa wañuyta apamuwaran imachus jucha kasqanta reparachiwananpaq; chhaynapin kamachikuyqa rikuchin juchaqa sinchi mana allinpuni kasqanta. 14  Yachasqanchis jina, kamachikuy simiqa Diosmantan jamun; noqan ichaqa aychalla kani, juchaman vendesqa. 15  Manan yachanichu imatachus ruwashani chayta. Noqaqa manan imachus munasqaytachu ruwani, aswanpas imachus cheqnisqaytan ruwani. 16  Imachus mana munasqaytataq ruwani chayqa, “kamachikuy simiqa allinpunin” ninin. 17  Chhaynaqa, manan noqachu kani chay mana allinkuna ruwaqqa, aswanpas noqapi kaq juchan chaykunataqa ruwan. 18  Noqaqa yachanin runalla kasqayta, aychaypiqa manan ima allinpas kanchu; maytaña munani allin kaq ruwayta chaypas, manan atinichu. 19  Allin kaqtaña ruwayta munani chaypas, manan atinichu, aswanpas mana munasqay mana allin kaqtan ruwani. 20  Mana munasqaytataq ruwani chayqa, manañan noqachu ruwani, aswanpas noqapi kaq juchan chaytaqa ruwan. 21  Chhaynaqa, kay kamachikuytan noqapi tarini: Allin kaqta ruwayta munashaqtiy noqapiña mana allin kaq kashasqanta. 22  Noqaqa maytapunin sonqoypi kusikuni Diospa kamachikuyninwan; 23  cuerpoypin ichaqa waj kamachikuyta reparani, chay kamachikuyqa juchaq kamachikuyninmi, chay kamachikuymi yuyayniypi kaq kamachikuy contra kashan, ima munasqantataq noqawan ruwan. 24  ¡Ay noqa runamanta! ¿Pitaq kay wañuyman aysaqniy cuerpomantari librawanqa? 25  ¡Diostan “gracias” nini Señorninchis Jesucristowan librawasqanmanta! Chhaynaqa, noqa kikiymi yuyayniywan Diospa kamachikuyninta kamachi jina kasukuni, cuerpoywantaq ichaqa juchaq kamachikuyninta kasukuni.

Uraypi willakuykuna

Griego rimaypiqa “kamachikuy simiqa juchan” ninmi.